JON 12

Jisu Mi Betany Ho Arrḛyartii

(Mt 26.6-13; Mk 14.3-9)

1 # Mt 26.6-13; Mk 14.3-9; Lk 7.37-38. Impobiiniiñ dituñ ka allo lokhe dorañpa, Jisu Betany ho ahtii, nohna Lajaras dutiinii, humina Jisu shiinii mi turdopa miitiinii. 2Hiiko mohlu mohpa alyiñapiñ diidupa miimyo bitii; Marta miihotii, ho Lajaras diitananii hoka mo agiñ ho dubo nii konetii. 3#Lk 7.37-38.Mary hempḛr khiiniiñ hang miiyomanii nard kutu mi jola lala ho Jisu ka alih ho arrḛyartii ho mohka alih mi mohka adiñdimu lo nyupa biido; ho ude ho poteje kutu ka naru nempyo sula dotii. 4#Jn 6.71; 13.26. Hojalo Judas Iskariot, mohka henjeajiñ atañ hokii kone (mo huna mohmi talubalo kentiinii), lutii, 5“Niimpayu siika kutu mi lahiñhe denarii#12.5: Denarii: denarii luniiñsi allo lohe ka ajho injopa pyula lala ho arromiyu mi bimapa?” 6#Lk 8.3. Siimi lutii, mo arromiyu mi henado hiilamapa hojalo niimpalukoda mo diipyonii, ho mohko tiicko bako dosu lyiniiñ mo hoka aliinii hokii lala lyitii. 7#Jn 19.40. Jisu lutii, “Mohmi kahpa siito, mohmi simi atii biike nento ngiimi alie lyi allo hopa. 8Arro miyu kiirañ nunuka agiñ ho dalyi diike, hojalo nunu kiirañ ngiimi dagii kemake.”

Lajaras Mika Rhuniiñ

9Hempḛr miyu taro Jew atañ hokii mo ho da hiila chimpa lala, mohlu ahtii, Jisu ka piigo kontii pama pa Lajaras mitrḛ kadu pa hiila, humina mo shiinii mi turdo pa miitiinii. 10#Mk 14.1. Hopa nyibu burii atañ Lajaras mitrḛ mendu pa hemmyo tii, 11niimpalukoda mohka piigopa abuje Jew atañ impa nyatii ku ho Jisu mi henje la.

Jerusalem hoka Ahniiñ

(Mt 21.1-11; Mk 11.1-11; Lk 19.28-40)

12 # Mt 21.4-9; Mk 11.7-10; Lk 19.35-38. Allo lohe yaho hempḛr miyu taro hutiina dituñ soko ho ahtiinii Jisu Jerusalem ho ahla do hiila tapatii. 13#Jn 1.49. Hopa mohlu pam sannii ka halloh mi tarbiila mohmi kapa dupa agoho linyatii, gyubii dola, “Hosana! Lyanko kendo hii huna Attoh ka armyañ pa ahdonii, Isrel ka Radde tiirḛ!” 14Ho Jisu gadoh gapho dore kappatii ho hiiko dutii: hiila ketola dotii,

15“Biisoyo, Zayon ka wiinga;

kato, nunuka radde ahdoke,

gadoh gapho ho dula!”

16 # Mk 9.32; Jn 2.22. Mohka henjeajiñ atañ kapyoho siimi tadḛrlama tii; hojalo Jisu mi assañdiilañ kukele, ho mohlu hemparido siika keniiñ si mohmi ketii ho mohpa miitii. 17Miyu abuje danii atañ hakibitii Lajaras mika byuh hokii ka agoho mohka gyoliñ lala ho shiinii mika turdo miiniiñmi. 18Niimpa miyuatañ mohmi kapa dupa intii lukoda mohlu tapatii mo siika kagiñnanii mi miitii hiila. 19Parisi atañ ho lutii kone anyañmi, “Nunu kato nunu hang miila kema; kato, dohadolo si mohmi imbo monya lyi.”

Grik Tange Jisu Mi Medo

20 # Jn 7.35; Miin 11.20. Siisi dituñ hoka herii dupa ka ahnii atañ tange hii Grik tii. 21#Jn 1.44; 6.5. Hopa hiika atañ Pilip ko ahtii, Galili daka Betsaida hokiitii, ho mohmi lutii, “Tonsḛrbo, ngunu Jisu mi kapa nando.” 22Pilip intii ho Andrew mi lukotii; Andrew Pilip agiñho intii ho mo anye Jisu mi lukotii. 23#Jn 13.1; 17.1; Mk 14.35,41. Ho Jisu mo anye mi lusitii, Myodu si ahdoku miyu ka Oho mi assañdiilañ dupa. 24#1 Kor 15.36. Jijeloda, jijeloda, ngo nunumi lukoso, nii dahepa emmo elyañ kiiddi ho liihi tama ho shiitema, hii kontiisii dokañ siidunii; hojalo hii matiirḛ shiido koda, hiika hii abuje ahee hidu. 25#Mt 10.39; Mk 8.35; Lk 9.24; 14.26. Hu attoh ka sango mi abyo siido hii alyu siidu, ho huna attoh ka sango mi siika dohadolo so hempa siidonii hii santḛrlamanii sango pa dokiñdo. 26Hujalopa matiirḛ ngiimi miihotalyi, mo ngiimi imbo monkiñdo loda; ho noh ngo da, hiiko ngiika miira tiirḛ dakiñdo; hujalopa ngiimi matiirḛ miihotalyi, Aba mohmi khiikiñdo.

Jisu Mohka Shiisanii Piigo Mi Ludo

27 # Jn 11.33; Mt 26.38; Mk 14.34. Siisi ngiika yallo si ahiaredo. Ho niihiila pe ngo luchinii? Aba, ngiimi siika myodu sokii lyangur pe? Ma, siika piigopa ngo siika myodu so ahdu. 28#Mk 1.11; 9.7. Aba, niika armyañ mi assañ diilañto. Ho dariiganda hokii aguñ gonge luliñtii, “Ngo hiimi assañdiilañ tiikuke, ho hiira ngo hiimi assañdiilañ talyi.” 29Miyu abuje danii atañ hiimi tapa biido ho lutii si yapuñ ke gendo nii. Tange lutii, “Miidopopi mohmi luriida.” 30Jisu lusitii, “Siika aguñ nunu pake lindo nii, ngiipa make. 31#Jn 16.11; 2 Kor 4.4; Ipi 2.2. Siisi ke siika dohadolo mika ayakacho kadu, siisi siika dohadolo mika sangii bomi mompa kendo; 32#Jn 3.14; 8.28. ho ngo, niida ngiimi kiiddiapiñ sokii yucha talyi, hikha miyu atañmi ngiiko selii giichi.” 33Mo siimi lutii kakiñ dupa hiila niihtañ shiiju pana mo shiikiñ donii hiila. 34Miyuabuje danii atañ mohmi lusitii, “Ngunu dapo ho tapa to Kristo ayu dahepa dukiñdo hiila. Niihtañ pa no ludu miyu ka Oho mi yucha kendo hiila? Hu siika miyu ka Oho?” 35#Jn 7.33; 9.4; Ipi 5.8; 1 Jn 2.11. Jisu mohlumi lutii, “Hutoh si nunuka agiñ da ichu chesuke dasutalyinii. Into nii dahepa nunuko hutoh do, hiilamakoda kamosi nunumi miipu biichi ke; huna kamo ho indo nii chinsu make mo noh indo hiila. 36#Lk 16.8; Jn 8.59. Nunukoka hutoh dorañ ho, hutoh mi henjeto, nunu hutoh ka oho atañpa lyidu pa.”

Henjemanii Miyuatañ

Jisu siimi luku lala, mo intiiku ho mo attoh mi mohluko hokii achih giitii ku. 37Mo abuje kagiñnanii mohluka hataho miibii siine, hojalo mohlu mohmi henje nyama; 38#Rom 10.16. siikasi nyibuhenii Aijaya ka keto laka doniimi lyipe kiine dupa:

“Attoh, hu ngunuka luko niimi taje kendo,

ho humi Attoh ka lapo hii kakiñ kendo?”

39Hopa mohlu henjelama tii. Niimpalukoda Aijaya hiira lutii,

40 # Mt 13.14. “Mo mohluka amee mi micha dopa miitii ho mohluka ahha mi alḛr dopa miitii,

hiila makoda mohlu mohluka amee lo katiido ho mohluka ahha hela tiido,

ho ngiiko anyañ tiido mohlu miipya kodupa.”

41 # Lk 24.27. Aijaya siimi lutii niimpalukoda mo mohka tatukatu mi kappatii ho mohmika luniiñmi. 42#Jn 9.22; Lk 6.22. Hiilamapa abuje otority atañ tiirḛ mohmi henje nyatii, hojalo Parisi atañ mika biisomi mohlu hiimi khako matii, hiila makoda mohlumi sinagog hokii agoho nempa linkiñdo: 43niimpalukoda mohlu miyu ka assañ niimi uro yapa hemi lyado Pinii ka assañ niimi hentola.

Jisu Aguñ Atañ Loka Ayakacho Kanii

44 # Mt 10.40; Jn 5.24. Ho Jisu gyuritii ho lutii, “Huna ngiimi henje nyadonii, ngiimi henje make hojalo hiimi ke huna ngiimi kiiniñ tiinii. 45#Jn 14.9. Ho huna ngiimi kado nii mohmi kado huna ngiimi kiiniñ tiinii. 46#Jn 1.4; 8.12; 9.5. Ngo hutoh pa lyila dohadolo so ahdu, niimpalukoda hujalopa ngiimi henjetalyi kamo ho duku madopa. 47#Jn 3.17. Hujalopa ngiika kolobiisie mi matiirḛ tapa lala ho hiimi atii biima koda, ngo mohmi ayakacho kalii make; niimpalukoda ngo dohadolo so ayakacho kapa ahma hojalo dohadolo mi lyangur dupa. 48#Mt 10.14-15. Huna ngiimi khiipa donii ho ngiika kolobiisie niimi, halii tiiku; ngiika aguñ luniiñ hii mohmi halii kendo kami allo ho 49Niimpalukoda ngo ngiika attoh otority la lusuma; Aba ngiimika kiiniñbo mo loda ngiimi lujubiniiñ mi bitii nii lusanii ho nii lukiñdo. 50Ho ngo chindo siika lujubiniiñ so santḛrlamanii sango do. Ngo nii luchi, hopa, ngo ludu Aba ka ngiimika lunge luniiñmi.”

Currently Selected:

JON 12: APATBSI

Highlight

Copy