Yauhas 5

Kev Kho Mob Ntawm Lub Pas Dej

1Tomqab ntawd, Yexus txawm mus rau saum lub nroog Yeluxalees uas yog mus koom cov Yudais ib qho kevcai. 2Nyob ze-ze ntawm lub Roojvag Yaj hauv lub nroog Yeluxalees muaj ib lub pas dej#5:2: Nyob ze-ze ntawm lub Roojvag Yaj … muaj ib lub pas dej; lossis Ze-ze ntawm lub Pas Dej Yaj … muaj ib qho chaw. uas muaj tsib lub tsev nraim tshav nyob puagncig lub pas dej; qhov chaw ntawd lus Henplais hu ua Npexathas.#5:2: Npexathas; tej phau ntawv qub uas xuas tes sau, muaj Npethexadas. 3Muaj ib co neeg mob coob-coob tuaj pw hauv tej tsev nraim tshav ntawd, xwsli cov digmuag, cov cegtawv, thiab cov tuagtes tuagtaw. 4#5:4: Tej phau ntawv qub uas xuas tes sau, ntxiv nqe 3b-4 no rau: Lawv tuaj nyob ntawd tos lub pas dej ntas. 4 Rauqhov nyob-nyob tus Tswv ib tug timtswv pheej nqis los rau hauv lub pas dej thiab do lub pas dej ntawd. Thaum dej ntas, leejtwg uas xub nqis mus rau hauv lub pas dej, txawm nws yuav mob yam mob twg los nws tej mob kuj zoo huv tibsi. 5Nyob rau ntawd, muaj ib tug txivneej uas mob tau pebcaug-yim xyoo lawm. 6Yexus pom nws pw ntawd, thiab Yexus paub tias tus txivneej ntawd twb mob tau ntev los lawm; yogli ntawd, Yexus thiaj nug nws hais tias, “Koj puas xav zoo?”

7Nws teb Yexus hais tias, “Tus Tswv, thaum dej ntas tsis muaj leejtwg pab tuav kuv mus rau hauv lub pas dej; thaum kuv tabtom yuav nqis mus, lwmtus twb xub nqis ua kuv ntej mus lawm.”

8Yexus hais rau nws tias, “Ciali sawvtsees, nqa koj daim lev thiab mus kev.” 9Tamsim ntawd, tus txivneej ntawd txawm ciali zoo kiag; nws txawm nqa hlo nws daim lev thiab pib mus kev lawm.

Hnub uas muaj tej xwm no yog hnub Xanpataus, 10yogli ntawd, cov Yudais tej nomtswv thiaj hais rau tus txivneej uas zoo mob ntawd hais tias, “Hnubno yog hnub Xanpataus, koj nqa koj daim lev taug kev mas txhaum peb txoj Kevcai lawm.” #Nehemi 13:19; Yelemi 17:21

11Nws teb lawv hais tias, “Tus neeg uas kho kuv zoo hais rau kuv kom kuv ciali nqa kuv daim lev thiab mus kev.”

12Lawv nug nws hais tias, “Tus txivneej twg yog tus uas hais kom koj ua li no?”

13Tiamsis tus txivneej uas zoo mob ntawd tsis paub tias Yexus yog leejtwg, rauqhov muaj neeg coob-coob nyob ntawd, thiab Yexus twb mus rau lwmqhov lawm.

14Tomqab ntawd, Yexus mus ntsib tus txivneej ntawd hauv lub Tuamtsev thiab hais rau nws tias, “Koj mloog Kuv hais, nimno koj twb zoo lawm; yogli ntawd, koj yuav tau tseg tsis txhob ua txhaum lawm, nyobtsam koj raug kev txomnyem heev dua qub.”

15Ces tus txivneej ntawd txawm tawm mus thiab qhia rau cov Yudais tej nomtswv paub tias tus uas kho nws zoo mob yog Yexus. 16Yogli ntawd, lawv txawm tuavhauv ua phem rau Yexus, vim Nws kho tus txivneej ntawd rau hnub Xanpataus. 17Yexus teb lawv hais tias, “Kuv Txiv yeej ua haujlwm tsis so li, yogli ntawd, Kuv yeej yuav ua ib yam nkaus thiab.”

18Qhov uas Yexus hais li no thiaj ua rau cov Yudais tej nomtswv yimhuab xav muab Yexus tua povtseg; tsis yog qhov uas Nws ua txhaum Hnub Xanpataus txoj kevcai xwb, tiamsis Nws tseem hais tias Vajtswv yog kiag Nws Txiv thiab, qhov ntawd yog suav tau hais tias Nws sibluag zos li Vajtswv.

Leejtub Lub Hwjchim

19Yexus teb lawv hais tias, “Kuv qhia tseeb rau nej hais tias, Leejtub yeej tsis lam ua ib yam dabtsi rawsli Nws lub siab; Nws tsuas ua rawsli tej uas Nws pom Nws Txiv ua nkaus xwb. Leejtxiv ua yam twg, Leejtub kuj yuav ua yam ntawd thiab. 20Rauqhov Leejtxiv hlub Leejtub thiab Nws yeej qhia ibpuas tsavyam uas Nws ua rau Leejtub pom. Nws tseem yuav qhia tej haujlwm uas loj dua tej no rau Leejtub pom, thiab tej ntawd tseem yuav ua rau nej hajyam xav tsis thoob. 21Leejtxiv tsa cov neeg uas tuag lawm sawv rovqab los tau txojsia licas, ces Leejtub xav pub txojsia rau leejtwg los yeej tau ib yam nkaus li ntawd. 22Leejtxiv tsis txiavtxim rau leejtwg, tiamsis Nws tsa Nws Leejtub ua tus muaj cai txiavtxim puvntoob, 23kom txhua tus thiaj hwm Leejtub ib yam li lawv hwm Leejtxiv. Tus uas tsis hwm Leejtub, tus ntawd yeej tsis hwm Leejtxiv, tus uas txib Leejtub los thiab.

24“Kuv qhia tseeb rau nej tias, tus uas mloog Kuv tej lus thiab ntseeg tus uas txib Kuv los, tus ntawd thiaj tau txojsia ntev dhawv mus ibtxhis. Nws yuav tsis raug txiavtxim, tiamsis nws twb hla dhau txoj kev tuag mus tau txojsia lawm. 25Kuv qhia tseeb rau nej hais tias, lub sijhawm tabtom los thiab twb los txog lawm, cov neeg uas tuag lawm yuav hnov Vajtswv tus Tub lub suab, thiab txhua tus uas hnov yuav ciajsia rovqab los. 26Leejtxiv tuskheej yog lub hauvpaus txojsia licas, Nws tsa Nws Leejtub ua lub hauvpaus txojsia ib yam nkaus li ntawd. 27Thiab Leejtxiv tsa Leejtub ua tus muaj cai txiavtxim, rauqhov Nws yog Neeg Leejtub.

28“Nej tsis txhob xav tsis thoob rau Kuv tej lus no; rauqhov lub sijhawm tabtom los, thaum ntawd cov neeg uas tuag lawm yuav hnov Leejtub lub suab, 29lawv yuav tawm hauv lawv tej qhovntxa los: cov neeg uas ua zoo yuav sawv rov los tau txojsia, thiab cov neeg uas ua phem yuav sawv rov los raug kev txiavtxim. #Dani 12:2

Ua Timkhawv Txog Yexus

30“Kuv ua tsis tau ib yam dabtsi rawsli Kuv lub siab xav; Kuv tsuas txiavtxim rawsli Vajtswv qhia rau Kuv xwb, yogli ntawd, Kuv yeej txiavtxim ncajncees, rauqhov Kuv tsis ua rawsli Kuv lub siab nyiam, tiamsis Kuv tsuas ua rawsli tus uas txib Kuv los lub siab nyiam xwb.

31“Yog Kuv rov ua timkhawv rau Kuv, ces Kuv tej lus yeej tsis tseeb. 32Tiamsis yeej muaj ib tug ua timkhawv rau Kuv, thiab Kuv paub tias tej lus timkhawv uas nws ua rau Kuv ntawd yeej yog lus tseeb xwb. 33Nej txib neeg mus cuag Yauhas, thiab Yauhas yeej ua timkhawv hais tias tej lus uas Kuv hais puavleej tseeb. #Yauh 1:19-27; 3:27-30 34Tsis yog Kuv xav kom neeg ua Kuv tus timkhawv, tiamsis Kuv hais li no kom nej thiaj yuav dim tau nej lub txim.

35“Yauhas zooli lub teeb uas taws cig thiab pomkev lamlug, ua rau nej txaussiab tau ib nyuag ntu thaum uas nej nyob hauv qhov kaj ntawd. 36Tiamsis Kuv muaj ib tug ua timkhawv rau Kuv uas tseem loj dua Yauhas tej lus timkhawv ntawd thiab: tej uas Kuv ua, yog tej haujlwm uas Leejtxiv muab rau Kuv ua, tej no ua timkhawv rau Kuv thiab qhia tau hais tias Leejtxiv yog tus uas txib Kuv los. 37Thiab Leejtxiv tus uas txib Kuv los, Nws yeej ua timkhawv rau Kuv ib yam nkaus. Nej yeej ibtxwm tsis tau hnov Nws lub suab lossis pom Nws lub ntsejmuag, #Math 3:17; Malak 1:11; Lukas 3:22 38thiab nej yeej tsis khaws Nws tej lus cia rau nruabsiab, vim nej tsis ntseeg tus uas Nws txib los.

39“Nej mobsiab kawm Vajtswv tej Lus, vim nej xav tias nyob hauv Txojlus ntawd nej yuav nrhiav tau txojsia ntev dhawv mus ibtxhis; Vajtswv tej Lus ntawd twb yog hais txog Kuv ntag! 40Tiamsis nej ho tsis kam los cuag Kuv kom nej tau txojsia.

41“Kuv tsis ntshaw neeg tej kev qhuas. 42Tiamsis Kuv paub tias nej yog cov neeg zoo licas thiab Kuv paub tias nej yeej tsis muaj lub siab hlub Vajtswv hlo li. 43Kuv los ntawm Kuv Txiv lub npe, los nej yeej tsis lees yuav Kuv; tiamsis thaum muaj dua lwmtus uas nws los ntawm nws tuskheej xwb, nej ho lees yuav nws. 44Nej ntshaw kom lwmtus qhuas nej kawg li, tiamsis nej ho tsis ntshaw kom tus uas yog Vajtswv qhuas nej; yogli ntawd, nej yuav ua licas ntseeg Kuv? 45Nej tsis txhob xav tias Kuv yog tus uas yuav kom nej rau Kuv Leejtxiv. Mauxes, tus uas nej ciasiab rau, yog tus uas yuav kom nej. 46Yog nej yeej ntseeg Mauxes tej lus tiag, nej yeej yuav ntseeg Kuv, rauqhov Mauxes tau sau hais txog Kuv. 47Tiamsis nej twb tsis ntseeg tej lus uas Mauxes sau li, nej yuav ua licas ntseeg tej lus uas Kuv hais?”

Currently Selected:

Yauhas 5: MWW2022

Highlight

Copy