Эге дөс 23

Сарраның өлгени болгаш ону орнукшутканы

1Сарра 127 чыл чурттаан. Ооң назыны ол хире болган-дыр. 2Сарра ханаан черде Кириат-Арбага (амгы үеде Хеврон деп адаар черге)#Иис. 14:15; Башт. 1:10 чок апаарга, Авраам келгеш, Сарраның ажыын ажып, ыглап-сыктап турган. 3Чок апарган кадайын чыттырып кааш, ол хет чондан: 4«Мен өскээртен келген даштыкы кижи-даа болзумза, меңээ кадайымны ажаап каар черден айтып берип көрүңерем» – деп дилээн.

5-6Хет чон Авраамга: «Дыңнап көрүңерем, дээргивис. Бистиң аравыста өндүр улуг ноян#23:5-6 Азы: «Бурганның шилип кааны ноян». силер. Бистиң эң-не дээре дээн черлеривистиң бирээзинге кадайыңарны орнукшудуп калыңар. Силерге бодувустуң орнукшудулга черивисти бээринден бистиң аравыста кым-даа ойталавас» – деп харыылаан.

7Авраам тус черниң чурттакчылары хет чонга мөгейип кааш, 8мынча дээн: «Бир эвес силер арыг сеткилиңерден мээң чок апарган кадайымны орнукшударын чөпшээреп турар болзуңарза, мени дыңнап көрүңерем. Мээң адымдан Цохарның оглу Эфрондан дилеп көрүңер, 9ол бодунуң чериниң кыдыында турар Махпела деп куйну орнукшудулга чери кылдыр долу өртээнге меңээ сатсын. Ол чер силерниң араңарда мээң хууда орнукшудулга черим болгай аан».

10Эфрон хет чоннуң аразынга тургаш, хоорайның төп шөлүнде турар бүгү чон дыңнап турда, Авраамга чугаалаан: 11«Дээргим, мени дыңнаңарам. Чонум көрүп турда, ол куйну-даа, бүгү шөлдү-даа кадайыңарны орнукшудар кылдыр силерге берип тур мен».

12Авраам тус черниң чонунга мөгейип кааш, 13чыылган чон дыңнап турда, Эфронга: «Мени шын билип көрүңерем, орнукшудулга чериниң өртээ кылдыр мөңгүннү ап аар болзуңарза, калган кижимни аңаа орнукшудуп каар мен» – дээн.

14Авраамга харыы кылдыр Эфрон: 15«Дыңнап көрүңерем, дээрги! Ол черниң үнези 400 шекел мөңгүн чүве болгай. Бис ийиге ол чүү боор ийик? Кадайыңарны аңаа орнукшудуп калыңар» – дээн. 16Авраам Эфронну дыңнааш, аңаа ооң чонунуң мурнунга адааны 400 шекел мөңгүннү санап берген. (Шекелдиң деңзизин тус черниң садыгжыларының үнелээриниң аайы-биле тодараткан.)

17Мамрениң дужунда Махпелада Эфроннуң шөлү, ында куй, ында ыяш-даш – ол бүгү чер 18чыылган хет чон көрүп турда-ла, Авраамның өнчүзү апарган. 19Шак ынчалдыр Авраам бодунуң кадайы Сарраны ханаан черде, Мамрениң дужунда Махпела шөлүнде куйга орнукшудуп каан. (Амгы үеде ол черни Хеврон дээр.) 20Ындыг янзылыг Авраамга орнукшудулга чери болур шөл биле куй өнчү кылдыр хет чондан дамчып келген чүве-дир.

Currently Selected:

Эге дөс 23: TUV

Highlight

Copy