Эге дөс 39

Иосиф биле Потифарның кадайы

1А Иосифти Египетке измаил садыгжыларның холундан фараоннуң камгалакчыларының даргазы Потифар дээр египет кижи садып алган#Э. д. 37:36. 2Дээрги-Чаяакчы Иосифти кагбайн, кады чораан: ооң ажыл-херээ чогумчалыг бооп, бодунуң египет ээзиниң бажыңында чурттап турган. 3Дээрги-Чаяакчы Иосиф-биле кады дээрзин, ол чүнү-даа кылырга, чоруу чогунгур, херээ бүдүнгүр болур кылдыр Дээрги-Чаяакчы чогудуп турар дээрзин ээзи билип каан. 4Иосиф ээзиниң ээ көрнүүшкүнүн чаалап алгаш, аңаа бараан болуп турган. Потифар Иосифке бажыңының ажыл-херээн башкарар долу эргени берип каан. 5Бажыңының ажыл-херээн башкарар кылып каан үеден эгелеп, Дээрги-Чаяакчы Иосифти бодааш, ол египет кижиниң бажыңынга ачы-буянны хайырлап, ооң бажыңында-даа, хову-шөлүнде-даа шупту өнчүзүн карактап турган. 6Чүзү барыл, шуптузун Потифар Иосифке хүлээдип каан. Ооң ам сагыш човаар чаңгыс-ла чүвези – аштанып-чемненири болу берген.

Иосифтиң арын-шырайы-даа, дурт-сыны-даа дыка көрүштүг турган. 7Элээн үе эрткенде, ээзиниң кадайы ол бүгүнү эскерип кааш: «Мээң-биле удуп көрем» – дээн. 8Иосиф оон ойталааш, ээзиниң кадайынга: «Мээң дээргим бодунга хамааржыр бүгү-ле чүвезин меңээ дагзып кааш, бажыңында чүү дээш-даа боду сагыш човавайн турар-дыр. 9Бо бажыңда мен ооң-биле дең эргелиг чоруп турар-дыр мен. Чүгле силерге – мээң ээмниң кадайынга – дээринден аңгыда, мында меңээ чүнү-даа кылырын хоруваан-дыр. Мен ындыг улуг бачытты Бурганга удур канчап кылыр мен?» – дээн#Хост. 20:14. 10Хүннүң-не демги херээжен Иосифти ынчаар көгүдүп-ле турган, ынчалза-даа Иосиф ооң-биле кожа турарындан, ооң-биле холбажырындан ойталап турган.

11Бир хүн Иосиф ажыл-херек аайы-биле бажыңче кирип келген. Ол өйде бажыңга чалчалардан кым-даа чок турган чүве-дир. 12Ээзиниң кадайы Иосифтиң хевинден туттунупкаш: «Мээң-биле уду» – деп туруп берген. А Иосиф хевин ооң холунга арттырып каапкаш, үне халып чоруй барган. 13Иосиф хевин безин ооң холунда каапкаш, үне маңнап чоруй барганын көргеш, 14ээзиниң кадайы бажыңче улусту кыйгырыпкаш: «Көрүңер бо, бисти куду көрзүн дээш, Потифар бо еврей кижини бажыңывыста эккелген-дир. Ол чедип келгеш, меңээ „Чоокшулажыылы“ деп турду. Ынчангаш мен силерни алгырып кыйгырыптым. 15Мээң алгымны дыңнааш, ол бодунуң хевин мээң чанымга каапкаш, үне халып чорупту!» – дээн#Хост. 20:16. 16Ашаа келгижеге чедир, ол Иосифтиң хевин бодунга арттырып алган. 17Ашаа чедип кээрге, демги-ле сөстерин катаптаан: «Сээң биске эккелгениң еврей кул мени куду көөр деп турду. 18Кажан мен алгырып эгелээримге, ол хевин мээң чанымга каапкаш, үне халып чоруй барды».

19«Сээң кулуң мени ынчалды» дээн кадайының сөстерин дыңнааш, ээзи кедергей хорадаан. 20Иосифти ээзи туткаш, хаанның хоругдаттырганнарын сугар кара-бажыңче киир октапкан. Шак ынчалдыр Иосиф кара-бажыңче кире берген.

21Дээрги-Чаяакчы Иосиф-биле кады бооп, энерелин көргүзүп, кара-бажыңның даргазы олче ээ көрнүр кылдыр кылыпкан#Дан. 1:10. 22Кара-бажыңның даргазы хоругдаттырганнарны Иосифтиң холунга берипкен. Олар чүнү-ле кылырыл, дөгерезин Иосиф башкарып турган. 23Кара-бажыңның даргазы чүү дээш-даа сагыш човавас болу берген: Дээрги-Чаяакчы Иосиф-биле кады болгаш, ол чүнү-даа кылырга, шупту чүве чогуп бүдүп турган.

Currently Selected:

Эге дөс 39: TUV

Highlight

Copy