wandījo 35

Yakobo kūshoka Beeseli

1Hūna ū Mulungu ūng'wīla ū Yakobo gīkī, “Jaga Beeseli lūūlū ī haha ūkazenge kwenūko, ūbeeje na ng'walīlo koi kūlwa ng'wa Mulungu, ūyo akakwilongela aho wampeelaga nkūlūyo Esau.” 2Ū Yakobo ūbawīla a ba mu kaya yakwe, na a bose abo bikalaga hamò nang'hwe, “Galekagi a mashikolo ga kwilamīlīgīja ga mahanga ayo mulī nago; ng'wiyeeje, nī myenda muzwale yīngī. 3Nguno tūlīnga a henaha tūje Beeseli, ūko nalīkazenga ng'walīlo kūlwa ng'wa Mulungu, ūyo akaniidīka aho naalīlaga ng'wikanza lya makoye gane; ūyo nīyo alī hamò nane būlī kwene ūko nakūjaga.” 4Na lūūlū būng'winha Yakobo pye a mashikolo ga kwilamīlīgīja gabo, a ga mahanga ayo baalī nago, pye nī heleeni ja kū matū gabo. Ū Yakobo ūgajīka ha sī, ng'witina lya līntī mu Shekemu ng'wenūmo. 5Hūna būbūūka bajile, ī lyogohya lya ng'wa Mulungu lyalī lyabagwīla pye a banhū ba mu mizengo ī ya bbihī bbihī, atigelile nūūlū ūmò wa kūbūūbūkīla aho balī mu lūgendo. 6Ū Yakobo aho washika ī Luzi (h'ī Beeseli) ū mu sī ya Kanaani, 7Ūzenga ng'walīlo. Hūna ī lipandī lyenīlo ūlitana El Beeseli;#35:7 El Beeseli: Makūlū gaho Mulungu wa kwenūko Beeseli. nguno a henaho h'ī lipandī īlo Mulungu akiyoolecha ū kūlī we aho wampeelaga nkūlūye. 8Ī likanza lyenīlo ūzumalīka Debola, walī ntūmami wa ng'wa Lebbeka; ūjīkwa ha sīlīlī ya ntī gūmò gwaho gwa Beeseli. Ū ntī gwenūyo gwinhwa lina lya Aloni Bakuti.#35:8 Aloni Bakuti: Makūlū gaho, Ntī gwa kūlīlīla ng'hūngū.

9Ū Yakobo aho washoka kūfuma Padani-alamu, ū Mulungu akang'wilongela hangī ūmfuuha. 10Ū Mulungu ūng'wīla gīkī, “Ī lina lyako ūlī Yakobo, alīyo ūtikala ūkwitanagwa Yakobo; ī lina lyako līkūbiza Isilaeli,” na lūūlū ūng'wilīka lina lya Isilaeli. 11Na hangī ū Mulungu ūng'wīla gīkī, “Ū Nene nalī Mulungu wa būdūla bose; ibyalagi, mukwīle mubize bingī. Ihanga līkūfuma ū mulī bebe, na ng'anda ja mahanga ga banhū; nīyo na batemi bakūfuma ū mu mīlī gwako. 12Nī sī īyo nakang'winha Abulahamu na Isaka nalīkwinha bebe; nīyo ī sī yenīyī nakūshinha ī shibyalīlwe shako īsho shikūbiza ho a hanuma yako.” 13Hūna ū Mulungu wīnga ho,#35:13 Wīnga ho: Nūūlū, ūlinha īngile ho. ūneka henaho aho walūngalūngīlaga nang'hwe. 14Ū Yakobo ūsīmbīla ng'hīngī y'iwe a h'ipandī īlo Mulungu akayomba nang'hwe; hūna wita a higūlya yalyo shitambo sha kūng'wiwa, hamò na maguta. 15Ū Yakobo ūlitana ī lipandī īlo Mulungu akayomba nang'hwe gīkī Beeseli.

Kūcha kwa ng'wa Laheli na Isaka

16Hūna būbūūka kūsaama ī Beeseli; aho bataalī kūshikīīla Efulata, kaasaaga kalūgendo hoi gete, ū Laheli wandya kūlung'wa būsūngū wa kūbyala; ū būsūngū būnkoya no. 17Aho wabyala, ū nkīma ū ng'witūūja ūng'wīla gīkī, “Ūtoogohage nguno wapandīka ng'wana ngosha hangī.” 18Alīyo akazumalīka; gwike aho ataalī adūgije kūyomba, ū ng'wana ūng'wilīka lina lya “Beni-oni.”#35:18 Beni-oni: Makūlū gaho, ng'wana wa kūluha. Gwike ū Ise wa ng'wana ūng'witana “Benjamini.”#35:18 Benjamini: Makūlū gaho, ng'wana wa nkono gwane gwa būlyo. 19Ū Laheli ūbiza wazumalīka, ūjīkwa; baalī mu lūgendo bajile Efulata (h'ī Betelehemu). 20A h'ishigo lyakwe, ū Yakobo ūzenga shiizūkījo; īsho na haha shoolekije aho walaala ū Laheli. 21Ū Isilaeli ongeja kūsegeja, ūūkatūūla ng'hambī yakwe kū nkīlo gwa Migidali-edeli.#35:21 Migidali-edeli: Nūūlū, ng'hambī ya Edeli. 22Aho alī mu sī yenīyo ū Isilaeli, ū Lubeni akang'wingīlīīla ū nina ng'wīnga, ū Biliha, ū nke wa ng'wa ise, ūlaala nang'hwe; ū mhayo gwenūyo ūgwigwa ū Isilaeli.

A bitūnja bakwe ū Yakobo a bose baalī ikūmi na babīlī.

23A ba ng'wa Leya baalī:

Lubeni, myalwa wa kwandya wa ng'wa Yakobo;

hūna wiza Simioni, Lawī, Yuda, Isakaali, Zabuloni.

24A ba ng'wa Laheli baalī:

Yosefu na Benjamini.

25A ba ng'wa Biliha ū nsese wa ng'wa Laheli baalī:

Dani na Nafutali.

26A ba ng'wa Zilipa ū nsese wa ng'wa Leya baalī:

Gadi na Asheli.

A benaba hū bitūnja ba ng'wa Yakobo abo akabyalīlwa aho alī mu sī ya Padani-alamu.

27Hūna ū Yakobo ūshikīīla kaya kūlī ise Isaka, ūko wikalaga ī Mamule, bbihī na Kiliati-alaba (h'ī Hebuloni). Ū wenūbo hū walī wikalo wa ba Abulahamu nū Isaka. 28Ī myaka ya būlamu bo ng'wa Isaka īkashika igana na makūmi anaane. 29Hūna ūzumalīka alī namhala wa myaka mingī, ūjīkwa wisangīja na bang'wawe. A bitūnja bakwe, a ba Esau nū Yakobo būnjīka.

Currently Selected:

wandījo 35: SUKBI15

Highlight

Copy