MIINIIÑ 4
4
Pitar la Jon nyi Bulyañ ka Hata ho
1Ho mo anye miyuatañ lurii la dakele, nyibu atañ ho piniiude daka kepten ho Sadusi atañ mo anye ko ahtii, 2hadiinyatii niimpalukoda mo anye miyu atañmi tonsḛrtii ho Jisu ka shiitii hela ka turiturku niimi gyukotii. 3Ho mohlu mo anye mi latutii ho mo anye mi patiihude ho atiitii ahlyi niika allo lyihepa, niimpalukoda hiika hii alyiñdalyi tiiku. 4Hojalo abuje hutiina aguñmi tapa nyatii nii taje nyatii; ho khiika ko miyuatañ jarngo hepa ahtii ku.
5Allo lohe yaho mohluka sangiinii atañ ho amiabañ atañ ho pagenii atañ Jerusalem ho dakuñ nyatii, 6Annas bukuñ nyibu agiñho ho Kaipas ho Jon ho Alejandar, ho hikha hutiina bukuñ nyibu ka uru atañ datii. 7Ho mohlu mo anye mi liipa jaho dake nela la, mohlu takatii, “Nii harchichikelo ho nii armyañ lo siimi niinyi miidu?” 8Ho Pitar, Darii Yajiyallo giitola, mohlumi lutii, “Miyu atañ la amiabañ mika sangii atañ, 9ngiinyi mi matiirḛ siilo aya miigo liikuñlamu mika miiniiñmi taka domilo, nii drih lo siika miyu siimi miipya biine, 10siimi nunu hikha chinto, ho hikha Isrel ka miyuatañ, Nazaret daka Jisu Kristo ka armyañ pa, humina nunu leda biinenii, humina Pinii shiiniiñ hokii turdo miibii nenii, mo armyañ pake siika miyu si nunuka hata aya chanchañ danii. 11Siikasi nunu udepenii atañka yalañ khiipa niike, hojalo hiikahii rali ka khiiniiñ japa duku. 12Ho kone kotrḛ sangopyako hii nyima, niimpalukoda hikha dariiganda ho koneya armyañ bima miyu atañka punkoho nii lona ngunu lyangur kokiñ donii.”
13Siisi mohlu Pitar la Jon nyika haro mi kala lala, ho chintii mo anye purimanii hiila, dumiñ miyu, mohlu kahotamotii; ho mohlu kalatii mo anye Jisu agiñ hoka dabo monii hiila. 14Hojalo miyu mi kala lala hiika miipya konii bomi mohluka aruñho, mohlu hang chekho la lusa nyimatii. 15Hojalo mohlu mo anye mi bulyañ hokii ingeku luku lala, mohlu kone anyañ mi taka siitii, 16lubiidola, “Nii pe ngunu miichiko siika miyu anye mi? Niimpalukoda kagiñnanii khiiniiñ loda mo anye kiilo miiniiñmi hikha Jerusalem hoka dunii atañ tapa tatii nyabiida, ho ngunu hiimi mapa lakiñma. 17Hojalo siimi miyu atañka punkoho hiira tapa kuma dopa, kiije ngunu mo anye mi luluñsa hiira siika armyañ siimi luta nala kone mitrḛ luko kuyo hiila.” 18Hopa mohlu mo anye mi gyola lala ho lubiido mo anye mi lukuyo malo Jisu ka armyañ pa tonsḛr kuyo hiila. 19Hojalo Pitar la Jon nyi mohlumi lusitii, “Siikasi miidi kokiñ dopeha Pinii ka kata ho nunuka luniiñ mika tanii si Pinii kiimi hentola, nunu henka nyato; 20niimpalukoda ngiinyi luma pa miila kema nii miina ngiinyi ka amee la kapa tiinii ho tapa tiinii.” 21Ho mohlu mo anye mi hiira luluñ lubyañ lala, mohlu mo anye mi inke nentiiku, hang pamyo kensa ko kapa mapa, miyu atañka dako hopa, niimpalukoda hikha miyuatañ Pinii mi assañ nyatii niihna lyitiinii. 22Niimpalukoda hu miyu kona siika kagiñnanii miipya niisi lyitiinii hii alyañpiilye akha tiiku.
Henjemiyu atañ Haro Kutii
23Mo anye mi apa kuhañ hangkele mo anye mohluka ajiñ ko intiiku ho lukotii niihna nyibu burii la ho amiabañ atañ mo anye mi lutii nii. 24Ho mohlu siimi tapa lala, mohlu gonge pa gyuritii Pinii mi ho lutii, Attoh kaheja, dariiganda ho kiiddiapiñ ho siimie ho hiiko hoka amane donii mika puniibo, 25aba David ka aguñ lo, mohka miira, Darii Yajiyallo lo luma neha,
Niimpa Midomiyu atañ hadii nyada,
ho miyuatañ piigo giimanii drih atañmi henyada?
26Kiiddiapiñ daka radde atañ mohlu atoh atoh gyokuñ siitii,
ho sangiinii atañ dakuñ nyatii,
Attoh mi chekho dupa ho mohka Arrḛyartiiku luniiñmi mi chekho dupa
27jijeloda siika citi ho tongepa dakuñ nyatii niika darii miira Jisu mi chekho dupa, humina mo arrḛyartii nii, Herod la Pontius Pailet nyi, Midomiyu la Isrel ka miyuatañ agiñho, 28miidupa niijalo niika alah ho niika hemmyobiniiñ bardiñsoyu miigii talyi. 29Ho siisi, Attoh, mohluka luluñ nii atañmi kato, ho niika miira atañmi niika aguñmi haropa ludopa bitope, 30hojalo niika alah mi lyuliñto miipya dupa, ho kagiñnanii ho kahotamo atañmi miidopa niika darii miira Jisu ka armyañ pa. 31Ho mohlu kuja dakele, nohna mohlu tonge pa dakuñla datiinii hii apyu ritii; ho mohlu hikha Darii Yajiyallo giitii ho Pinii ka aguñmi haro biidola lukotii.
Henjemiyu atañ Mohluka Gandanencha Atañ mi Tache Siida
32 #
Miin 2.44-45. Siisi tongepa hutiina henje nyatii nii mohlu ahha puhepa ho yallo konepa giitii, ho kone hetrḛ hang drih atañ mohlukii mi mohkii hiila lumatii, hojalo mohlu amanehemi buyiñ la biitii. 33Ho hempḛr kahe harchichikelo kiiniñkonii atañ mohlu pyakoniitii Attoh Jisu ka turiturku kuniiñmi, ho hempḛr uro aroh-aya hii mohluko dotii. 34Hiikoho kone hetḛr anna nii nyimatii mohluka apurho, niimpalukoda abuje doniidanii atañ mohluka kiiddi ho ude atañmi pyutii, ho hiika pyunii tiicko mi biiliitii 35ho hiimi kiiniñkonii atañka alih ho atiitii; ho tachetahe la miitii huna anna la lyitiinii. 36Ho Josep humina myagiñla kiiniñkonii atañ Barnabas la myantii nii (hiika luniiñhii, Harolupaniika oho), Lebait hokii, Saiprus hoka dunii, 37mohka aji pyutii, ho tiicko mi biiliitii ho kiiniñkonii atañka alih ho atii bitii.
Currently Selected:
MIINIIÑ 4: APATBSI
Highlight
Share
Copy
Want to have your highlights saved across all your devices? Sign up or sign in
Apatani New Testament - NITI GONTU
Copyright © The Bible Society of India, 2014.
Used by permission. All rights reserved worldwide.
