Иоанн 4

Иисус болгаш Самария чурттуг херээжен

1Иисустуң, Иоаннга бодаарга, хөй өөреникчилер хаара тудуп база хөй улусту сугже суп турарын фарисейлер дыңнап каан. 2(Чогум Иисус Боду эвес, а Ооң өөреникчилери улусту сугже суп турган чүве-дир.)#Ин. 3:22 3Ынча деп турарын билип алгаш, Иисус Иудеяны каггаш, дедир Галилеяже чорупкан#Ин. 2:11-12. 4Ооң оруу Самарияның черин таварып эртер турган#Лк. 9:52-53.

5Ынчангаш Иисус Самарияның Сихар деп хоорайынче чеде берген. Ол хоорай шаг шаанда Иаковтуң бодунуң оглу Иосифке берген ээлел черинден ырак эвесте турар чүве-дир#Э. д. 33:19; 48:22. 6Ында Иаковтуң кудуу бар болган. Орукка могап-шылай берген Иисус кудук чанынга дыштанып олуруп алган. Хүн дүъш чедип турган.

7Самария чурттуг бир херээжен суг узуп алыр дээш чедип кээп-тир. Иисус аңаа: «Сууңдан Меңээ берем» – дээн. 8Ооң өөреникчилери чем садып алыр дээш, хоорайже чорупкан турган. 9Самарий херээжен Оон: «Сен иудей хиреңде, канчап самарий херээжен менден ижер суг дилээриң ол?» – деп айтырган. (Чүге дээрге иудейлер Самария чурттугларның ажыглаар савазын ажыглавас#4:9 Азы: «Иудейлер Самария чурттуглар-биле харылзашпас». турган.)

10Иисус: «Сен Бурганның бээр хайыразын база Кым сеңээ: „Сууңдан Меңээ берем“ – деп турарын билген болзуңза, бодуң-на Оон дилей бээр ийик сен, а Ол сеңээ амыдырал хайырлаар сугну бээр ийик#Ыд. ыр. 35:10; Иер. 2:13; 17:13» – деп харыылаан.

11Херээжен Аңаа мынча дээн: «Дээрги! Силерде суг узупку дег чүү-даа чок, а кудук ханы-дыр. Силерге ындыг суг кайыын кээр деп? 12Бо кудуктуң суун боду, ажы-төлү болгаш мал-маганы ижип чораан база ону биске арттырып каан кижи – бистиң өгбевис Иаков болгай. Таанда-ла Силер канчап оон арта берген болдуңар?»

13Иисус мынча деп харыылаан: «Бо сугну ижер кижи дагын суксай бээр. 14А Мээң аңаа бээрим сугну ижер кижи кажан-даа суксавас. Мээң аңаа бээр суум ооң иштинге мөңге амыдыралче агып баткан суг бажы болу бээр»#Иса. 55:1; Ин. 7:38.

15«Дээрги – деп, херээжен Аңаа чугаалаан. – Моон соңгаар кажан-даа суксавас база бээр суглап келбес апаар кылдыр, меңээ ол сууңардан берип көрүңерем».

16Иисус аңаа: «Ашааңны барып кый деп алгаш, бээр чедип кел» – дээн.

17Херээжен Аңаа: «Ашак чок мен» – деп харыылаан.

Иисус аңаа мынча дээн: «Ашаам чок деп, сен шынын чугааладың. 18Беш катап ашакка барган-дыр сен. А ам олуртуп алган кижиң сээң ашааң эвес-тир. Сээң ол чугааң ылап шын болду».

19Херээжен Аңаа мынча дээн: «Дээрги! Силерни Бурганның медээчизи дээрзин көрүп тур мен#Ин. 9:20. 20Бистиң ада-өгбевис бо дагга#Э. д. 12:6-7; 33:18; Ы. х. к. 11:29; 27:12; Башт. 9:7. Бурганга тейлеп чораан, а иудейлер силер болза, тейлээр чер чүгле Иерусалимде дээр-дир силер»#Ы. х. к. 12:5.

21Иисус аңаа мынча дээн: «Угбакым, Меңээ бүзүреп көр, Бурган Адага бо дагга-даа, Иерусалимге-даа мөгейип тейлевейн баарыңар үе кел чыдар-дыр. 22Силер, самарийжилер, чүү чүвеге тейлеп чорууруңарны билбес-тир силер#4 Хаан. 17:28-34, а иудейлер бис чүү чүвеге тейлеп чоруурувусту билир бис, чүге дээрге Бурганның камгалалы иудейлерни дамчыштыр кээр болгай#Ыд. ыр. 147:8-9; Аж.-ч. 13:23; Рим. 3:1-2. 23Ынчалза-даа ёзулуг мөгейикчилерниң Бурган Адага сүлде#Рим. 8:15; Эф. 6:18 болгаш алыс шындан#Ыд. ыр. 144:18 мөгейип тейлей бээри ындыг үе кел чыдар, мырыңай келгени бо-дур. Ылап-ла ындыг мөгейикчилерни Ада Бодунга дилеп чоруур. 24Бурган дээрге Сүлде-дир#2 Кор. 3:17. Ынчангаш Аңаа мөгейип тейлээннер сүлде болгаш алыс шындан мөгейип тейлээр ужурлуг».

25Херээжен Аңаа мынча дээн: «Мессия (Ону Христос деп база адаар)#Ин. 1:41 бо делегейге кээр ужурлуг деп билир-ле мен#Мф. 11:2. Ол чедип келгеш, биске шупту чүвени тайылбырлап бээр»#Ы. х. к. 18:18.

26«Ол – Мен-дир мен, сээң-биле чугаалажып турар аан» – деп, Иисус харыылаан#Ин. 9:37.

27Ол үеде Иисустуң өөреникчилери Ону каапкан черинче ээп келгеш, Ооң демги херээжен-биле чугаалажып турарын көргеш, кайгап калганнар. Ынчалза-даа кым-даа Иисустан Аңаа чүү херегин база Ооң чүге ол херээжен-биле чугаалажып турарын айтырбаан. 28Ынчан самарий херээжен суглаар савазын каапкаш, хоорайже ээп келгеш, улуска мынча дээн: 29«Кудукче баргаш, кылган бүгү чүүлүмнү меңээ чугаалап берген Кижиже көрүп көрүңерем: Ол Христос эвес ирги бе?» 30Ынчангаш улус хоорайдан үнгеш, Иисусче чорупканнар.

31Ол өйде өөреникчилери Иисустан: «Башкы, чемнениңер!» – деп дилеп турганнар.

32А Ол: «Мээң аъш-чемим бар, силер ооң дугайында билбес-тир силер» – деп харыылаан.

33Ынчаарга өөреникчилери аразында: «Өске-бир кижи Аңаа чем эккеп берген эвес ирги бе?» – дишкен.

34Иисус оларга мынча дээн: «Мээң аъш-чемим болза#Ы. х. к. 8:3 Мени айбылап чоруткан Адамның күзел-соруун боттандырып, Ооң Меңээ дааскан ажыл-херээн эчизинге чедир кылыры болур#Ин. 5:30; 6:38; 9:4; 14:31. 35„Ам дөрт ай эртсе, дүжүт ажаар үе кээр“ – деп чугаалашпас ийик силер бе? А мен силерге чугаалап тур мен: карактарыңарны хере көргеш, тараа шөлдеринче көрүңер даан, олар кайы хире алдын-сарыг апарып, тараазы бышкан-дыр!#Мф. 9:38; Лк. 10:2 36Тараа ажаакчызы бодунуң шаңналын алыр боорда, мөңге амыдыралга херек дүжүттү база ап турар, ындыг болганда, тараа чажыкчызы-даа, дүжүт ажаакчызы-даа деңге өөрүүр апаар#1 Кор. 3:6-9. 37Чүге дээрге ол таварылгада „Бирээзи тарыыр, өскези ажаар“ деп үлегер сөс бадыткаттына бээр. 38Мен силерни боттарыңарның ажаап-тарываан шөлүңерни ажаап алзын дээш чорудуп турарым бо – аңаа өске улус ажылдап каан, а силер оларның ажылының үре-түңнелин кады үлежип турарыңар бо».

39«Кылган бүгү чүүлүмнү Ол меңээ чугаалап берди» – деп бадыткаан самарий херээженниң чугаазының аайы-биле ол хоорайдан элээн хөй самарийжилер Иисуска бүзүрей берген. 40Самарийжилер Аңаа келгеш, олар-биле артып каарын Оон аажок дилээннер, ынчангаш Ол орта ийи хонган. 41Иисустуң чугаазының аайы-биле оон-даа хөй улус Аңаа бүзүрей берген.

42А демги херээженге олар мынча дээн: «Бистиң бүзүрей бергенивис ам чүгле сээң чугааларыңдан келбээн. Бис ам Ону боттарывыс дыңнаан болгаш, Ол ылап-ла бо делегейниң улузунуң Камгалакчызы-дыр деп билдивис»#Ин. 1:29; 1 Ин. 4:14.

Хаанның дүжүмединиң оглун экирткени

43Ийи хонганда, Иисус Галилеяже чорупкан. 44Бурганның медээчизи бодунуң төрээн чуртунга#4:44 Төрээн чурт – Иоанн мында Иудеяны ынча деп турары ол чадавас. алдар-хүндү көрбес дээрзин Ол Боду-ла чугаалап турган чүве-дир#Мф. 13:57; Мк. 6:4; Лк. 4:24. 45Иисус Галилеяга чедип кээрге, ол чер чурттуглар Ону эвилең-ээлдек уткуп-хүлээп алган: олар Иерусалимге болган байырлалга барып чораан болгаш, Ооң аңаа кылган кайгамчык чүүлдерин шуптузун көрген чүве-дир#Ин. 2:23.

46Иисус оон ооң мурнунда сугну арагаже хуулдурупкан чери болур Галилеяның Канаже#Ин. 2:1; 21:2 ээп келген. Ол үеде Капернаум хоорайга#Ин. 2:12 хаанның бир дүжүмеди турган, а ооң оглу аарый берген болган. 47Иисустуң Иудеядан Галилеяже ээп чанып келгенин дыңнааш, ол кижи Аңаа чедип келгеш: «Өлүп чыдар оглумну экиртип бээри-биле Капернаумче бадып кээп көрүңер» – деп Оон дилеп эгелээн.

48Иисус аңаа мынча дээн: «Кайгамчык демдектерни көрбээн шааңарда, силерниң кайыңар-даа бүзүрээр ийик бе!#Ин. 2:18; 6:30; 1 Кор. 1:22»

49Хаанның дүжүмеди: «Дээрги! Оглум өлбейн чыдырда, барып көрээли!» – дээн.

50Иисус: «Чана бер че, оглуң дириг артар-дыр» – деп харыылаан.

Ол кижи Иисустуң сөстеринге бүзүрээш, чоруй барган. 51Орук ара ону чалчалары уткуп алгаш: «Оглуңар дириг!» – дээннер.

52«Каш шак үезинде оглум чүгээртеп эгеледи?» – деп, ол чалчаларындан айтырган.

Олар аңаа: «Дүүн, хүн үнгенден бээр чедиги шак үезинде, ооң эъдиниң изии намдай берди» – деп харыылаан.

53Иисустуң аңаа: «Оглуң дириг артар-дыр» – дээн шагында оглу экирий берген дээрзин адазы билип каан#Мф. 8:13. Ынчан ол боду база бүгү өг-бүлези бүзүрей бергеннер#Аж.-ч. 16:34; 18:8. 54Иудеядан Галилеяже ээп чанып келгеш, Иисустуң кылганы ийиги кайгамчык чүүл ол болган#Ин. 2:11.

Currently Selected:

Иоанн 4: TUV

Highlight

Copy