Эге дөс 40

Хоругдаттырганнарның дүштерин Иосифтиң тайылбырлааны

1-2Элээн үе эрткенде, египет хаанның кол кундага тудукчузу болгаш ооң кол чем салыкчызы боттарының дээргизиниң мурнунга буруу кылып алганнар. Фараон бодунуң бо дүжүметтеринге дыка ажынгаш, 3оларны камгалакчыларның даргазының бажыңынче чорудупкан. Ол болза Иосифтиң турган кара-бажыңы болур. 4Камгалакчыларның даргазы ол ийи дүжүметке бараан болур кылдыр Иосифти томуйлап каан. Олар элээн үени аңаа эрттиргеннер.

5Бир катап Египеттиң хаанының хоругдаттырган кундага тудукчузу#Неем. 1:11 биле чем салыкчызы олар чаңгыс дүне кайызы-даа онзагай уткалыг дүштер дүжээннер. 6Эртен эрте Иосиф оларга чедип келгеш көөрге, олары дүвүрээн шинчилиг болганнар. 7Ооң-биле кады хоругдал черинде турар бо дүжүметтерден ол: «Чүге бөгүн арыннарыңар муңгаргайыл?» – деп айтырган.

8Олар: «Бис дүштер дүжедивис, а оларның утказын тайылбырлап бээр кижи чок-тур» – дээннер.

Иосиф оларга: «Дүштүң тайылбыры Бургандан кээр эвес бе?#Дан. 2:28 Меңээ дүштериңерни чугаалап берип көрүңерем» – дээн.

9Кол кундага тудукчузу Иосифке бодунуң дүжүн чугаалап берген: «Дүжүмде мээң мурнумда виноград сывы тур-ла. 10Ол сып үш адырлыг. Ол часты берген, өң кирип келген, каттары улгадып, быжа берген болду. 11Холумда фараоннуң кундагазын тудуп алган турар мен. Мен каттарны алгаш, фараоннуң кундагазынче сы тудупкаш, ону фараонга берип турар-дыр мен».

12Иосиф аңаа мынча дээн: «Ол дүштүң утказы бо-дур: үш адыр дээрге үш хүн-дүр. 13Үшкү хүнде фараон сени өрү көдүрер – сени албан-хүлээлгеңче эгидер. Сен фараоннуң кундагазын, мооң мурнунда дег, ооң холунга тутсур сен. 14Кажан сеңээ шупту чүве таарымчалыг апаарга, мени сактып кел. Меңээ энерелден көргүзүп, фараонга мээң адымны сагындырып, мени моон үндүрүп аарын бодап көрем. 15Чүге дээрге еврейлерниң чуртундан мени оорлап эккелген болгай. А маңаа мени бажыңнаар хире кандыг-даа буруулуг чүве кылбаан мен».

16Кол чем салыкчызы көөрге, дүштү тайылбырлааны эки болган. Ынчангаш ол база Иосифке дүжүн чугаалап берген: «Мен мындыг дүш көрдүм. Бажымда быжырган далганныг үш тавак салып алган мен. 17Эң үстүкү тавакта фараоннуң янзы-бүрү быжырып каан чемин салып каан. А куштар мээң бажымда тавактан чем соктап чип турар болду».

18Иосиф аңаа мынча дээн: «Ооң утказы мындыг-дыр. Үш тавак дээрге үш хүн-дүр. 19Үшкү хүнде фараон сени „өрү көдүрер“ – сени шаажылал ыяжынга азып каар. А куштар сени соктап чиир-дир».

20Ийи хүн эрткенде, фараоннуң төрүттүнген хүнү болган#Мк. 6:21. Ол бодунуң бүгү дүжүметтеринге дой кылгаш, олар көрүп турда, кол кундага тудукчузун болгаш кол чем салыкчызын кара-бажыңдан үндүрүп эккээр деп шиитпирлээн. 21Кол кундага тудукчузун фараон эрги албан-хүлээлгезинче эгидип эккээрге, ол фараоннуң холунга кундагазын тудускан. 22А кол чем салыкчызын Иосифтиң тайылбырлааны дег кылдыр азып каан#Эсф. 7:10. 23Кол кундага тудукчузу Иосифтиң дугайын сагынмаан-даа, ооң дилээн-даа уттупкан.

Currently Selected:

Эге дөс 40: TUV

Highlight

Copy