Хосталыышкын 19

Чагыг-керээни чарарынга белеткел

1Израильчилер египет черден үнүп чоруткандан бээр үшкү айда, таптыг-ла ай чаазында Синай деп ээн кургаг ховуга чедип келгеннер. 2Олар Рефидимден көжүп үнгеш, Синай ховузунга чедип кээп, ында турар даг дужунга турлагжып алганнар#Сан. 33:15. 3Моисей Бурганга ужуражыры-биле дагже үнүп бар чыткан. Дээрги-Чаяакчы ону дагдан кый деп, мынча дээн: «Иаковтуң үре-салгалы болур израиль чонга мону чугаала: 4„Египетчилер-биле чүнү кылганымны база силерни эзир чалгыннарынга дажыглап#Ы. х. к. 32:11, Бодумче эккелгенимни көрген силер. 5Ынчангаш Мээң сөзүмнү тооп дыңнап, Мээң чагыг-керээмни сагыыр болзуңарза, бүгү чоннар аразындан Мээң улуг үнелиг өнчү-хөреңгим болур силер#Ы. х. к. 7:6; 14:2; 26:18; Ыд. ыр. 134:4; Мал. 3:17. Бүгү чер-делегей Меңээ хамааржыр болгай#Хост. 9:29; Ы. х. к. 10:14, 6а силер Мээң бараалгакчыларымдан тургустунган онзагай күрүне база ыдыктыг чон болу бээр силер#Ы. х. к. 14:21; Иер. 2:3; 1 Пет. 2:5, 9; Ажыд. 1:6; 5:10; 20:6“. Израиль чонга дамчыдып чугаалаар сөстериң ол-дур».

7Моисей дагдан дүжүп келгеш, чоннуң шупту баштыңнарын кыйгырып алгаш, Дээрги-Чаяакчының чагып чугаалаан сөстерин дөгерезин дамчыдып берген. 8Бүгү чон чаңгыс үн-биле: «Дээрги-Чаяакчының биске чагаан бүгү чүүлдерин күүседир бис!» – деп харыылаан#Хост. 24:3.

9Дээрги-Чаяакчы Моисейге: «Мени дыңна, Мен сеңээ сырый булут иштинге чедип кээр мен, чон Мээң сээң-биле чугаалажып турарымны дыңнааш, сеңээ кезээ мөңгеде бүзүрей бээр» – дээн. Моисей ынчан Дээрги-Чаяакчыга чоннуң сөстерин дамчыткан. 10Дээрги-Чаяакчы Моисейге мынча дээн: «Барып, чонну бөгүн болгаш даарта ыдыкта#Сан. 11:18. Олар хептерин чуп алзыннар; 11соңгузу хүн болур чүвеге белен болзуннар, чүге дээрге Мен ол хүн, бүгү чон көрүп турда, Синай дагже дүжүп кээр мен. 12А сен дагны долгандыр шыйыг шыйгаш, чонга: „Даг бажынче үнмеңер база ооң дөжээнге дегбеңер. Дагга дегген кижини өлүрүп каар ужурлуг“ – деп чугаала. 13Ол кижиге кым-даа холун дээспезин, ону даштар-биле соп каапсын азы согун-биле адып каапсын#Евр. 12:20. Мыйыс эдиски эде бээрге, мал-маган-даа, кижи-даа дагга дээр азы ынаар үнер болза, дириг үнмезин#19:13 Азы: «Мал-маган-даа, кижи-даа дагга дээр болза, дириг үнмезин. Чүгле мыйыс эдиски эде бээрге, улус дагже үнүп болур». ».

14Моисей даг бажындан дүжүп, чонга келгеш, ыдыктаашкын ёзулалын кылырга, улус хептерин чуп алган. 15Моисей чонга: «Соңгузу хүнге белен болуңар, кадайларыңарга дегбеңер» – деп чугаалаан.

16Шак ол хүн дүжүп кээрге, эртен диңмирээшкин диңмиреп, кызаңнаашкын кызаңнаан; даг кырынга сырый булут турупкан база эдиски ыыткыр эткен – турлаанга турган бүгү чон сүрээдей берген. 17Моисей чонну турлагжаан черинден Бурганга уткуштур үндүре бээрге, улус даг эдээнге туруп алган. 18А Дээрги-Чаяакчы Синай дагже отка бүргедипкен дүжүп келген, ол даг бүрүнү-биле ышталып эгелээн: ооң бажындан ыш, суугудан үнген ыш дег, дүргектелдир көдүрлүп, бүгү даг дыка күштүг сирилеп турган. 19Эдиски үнү оон-даа дыңзыг апарган. Моисей чүве чугаалаарга, Бурганның үнү аңаа харыылап турган. 20Дээрги-Чаяакчы Синай дагның бажынче дүжүп келгеш, Моисейни даг бажынче кый дээрге, ол ынаар үне берген.

21Дээрги-Чаяакчы Моисейге: «Дүшкеш, чон аразындан хөй улус өлбес кылдыр, Мени көөрү-биле чүткүп болбазын сагындыр#1 Хаан. 6:19. 22Менче чоокшулаар бараалгакчыларым безин боттарын ыдыктап алыр ужурлуг, оон башка оларны узуткап каар мен» – дээн#Лев. 10:1-3.

23Моисей Дээрги-Чаяакчыга: «Сээң сагындырганың ёзугаар дагны долгандыр шыйыг шыйгаш, ону ыдыктап каан бис, ынчангаш чон Синай дагже үнүп шыдавас» – деп чугаалаан.

24Дээрги-Чаяакчы аңаа: «Улусче дүже бер, оон Аарон-биле кады даг бажынче дедир үнүп кээр сен, а Бурганның бараалгакчылары болгаш чон Менче чүткүвезин, оон башка Меңээ узуткаттырып аарлар» – деп харыылаан. 25Моисей чонче дүжүп келгеш, ол бүгүнү дамчыдып чугаалаан.

Currently Selected:

Хосталыышкын 19: TUV

Highlight

Copy