Lukas 1

Lus Tawqhia

1Hwm txog The-aufilaus:

Twb muaj ntau leej sau txog tej uas tshwmsim nyob rau hauv peb, 2rawsli uas lawv tau pom tej ntawd thaum nyuamqhuav chiv lub keeb los, thiab lawv yog cov uas qhia tej lus ntawd rau peb paub. 3Kuv twb ua tibzoo sojntsuam txhua yam ntawd pib tom hauvpaus los lawm. Yogli ntawd, The-aufilaus, tus uas kuv hwm, cia kuv ua tibzoo sau tej no kom txhij-txhua tuaj rau koj, 4kom koj thiaj yuav paub tseeb txog txhua zaj uas koj tau kawm los lawm.

Qhia Txog Kev Yug Yauhas Tus Uas Muab Neeg Ua Kevcai Rausdej

5Lub sijhawm uas Helauj ua vajntxwv kav lub xeev Yudas,#1:5: Yudas: Lolus no siv hais tagnrho rau lub tebchaws Palexatees. muaj ib tug povthawj hlob hu ua Xekhaliyas, nws yog Anpiyas pab povthawj hlob. Nws tus pojniam hu ua Elixanpev, uas yog Aloos cajces. #1Xwm 24:10 6Nkawd puavleej ua lub neej ncajncees tabmeeg Vajtswv, mloog Vajtswv lus thiab ua rawsli tus Tswv txoj kevcai txhua nqe, uas yeej tsis muaj leejtwg yuav thuam tau. 7Nkawd tsis muaj menyuam, rauqhov Elixanpev yeej ibtxwm xeeb tsis taus menyuam, thiab nkawd los kuj laus-laus lawm.

8Muaj ib hnub Xekhaliyas tabtom ua nws tes haujlwm li ib tug povthawj hlob nyob rau hauv lub Tuamtsev vim hnub ntawd yog raug rau nws hnub. 9Rawsli cov povthawj hlob txoj kevcai, lawv rho ntawv tau Xekhaliyas ua tus mus hlawv hmoov tshuaj tswqab rau saum lub thaj. Yogli ntawd, nws thiaj mus rau hauv Vajtswv lub Tuamtsev. 10Thaum txog lub sijhawm hlawv hmoov tshuaj tswqab, ces cov neeg uas nyob sabnraud sawvdaws kuj uake thov Vajtswv. 11Thaum ntawd tus Tswv ib tug timtswv txawm los tshwm rau Xekhaliyas, nws los sawv ntawm lub thaj uas hlawv hmoov tshuaj tswqab sab xis.

12Thaum Xekhaliyas pom dheev tus timtswv ntawd, nws poobsiab thiab ntshai kawg li. 13Tiamsis tus timtswv hais rau nws hais tias, “Xekhaliyas, koj tsis txhob ntshai! Vajtswv twb hnov koj tej lus thov lawm. Koj tus pojniam uas yog Elixanpev yuav yug ib tug metub rau koj. Koj yuav tau tis nws lub npe hu ua Yauhas. 14Koj yuav zoosiab kawg li thiab yuav muaj ntau leej nrog koj zoosiab thaum yug tau nws los lawm! 15Nws yuav yog ib tug neeg uas tseemceeb heev rau ntawm Vajtswv. Nws yuavtsum tsis txhob haus cawv txivhmab lossis cawv hlo li. Nws yuav puvnpo Vaj Ntsujplig tus Dawbhuv txij thaum nruabthiab los, #Teev 6:3 16thiab nws yuav coj cov neeg Yixalayees coob leej rov los cuag tus Tswv uas yog lawv tus Vajtswv. 17Nws yuav ua tus Tswv ntej, khovkho thiab muaj hwjchim ib yam li Eliyas, uas yog tus xibhwb cev Vajtswv lus. Nws yuav tig cov ua txiv lub siab rov los npuab cov menyuam, thiab coj cov neeg tawv ncauj rov los ua lub neej ncajncees; thiab npaj kom tau ib cov neeg tos tus Tswv.” #Mlakis 4:5-6

18Xekhaliyas nug tus timtswv ntawd hais tias, “Kuv yuav ua licas paub tias yuav muaj li tej uas koj hais ko? Kuv twb laus heev lawm thiab kuv tus pojniam los kuj laus lawm.”

19Tus timtswv teb tias, “Kuv yog Khali-ees, kuv sawv ntawm Vajtswv xubntiag, Vajtswv txib kuv los qhia txoj xov zoo no rau koj. #Dani 8:16; 9:21 20Thaum txog lub sijhawm lawm yeej yuav muaj rawsli tej uas kuv hais no, tiamsis vim koj tsis ntseeg kuv tej lus, koj yuav hais tsis tau lus mus txog hnub uas muaj tseeb rawsli tej uas kuv tau hais rau koj lawm.”

21Lub sijhawm ntawd cov neeg tseem nyob sabnraud tos Xekhaliyas, thiab lawv pheej xav tsis thoob hais tias uacas Xekhaliyas yuav nyob hauv lub Tuamtsev ntev ualuaj li. 22Thaum nws tawm los, nws txawm hais tsis tau lus rau lawv lawm. Lawv paub tias yeej yog nws pom ib yam dabtsi tshwmsim nyob rau hauv lub Tuamtsev lawm xwb, rauqhov nws hais tsis tau lus tiamsis nws pheej piav tes rau lawv xwb.

23Thaum Xekhaliyas ua haujlwm hauv lub Tuamtsev tas lawm, nws thiaj rovqab mus tsev. 24Tomqab ntawd tsis ntev, Elixanpev uas yog nws tus pojniam txawm xeeb menyuam, Elixanpev thiaj nyob hauv tsev tau tsib lub hlis, tsis tawm mus qhovtwg li. 25Elixanpev hais tias, “Nimno tus Tswv pab kuv, Nws ua rau kuv tsis poob ntsejmuag rau leejtwg li lawm!”

Qhia Txog Kev Yug Yexus

26Thaum Elixanpev xeeb menyuam tau rau lub hlis lawm, Vajtswv txib Nws tus timtswv ceebtsheej Khali-ees los rau hauv lub nroog Naxalev uas nyob hauv lub xeev Kalilais. 27Tus timtswv ntawd los cuag ib tug nkaujxwb hu ua Malis, uas Yauxej twb qhaib cia lawm. Yauxej yog vajntxwv Daviv li cajces. #Math 1:18 28Tus timtswv los hais rau Malis tias, “Thov kom koj tau nyob kajsiab lug! Tus TSWV nrognraim koj thiab foom koobhmoov ntau kawg rau koj lawm.”

29Thaum Malis hnov tus timtswv hais li ntawd, nws nyuajsiab heev, nws xav tias xyov qhov uas tus timtswv hais ntawd, yog hais txog dabtsi. 30Tus timtswv hais rau Malis tias, “Malis, koj tsis txhob ntshai, koj yog tus uas Vajtswv tau xaiv lawm. 31Koj yuav xeeb menyuam thiab yuav yug tau ib tug Metub, thiab koj yuav tau muab Nws tis npe hu ua Yexus. #Math 1:21 32Nws yuav ua tus loj thiab sawvdaws yuav hu hais tias Nws yog Vajtswv tus uas muaj Hwjchim Tshajplaws tus Tub. Tus Tswv uas yog Vajtswv yuav tsa Nws ua vajntxwv, ib yam li Nws yawgkoob Daviv, #2Xamu 7:12, 13, 16; Yaxaya 9:7 33Nws yuav ua vajntxwv kav Yakhauj li cajces mus ibtxhis; thiab Nws lub tebchaws yuav nyob mus tsis paub kawg li!”

34Malis hais rau tus timtswv tias, “Kuv tseem yog ib tug nkaujxwb, yuav ua licas muaj tau li ntawd?”

35Tus timtswv teb tias, “Vaj Ntsujplig tus Dawbhuv yuav los rau saum koj, thiab Vajtswv tus uas muaj Hwjchim Loj Kawg Nkaus lub hwjchim yuav roos koj. Vimli no thiaj yuav hu tus Metub dawbhuv uas yuav yug los ntawd hais tias Vajtswv tus Tub. 36Koj saib koj tus phauj Elixanpev uas sawvdaws hais tias nws xeeb tsis taus menyuam seb, txawm yog nws laus-laus lawm los nimno nws twb xeeb menyuam tau rau lub hlis lawm. 37Rauqhov yeej tsis muaj ib yam dabtsi uas Vajtswv yuav ua tsis tau li.” #Chiv 18:14

38Malis hais tias, “Kuv yog Vajtswv tus ntxhais qhev, thov kom muaj rawsli tej uas koj hais ko rau kuv.” Ces tus timtswv txawm ncaim Malis mus lawm.

Malis Mus Saib Elixanpev

39Tsis ntev tomqab ntawd, Malis txawm npaj txhij thiab majnroos mus rau ntawm ib lub nroog uas nyob saum laj roob hauv lub xeev Yudas. 40Nws tau mus rau hauv Xekhaliyas tsev thiab hais nojqab nyobzoo rau Elixanpev. 41Thaum Elixanpev hnov dheev Malis lub suab, ces nws tus menyuam hauv plab txawm nti cuag dabtsi. Thiab Elixanpev puvnpo Vaj Ntsujplig tus Dawbhuv, 42nws txawm hais nrov-nrov rau Malis tias, “Koj yog tus uas tau koobhmoov ntau tshajplaws txhua tus pojniam huv tibsi, thiab koj tus menyuam hauv plab los tau koobhmoov thiab! 43Uacas kuv yuav muaj hmoo ualuaj, uas kuv tus Tswv leejniam tseem tuaj xyuas kuv thiab? 44Thaum kuv hnov dheev tej lus uas koj hais rau kuv, kuv tus menyuam hauv plab zoosiab thiab nti cuag dabtsi. 45Koj yuav zoosiab heev, rauqhov koj twb ntseeg tias yuav muaj tseeb rawsli tej lus uas tus Tswv tau hais rau koj lawm!”

Malis Zaj Nkauj Qhuas Vajtswv

46Malis hais tias,

“Kuv lub siab qhuas tus Tswv; #1Xamu 2:1-10

47Kuv tus ntsujplig zoosiab rau Vajtswv uas yog kuv tus Cawmseej,

48kuv yog Nws ib tug ntxhais qhev uas tsis tseemceeb los Nws tseem nco txog kuv thiab!

Txij no mus txhua tiam neeg yuav hu kuv hais tias tus uas tau koobhmoov, #1Xamu 1:11

49vim yam zoo uas Vajtswv tus muaj Hwjchim Loj Kawg Nkaus tau ua rau kuv lawm.

Nws lub npe dawbhuv kawg nkaus;

50Ib tiam dhau rau ib tiam

Vajtswv yeej tabncuab txhua tus uas hwm Nws,

51Nws tau xyab Nws txhais tes uas muaj hwjchim;

Nws ua kom cov neeg khavtheeb thiab lawv tej homphiaj puasntsoog tas.

52Nws tau muab cov vajntxwv uas muaj hwjchim txo ntawm lawv lub zwmtxwv,

thiab nws muab cov neeg uas tsis muaj hwjchim tsaws rau qhov chaw siab. #Yauj 5:11; 12:19

53Nws tau pub tej zaub-mov uas zoo rau cov neeg uas tshaib nqhis tau noj tsaunpo,

thiab tau ntiab cov neeg npluanuj khiav mus tes dawb tes npliag.

54Nws tau los pab cov neeg Yixalayees uas yog Nws cov tubqhe,

rawsli Nws tau coglus tseg rau peb cov yawgkoob lawm.

55Nws ncontsoov hlub Anplahas

thiab Anplahas cajces mus ibtxhis li!” #Chiv 17:7

56Malis nrog Elixanpev nyob kwvlam li peb lub hlis, ces nws txawm rov mus tsev lawm.

Yug Yauhas Tus Uas Muab Neeg Ua Kevcai Rausdej

57Thaum txog caij uas Elixanpev yug menyuam, ces nws txawm yug tau ib tug metub. 58Nws cov kwvtij neejtsa thiab tej neeg zejzog nrog nws zoosiab kawg li thaum lawv hnov tias tus Tswv tau foom koobhmoov rau nws.

59Thaum tus menyuam muaj yim hnub lawm, lawv txawm tuaj muab nws ua kevcai txiav tawv, thiab lawv yuav tis nws lub npe hu ua Xekhaliyas rawsli nws txiv. #Levi 12:3 60Tiamsis nws niam hais tias, “Tsis yog li ntawd! Yuavtsum tis nws lub npe hu ua Yauhas.”

61Lawv hais rau Elixanpev hais tias, “Koj twb tsis muaj ib tug kwvtij uas muaj npe hu li ntawd li ne!” 62Lawv txawm piav tes rau tus metub leejtxiv, nug seb nws nyiam muab tus metub tis npe hu licas.

63Xekhaliyas kom lawv muab ib daim ntawv los rau nws, nws txawm sau hais tias, “Nws lub npe hu ua Yauhas.” Lawv sawvdaws xav tsis thoob li! 64Tamsim ntawd Xekhaliyas txawm rov hais tau lus dua, thiab nws ua Vajtswv tsaug. 65Tej neeg zejzog ntshai kawg li, thiab zaj ntawd txawm nrov-ncha mus thoobplaws tej zejzog uas nyob pem tej tojroob hauv lub xeev Yudas. 66Txhua tus uas hnov zaj no txawm xav hauv nruabsiab thiab nug hais tias, “Tus menyuam no yuav lojhlob los zoo licas?” Rauqhov Vajtswv lub hwjchim yeej nrognraim tus menyuam no.

Xekhaliyas Qhia Tej Uas Yuav Muaj Tshwm Los Yav Tomntej

67Xekhaliyas uas yog Yauhas txiv tau puvnpo Vaj Ntsujplig tus Dawbhuv, thiab nws qhia ib zaj uas yuav muaj los yav tomntej hais tias:

68“Peb ciali qhuas tus Tswv uas yog cov Yixalayees tus Vajtswv!

Rauqhov Nws tau los pab Nws haivneeg thiab tso lawv dim lawm.

69Nws tau pub ib tug Cawmseej uas muaj hwjchim los pab peb,

uas yog Nws tus tubqhe Daviv li cajces.

70Rawsli Nws tau hais tseg rau cov xibhwb cev Vajtswv lus uas dawbhuv thaum ub los lawm hais tias,

71Nws yuav cawm kom peb dim ntawm peb cov yeebncuab,

thiab dim ntawm txhua txhais tes uas ntxub peb.

72Nws hais tias Nws yuav tabncuab peb cov yawgkoob

thiab yuav ncontsoov tej lus dawbhuv uas Nws tau coglus tseg lawm.

73-74Nws tau coglus ruaj-khov rau peb yawgkoob Anplahas hais tias

Nws yuav pab kom peb dim ntawm peb cov yeebncuab txhais tes,

kom peb muaj siab tawv ua tau Nws tes haujlwm tsis ntshai li,

75kom peb thiaj ua tau neeg dawbhuv thiab ncajncees tabmeeg Nws

mus tas peb tiam neej.

76“Kuv tus Metub, sawvdaws yuav hu koj hais tias koj yog tus xibhwb cev Vajtswv tus uas muaj Hwjchim Tshajplaws tej lus.

Koj yuav ua tus Tswv ntej

mus kho kev tos Nws, #Mlakis 3:1

77thiab qhia rau Vajtswv haivneeg paub tias

Vajtswv yuav zam lawv lub txim thiab tso lawv dim.

78Peb tus Vajtswv yog tus uas tabncuab peb kawg nkaus.

Nws txoj kev cawmdim ci tuaj rau peb ib yam li tus duab tshavntuj ci thaum sawvntxov,

79thiab yuav ci saum ntuj los rau txhua tus uas nyob hauv qhov tsausntuj uas yog tus duab ntxoovntxoo ntawm txoj kev tuag,

yuav coj peb txhais kotaw taug txojkev uas tau zoo nyob kajsiab lug.” #Yaxaya 9:2

80Tus metub ntawd lojhlob zoo thiab nws muaj tswvyim heev. Nws nyob tom roob mojsab qhua mus txog hnub uas nws tawm los pom cov Yixalayees timntsej timmuag.

Currently Selected:

Lukas 1: MWW2022

Highlight

Copy