MIINIIÑ 5
5
Ananias la Sappira
1Hojalo miyu kone Ananias luniiñbo mohka mihie Sappira agiñho gandanencha pere pyutii, 2ho mohka mihie mi chindopa mo tiicko tange mi atii biitii, ho tache mi kontii biilii tii ho hiimi kiiniñkonii atañka alih ho atii bitii. 3Hojalo Pitar lutii, “Ananias, niimpa saitan mi niika ahha ho ahke nela la Darii Yajiyallo mi amuhdu ho kiiddi ka tiicko tange mi atii biidu? 4Hiimi matiirḛ pyuma tiikoda, hii niipa dokiñ siima neha? Ho hiimi putii kukoda, hii niipa dokiñ dopeha? Niihtañpa siika siimi no niika ahha ho ahke nendu? No miyu mi amuh make hojalo Pinii mike.” 5Ananias siika aguñ atañmi tapa lala, mo giipa yutii ho shiitii. Ho hempḛr biiso nyatii hikha siimi ka tapa nii atañ. 6Yapa atu kone guritii ho mohmi aputii ho mohmi jobiila ho mohmi alie tii.
7Gunta tahiñhepa dala lala mohka mihie ahtii, nii lyitii hiimi chima pa. 8Ho Pitar mohmi lutii, “Lukope no kiiddi mi siimkane pasuha pyusu tonii.” Ho mo lutii, “ḛh, siimkane pasu.” 9Hojalo Pitar mohmi lutii, “Niihtañpa siikasi niinyi anyeru taliisiila Attoh ka Yajiyallo miya tenka du? Kato, niika millo mika alie nii atañ alyeh si dake, ho mohlu niimi tiirḛ jopa kendoke.” 10Ohepada mo mohka alih ho giihe datii ho shiitii. Yapa atu ahbii kiile mohlu mohmi shiido pa kapa biido, ho mohlu mohmi jobiila ho mohmi alie tii mohka millo ka aruñho. 11Ho hikha gyoliñkonii ho hikha siika drih mika tapa nii atañ hempḛr biiso nyatii.
Miimalyanii la kahotamo
12Siisi abuje kagiñnanii ho kahotamo atañ miitii miyu atañka punkoho kiiniñkonii atañka alah lo. Ho mohlu miilañru tongepa Solomon lengo ho datii. 13Khiibe kone hetḛr mohluka agiñho ahbo dupa haro matii, hojalo miyuatañ mohlumi hempḛr khiila atiitii. 14Ho dumiñ miilañmi abujapa henjemiyu atañmi Attoh ko yalii bitii, hempḛr miyu taro milobo atañ ho annii akha atañ, 15hopa mohlu achih bomi lembo ho joliñ bitii, ho mohlumi dotananii ho pepu ho doke nela la, niimpalukoda Pitar ka ahlyi ho mohka yallo jalo iche mohlumi byokhe kiine dupa. 16Miyu atañ Jerusalem aruñare hoka taun hokii miila dakuñ nyatii, achih bomi ahgiila ho kacho yajiyallo loka jarpiñ koniiatañ mi, ho mohlu hikha miipya kotii.
Kiiniñkonii mi Miihimiiretii
17Hojalo bukuñ nyibu guritii ho hikha mo agiñ hoka dubonii atañ, hiika hii, Sadusi atañ mika imbomonii atañ, ho mohlu kariñtii 18mohlu kiiniñkonii mi latutii ho mohlumi dumiñka patiihude ho atiitii. 19Hojalo ayoho Attoh ka miidopopi patiihude ka alyeh mi miiko bitii ho mohlumi agoho lingii tiiku ho lutii, 20“Inge ho piniiude ho dange ho miyu atañmi hikha siika sango ka aguñ atañmi lukohe.” 21Ho mohlu siimi tapa lala, mohlu piniiude ho ahtii alloliipaho ho tonsḛrtii.
Siisi bukuñ nyibu ahtii ho mo agiñ hoka imbonii atañ ho bulyañ mi tongepa gyokuñtii ho hikha Isrel ka sangii niipaka kahekonii atañmi, ho patiihude ho kiiniñtii mohlumi selii bike nendupa hiila. 22Hojalo sabiiatañ ahbii kiile, mohlu mohlumi patiihude ho kapa matii, ho mohlu ahkur kula ho lukotii, 23“Ngunu patiihude mi ayachancha miipiñtola dopa ho dabii bomi alyeh atañ ho dagur biidopa kappatii, hojalo hiimi ngunu miiko kiile ngunu ura ho kone mitrḛ kapama.” 24Siisi piniiude daka kepten ho nyibu burii atañ siika aguñ atañmi tapa lala, mohlu uroyaya mohlumi hendḛr lamatii, hemur nyatii nii pe lyitiinii. 25Ho miyukone ahtii ho mohlumi lukotii, “Miyu atañ humina nunu patiihude ho tumbii nenii hii piniiude si da ho miyu atañmi tonsḛr la da.” 26Ho kepten ka agiñho sabii atañ intii ho mohlumi selii biitii, hojalo payagayamapa, niimpalukoda mohlu biisotii miyuatañ yalañ kulyi do hiila.
27Ho mohlu mohlumi selii lala, mohlu mohlumi bulyañ ka liipa ho dake nentii. Ho bukuñ nyibu mohlumi takatii, 28lubiidola, “Ngunu nunumi lubii lyike siika armyañ ho tonsḛr yo, hojalo nunu Jerusalem ho nunuka tonsḛr niilo tapa tatii kiine biido ho nunu siika miyu ka shiiniiñ mi ngunumi halii pa miidunii.” 29Hojalo Pitar la kiiniñkonii atañ lusitii, “Ngunu Pinii ka luniiñ miya tachi miyu hentola. 30Ngunuka aba atañka Pinii Jisu mi turidopa miitii humina nunu sannii ho leda lala membii nenii. 31Pinii mohmi lahbi alah dalyiho Sangii ho Lyangur niipa miichatii, Isrel mi henkurkiine dupa ho ingyamiigyanii atañ hokii hello kiine dupa. 32Ho ngunu siika drih atañka hakipa lyido, ho hiichuli Darii Yajiyallo tiirḛ humina Pinii bitiinii hu mohmi lunii mi tado.”
33Mohlu siimi tapa lala mohlu hadii ritii ho mohlumi mempa nantii. 34Hojalo Parisi kone bulyañ hoka dunii Gamaliel hiiniiñbo, dapo ka tonsḛrbo, hikha miyuatañ loka khiikonii kone, guritii ho miyu atañmi ago iche nempa lilyato hiila lutii. 35Ho mo mohlumi lutii, Isrel daka miyuatañ, hendi nyato nii miipa miidu nunu siika miyu atañmi. 36Niimpalukoda siimi kapyo yapa Thiodas hiila kone sari, atohmi khiiniiñ kone ke hiila luko siila, ho miyuabuje, lampe pahe, mo agiñho dabone; bojalo mohmi mempa biine ho hikha hutiina mohmi imbo monii atañ hargii nyane ho hang lyikumane. 37Mohka hiibapa Galili daka Judas sari armyañ kedu myoduho ho mo kiiliñho miyu tange lyargiitii; mo tiirḛ lyutii, ho hutiina mohmi imbo montiinii hiitiirḛ yujane. 38Hopa siisi ka lugo sotrḛ ngo nunumi lukoso, siika miyuatañ siimi hang miiyo ho mohlumi kapa siito; niimpalukoda siika heniiñsi malo siika miiladoniiñ si matiirḛ miyu kokii koda, si miipe kemake; 39hojalo siikasi matiirḛ Pinii kokii koda, nunu mohlumi lumiñ lakiñ make. Nunu Pinii miya chekho dopa ke miisu biichinii!
40Hopa mohlu mohka luniiñmi tatii, ho mohlu kiiniñkonii atañmi gyolii lala, mohlu mohlumi hitii ho mohlumi lubiido siika Jisu ka armyañ ho luyo hiila, ho mohlumi inke nentiiku. 41Ho mohlu bulyañ kokii intiiku, hempyo biidola mohlumi khiitii hiila niimpalukoda khiimanii armyañ pa heru hembi dopa. 42Ho allo dadu mi piniiude ho ude ho mohlu Jisu Kristo mi tonsḛr ho tonsḛr khenyo tongu matii.
Currently Selected:
MIINIIÑ 5: APATBSI
Highlight
Share
Copy
Want to have your highlights saved across all your devices? Sign up or sign in
Apatani New Testament - NITI GONTU
Copyright © The Bible Society of India, 2014.
Used by permission. All rights reserved worldwide.
