Yauhas 6

Yexus Pub Mov Rau 5,000 Leej Noj

(Mathais 14:13-21; Malakaus 6:30-44; Lukas 9:1-17)

1Tomqab ntawd, Yexus caij nkoj hla Hiavtxwv Kalilais mus rau sab tim ub (lossis muaj dua ib lub npe hu ua Tinpelias). 2Muaj neeg coob-coob raws Yexus qab mus, vim lawv pom tej txujci tseemceeb uas Nws kho tau tej neeg muaj mob zoo. 3Yexus mus rau saum roob thiab nrog Nws cov thwjtim nyob uake. 4Thaum ntawd, ze lub caij uas cov Yudais ua kevcai Hla Dhau. 5Yexus tsa qhovmuag saib thiab pom neeg coob-coob tabtom tuaj cuag Nws, Nws thiaj nug Filiv hais tias, “Peb yuav mus yuav mov qhovtwg thiajli txaus cov neeg no noj?” ( 6Yexus hais li no, yog Nws sim Filiv siab; tseeb tiag, Nws twb paub lawm hais tias, Nws yuav ua licas.)

7Filiv teb tias, “Txawm yog muab 200 tawm lub npib nyiaj#6:7: lub npib nyiaj: ib tug neeg ua haujlwm, ib hnub tsuas tau ib npib nyiaj xwb (saib Math 20:2). Phau Kilis sau hais tias 200 tawm denalis. mus yuav mov los ntshe ib leeg tsuas tau me-me xwb.”

8Yexus cov thwjtim muaj ib tug uas yog Asnrus, nws yog Ximoos Petus tus kwv, nws hais tias, 9“Muaj ib tug menyuam tub no, nws muaj tsib lub ncuav thiab ob tug ntses. Tiamsis yeej yuav tsis txaus cov neeg no noj.”

10Yexus hais tias, “Nej hais kom sawvdaws zaum.” (Thaj chaw ntawd muaj-muaj nyom.) Yogli ntawd, sawvdaws txawm zaum; cov txivneej uas nyob ntawd muaj kwvlam li 5,000 leej. 11Yexus muab cov ncuav ntawd los ua Vajtswv tsaug, thiab muab coj mus faib rau cov neeg uas zaum ntawd. Nws muab ob tug ntses los ua ib yam nkaus li ntawd thiab, lawv txhua tus tau noj tsau npaum li tsau tau. 12Thaum lawv noj tsau lawm, Yexus hais rau Nws cov thwjtim hais tias, “Nej mus sau tej uas sawvdaws noj seem, tsis txhob cia ib qho xuam li.” 13Yogli ntawd, lawv thiaj mus sau tagnrho tej uas sawvdaws noj tsis tas ntawm tsib lub ncuav ntawd tau kaum-ob tawb puvnkaus.

14Thaum sawvdaws pom Yexus ua zaj txujci tseemceeb no, lawv hais tias, “Tus no lau, yog tus xibhwb cev Vajtswv lus#6:14: tus xibhwb cev Vajtswv lus: saib 1:21. uas nqis los rau hauv ntiajteb no tiag!” 15Yexus paub tias lawv tabtom yuav tuaj muab Nws yuam tsa ua vajntxwv; yogli ntawd, Nws tibleeg thiaj mus rau saum roob lawm.

Yexus Mus Saum Nplaimdej

(Mathais 14:22-33; Malakaus 6:45-52)

16Thaum yuav tsausntuj, Yexus cov thwjtim nqis mus rau nram hiavtxwv, 17lawv nce rau hauv nkoj, thiab hla hiavtxwv rov mus rau tim lub nroog Kapena-us. Twb tsausntuj lawm tiamsis Yexus tseem tsis tau los rau ntawm lawv. 18Thaum ntawd txawm muaj cuadaj cuadub ntsawj ua rau dej ntas heev kawg li. 19Cov thwjtim twb nquam lub nkoj mus deb kwvlam li 5 lossis 6 kilumev lawm, lawv txawm pom Yexus mus kotaw saum nplaimdej los ze zujzus rau ntawm lawv lub nkoj, lawv ntshai kawg li. 20Yexus hais rau lawv tias, “Tsis txhob ntshai, yog Kuv xwb!” 21Lawv thiaj zoosiab hlo cia Yexus los rau hauv lub nkoj, tamsim ntawd lub nkoj txawm mus txog ntua ntawm ntug, qhov chaw uas lawv yuav mus.

Neeg Nrhiav Yexus

22Hnub tomqab cov neeg coob-coob uas nyob sab ntug hiavtxwv qub qab tim ub pom tias tsuas muaj tiblub nkoj nyob ntawd xwb. Lawv pom tias Yexus yeej tsis tau nrog Nws cov thwjtim caij lub nkoj ntawd mus, tsuas yog cov thwjtim thiaj caij nkoj mus lawm xwb. 23Muaj dua ib co nkoj tuaj tim lub nroog Tinpelias tuaj nres ze rau ntawm qhov chaw uas Yexus muab ncuav los ua Vajtswv tsaug thiab muab ntais faib rau sawvdaws noj. 24Thaum cov neeg coob-coob ntawd pom tias Yexus thiab Nws cov thwjtim tsis nyob ntawd lawm, lawv txawm nce rau hauv cov nkoj ntawd thiab caij mus nrhiav Yexus rau tim lub nroog Kapena-us.

Yexus Yog Cov Mov Uas Cawm Txojsia

25Thaum cov neeg ntawd mus nrhiav tau Yexus sab hiavtxwv tim ub lawm, lawv hais rau Nws hais tias, “Xibhwb, thaum twg Koj twb tuaj txog ntawm no lawm?”

26Yexus teb tias, “Kuv qhia tseeb rau nej hais tias, nej tuaj nrhiav Kuv, tsis yog vim nej totaub txog tej txujci tseemceeb uas Kuv ua, tiamsis vim nej tau noj mov tsau xwb. 27Nej tsis txhob nrhiav tej mov uas txawj lwj; tiamsis nej yuavtsum nrhiav tej mov uas yuav kav nej txojsia mus ibtxhis. No yog cov mov uas Neeg Leejtub yuav muab rau nej, rauqhov Vajtswv tus uas yog Leejtxiv twb nias homthawj tsocai rau Nws lawm.”

28Lawv nug Yexus hais tias, “Peb yuav ua licas thiaj ua tau tej haujlwm uas Vajtswv xav kom peb ua?”

29Yexus teb tias, “Vajtswv tej haujlwm yogli no: Nws xav kom nej ntseeg tus uas Nws txib los.”

30Lawv teb tias, “Koj yuav ua yam txujci tseemceeb twg rau peb pom es peb thiaj yuav ntseeg Koj? Koj yuav ua dabtsi? 31Peb cov yawgkoob noj manas tom tiaj suabpuam rawsli Vajtswv Txojlus hais tias, ‘Nws muab mov saum ntuj los rau lawv noj.’ ” #Khiav 16:4, 15; Nnkauj 78:24

32Yexus hais tias, “Kuv qhia tseeb rau nej hais tias, Mauxes tsis yog tus uas muab cov mov uas los saum ntuj los rau nej; tiamsis Kuv Txiv yog tus uas muab cov tseem mov uas los saum ntuj los rau nej. 33Rauqhov cov mov uas Vajtswv muab yog tus uas los saum ntuj los thiab muab tau txojsia rau neeg ntiajteb.”

34Lawv thov Yexus hais tias, “Tus Tswv, thov Koj muab cov mov ntawd rau peb noj mus li.”

35Yexus qhia rau lawv hais tias, “Kuv yog cov mov uas cawm txojsia. Tus uas los cuag Kuv, tus ntawd yuav tsis tshaib plab ib zaug li; tus uas ntseeg Kuv, tus ntawd yuav tsis nqhis dej ib zaug li. 36Kuv hais rau nej tias, nimno nej twb pom Kuv lawm, tiamsis nej tsis ntseeg Kuv. 37Txhua tus uas Kuv Txiv muab rau Kuv, yeej yuav los cuag Kuv. Txhua tus uas los cuag Kuv, Kuv yeej yuav tsis muab lawv ntiab tawm, 38rauqhov Kuv los saum ntuj los tsis yog los ua rawsli Kuv lub siab nyiam, tiamsis yog los ua rawsli tus uas txib Kuv los lub siab nyiam. 39Tus uas txib Kuv los lub siab nyiam yog kom Kuv saib cov neeg uas Nws muab rau Kuv lawm, tsis txhob cia ib tug twg ploj li, tiamsis kom thaum txog hnub kawg Kuv yuavtsum tsa lawv txhua tus sawv los tau txojsia. 40Qhov uas Kuv Txiv xav tau yog kom txhua tus uas pom Leejtub thiab ntseeg Nws tau txojsia ntev dhawv mus ibtxhis. Thiab kom thaum txog hnub kawg Kuv yuav tsa lawv sawv los tau txojsia.”

41Ces cov Yudais txawm yws Yexus, rauqhov Nws hais tias, “Kuv yog cov mov uas los saum ntuj los.” 42Yogli ntawd, lawv thiaj hais tias, “Tus txivneej no tsis yog Yauxej tus tub Yexus lov? Peb yeej paub Nws niam Nws txiv huv tibsi. Ua licas tamsim no Nws ho yuav hais tias Nws los saum ntuj los?”

43Yexus teb rau lawv tias, “Nej tsis txhob yws-yws lawm. 44Neeg yeej tsis muaj peevxwm los cuag tau Kuv, tsuas yog Leejtxiv tus uas txib Kuv los, thiaj coj tau lawv los cuag Kuv xwb; thiab thaum txog hnub kawg Kuv yuav tsa lawv sawv los tau txojsia. 45Cov xibhwb cev Vajtswv lus sau tseg hais tias, ‘Vajtswv yuav qhia txhua tus huv tibsi.’ Txhua tus uas hnov Leejtxiv tej lus thiab kawm ntawm Nws yeej los cuag Kuv. #Yaxaya 54:13 46Qhov no tsis txhais hais tias txhua tus twb pom Leejtxiv lawm; tsuas yog tus uas Vajtswv txib los, Nws tibleeg xwb thiajli pom Leejtxiv lawm.

47“Kuv qhia tseeb rau nej hais tias tus uas ntseeg Kuv, tus ntawd twb tau txojsia ntev dhawv mus ibtxhis lawm. 48Kuv yog cov mov uas cawm txojsia. 49Txawm yog nej cov yawgkoob tau noj manas tom tiaj suabpuam los lawv twb tuag tas lawm. 50Tiamsis no yog cov mov uas los saum ntuj los, tus uas tau noj cov mov no yuav tsis tuag. 51Kuv yog cov mov cawm txojsia uas los saum ntuj los. Tus uas noj cov mov no yuav tau txojsia ntev dhawv mus ibtxhis. Cov mov uas Kuv muab no yog Kuv cev nqaij, uas yuav muab cawm neeg txojsia ntag.”

52Ces cov Yudais txawm sibcav npautaws vog hais tias, “Tus txivneej no yuav ua licas muab tau Nws cev nqaij rau peb noj?”

53Yexus hais rau lawv tias, “Kuv qhia tseeb rau nej hais tias, yog nej tsis noj Neeg Leejtub cev nqaij thiab tsis haus Nws cov ntshav, ces nej yuav tsis muaj txojsia nyob rau hauv nej tuskheej. 54Tus uas noj Kuv cev nqaij thiab haus Kuv cov ntshav, tus ntawd tau txojsia ntev dhawv mus ibtxhis, thiab thaum txog hnub kawg Kuv yuav tsa nws sawv los tau txojsia. 55Kuv cev nqaij thiaj yog tseem mov; thiab Kuv cov ntshav yog tseem dej. 56Tus uas noj Kuv cev nqaij thiab haus Kuv cov ntshav, tus ntawd nrog Kuv koom ib txojsia, thiab Kuv nrog nws koom ib txojsia. 57Leejtxiv tus uas muaj txojsia ua tus txib Kuv los, Kuv muaj txojsia twb yog vim muaj Nws. Ib yam nkaus li ntawd, tus uas noj Kuv cev nqaij tus ntawd yuav muaj txojsia, vim Kuv yog tus muaj txojsia. 58Cov mov no lau, yog cov mov uas los saum ntuj los; cov mov no tsis zooli cov mov uas nej cov yawgkoob noj, thiab tomqab ntawd lawv tuag tag lawm. Tus uas noj cov mov no yuav tau txojsia ntev dhawv mus ibtxhis.”

59Yexus hais cov lus no yog thaum Nws qhia hauv lub tsev sablaj uas nyob hauv lub nroog Kapena-us.

Tej Lus Uas Muaj Txojsia Mus Ibtxhis

60Thaum Yexus cov thwjtim coob leej hnov tej lus uas Nws qhia ntawd, lawv hais tias, “Cov lus qhia no nyuaj kawg li. Leejtwg thiaj yuav totaub?”

61Txawm tsis muaj leejtwg hais, los Yexus paub tias lawv yws txog tej lus uas Nws hais, Nws thiaj hais rau lawv tias, “Tej lus uas Kuv hais no ua rau nej xav tso txoj kev ntseeg tseg lov? 62Pivxam hais tias nej pom Neeg Leejtub rovqab mus nyob saum qhov chaw uas Nws ibtxwm nyob los lawm, nej ho yuav xav licas? 63Vajtswv tus Ntsujplig ua tau rau neeg muaj sia; tiamsis neeg nqaijtawv ua tsis tau li ntawd. Tej lus uas Kuv qhia rau nej ntawd yog Ntsujplig thiab yog txojsia. 64Tiamsis nej cov muaj qeeleej tsis ntseeg Kuv tej lus.” (Yexus hais li ntawd, rauqhov thaum chivthawj Nws twb xub paub lawm hais tias, tus twg yog tus tsis ntseeg thiab tus twg yog tus uas yuav ntxeevsiab rau Nws.) 65Thiab Yexus hais ntxiv tias “Twb yog vimli no Kuv thiaj hais rau nej hais tias, yeej tsis muaj leejtwg los cuag tau Kuv, tsuas yog tus uas Leejtxiv tsocai xwb.”

66Vimli ntawd, cov neeg uas raws Yexus qab muaj coob leej thiaj tso Yexus tseg, thiab tsis nrog Nws mus lawm. 67Yogli, Yexus thiaj nug Nws kaum-ob tug thwjtim hais tias, “Nej ne, nej xav tso Kuv tseg thiab lov?”

68Ximoos Petus teb Yexus hais tias, “Tus Tswv, peb yuav mus nrhiav leejtwg? Tsuas yog Koj tej lus xwb thiaj pub tau txojsia ibtxhis. #Math 16:16; Malak 8:29; Lukas 9:20 69Nimno peb ntseeg thiab paub tseeb hais tias Koj yog tus Dawbhuv uas los ntawm Vajtswv los.”

70Yexus teb lawv hais tias, “Puas yog Kuv xaiv nej kaum-ob leeg no? Txawm li ntawd los nej cov ko muaj ib tug yog dab ntxwgnyoog!” 71Yexus hais li ntawd, yog Nws hais txog Yudas uas yog Ximoos Ixakali-aus tus tub. Txawm yog Yudas yog ib tug ntawm kaum-ob tug thwjtim los nws tseem ntxeevsiab rau Yexus thiab.

Currently Selected:

Yauhas 6: MWW2022

Highlight

Copy