JON 13

Jisu Mohka Henjeajiñ Atañ Ka Alih Mi Harbiido

1 # Jn 11.55; 12.23; 16.28. Siisi Impobiiniiñ dituñ soma rampa, Jisu chintii mohka myodu ahdoku siika dohadolo simi apa tekula Aba ko indu kupa, mohka attoh miyu atañmi hentii hutiina dohadolo so danii, mo henkañ kendo kamikalo lohepa. 2#Jn 6.71; Mk 14.10. Ho alyiñapiñ diila doho, igii hii Saimon ka oho Judas Iskariot ka ahha ho ahto kula dotii ku, mohmi talubalo kiine dupa hiila, 3Jisu, Aba hikha drih atañmi mo alah ho bitii hiila chimbii tola, ho mo Pinii kokii ahdo ho Pinii ko inkiñdo hiila, 4alyiñapiñ diiko hokii guritii, mohka pulye mi aruñho atii lala, ho nyupasiina nanii pulye mi attoh tiigiitii, 5#Lk 7.44; 22.27. Ho paka ho yasie toliñ tii, ho henjeajiñ atañka alih mi haritii, ho nyupasiina nanii pulye la nyupatii nii mina mo tiigiitiinii. 6Mo Saimon Pitar ko ahtii; ho Pitar mohmi lutii, “Attoh, no ngiika alih mi harpa?” 7Jisu mohmi lusitii, “Ngo niimi nii miipa miido siisi no chima ranke, hojalo piijoda no chinkiñ doke.” 8#Jn 3.5; 9.7. Pitar mohmi lutii, “No pema ngiika alih mi haryo.” Jisu mohmi lusitii, “Ngo matiirḛ niimi harma koda, no ngiiko ahgyo make.” 9Saimon Pitar mohmi lutii, “Attoh, ngiika alih mi kontiimapa hojalo ngiika alah ho ngiika adiñ miilañmi hokoda!” 10Jisu mohmi lutii, “Huna ahu hasu tiinii hii yasii dopa lyimake, mohka alih kontii misuke, hojalo nunu hikha darii doke, ho no darii doke, hojalo nunu kone abi make.” 11#Jn 13.2. Niimpalukoda mo chintii huna mohmi talubalo kendo nii hiila; hopa mo lutii, “Nunu hikharu darii make.”

12Mo mohluka alih mi harku lala, ho mohka pulye laku lala, ho mohka duko duha kula, mo mohlumi lutii, “Nunu chindu ha ngo nunumi nii miitii hiila? 13Nunu ngiimi Tonsḛrbo ho Attoh hiila gyodo; ho nunu gyodi ko gyodo, niimpalukoda ngo hiila. 14Hojalo ngo matiirḛ, nunuka Attoh ho Tonsḛrbo, nunuka alih mi hartii, nunu tiirḛ kone anyañ ka alih mi harbi siikiñ do. 15#1 Pit 2.21. Niimpalukoda ngo nunumi kakiñ biilyi ke, niimpalukoda nunu tiirḛ miito ngiika nunu paka miichañ ho. 16#Mt 10.24; Lk 6.40.Jijeloda, jijeloda, ngo nunumi lukoso, miira hii atoh mi kahe yama ke; malo hiitiirḛ huna kiiniñ kotiinii mohmika kiiniñ bomi kahe yama ke. 17#Lk 11.28; Jem 1.25. Nunu matiirḛ siika drih atañ siimi chindo koda, lyanko kendo nunu matiirḛ siika atañmi miido koda. 18Ngo nunu miilañ rumi luma ke; ngo chindo ngo humina kahe tiinii hiila; siikasi piniipota mi miipe kiinedupa, ‘Huna ngiika yatañ mi diitiinii mohka ludu lo ngiimi nyoje biido.’ 19#Jn 14.29; 8.28. Ngo siisi nunumi siimi lukodu, siika drih lyima rampa, niimpalukoda niida si lyichi nunumi henje kiine dupa ngo hii hiila. 20#Mt 10.40; Lk 10.16.Jijeloda, jijeloda, ngo nunumi lukoso, huna kone mijalo ngiika kiiniñ niimi karii donii; ho huna ngiimi karii donii hii mohmi kariido huna ngiimi kiiniñ tiinii.”

Jisu Mohmika Talubalo Bomi Hempa hemmyo Biido

(Mt 26.20-25; Mk 14.17-21; Lk 22.21-23)

21 # Mt 26.21-25; Mk 14.18-21; Lk 22.21-23. Jisu siimi luku lala, mo yajiyallo ho henga henkha tii, ho pyakoritii, “Jijeloda, jijeloda, ngo nunumi lukoso, nunu kokii kone ngiimi talubalo kendo.” 22Henjeajiñ atañ kone anyañ mi kako siido, humina mo ludonii hendḛr lama pa. 23#Jn 19.26; 20.2; 21.7,20. Mohka henjeajiñ kone, humina Jisu hentiinii, Jisu mi giida biitola dutii; 24hopa Saimon Pitar mohmi hohe lala ho lutii, “Lukope ngunumi hu hii humina mo ludonii.” 25Jisu ka aruñ ho giila dobiidola, mo mohmi lutii, “Attoh, hii hupe?” 26#Jn 6.71. Jisu lusitii, “Hiika hii hiike humina ngo siika petu niisi mi niihi lala bichi nii.” Ho petu niimi mo niihi lala, mo Judas mi hiimi bibiido, Saimon Iskariot ka oho. 27Yatañ petu niika hiiba ho, Saitan mohko ahtiiku. Jisu mohmi lutii, “No nii miipa miidu, nyibya miito.” 28Siisi diitananii hoka duniiñ atañ kone hetrḛ chima mo niimpa siimi mohmi ludo hiila. 29#Jn 12.6. Tange hiila hentii, rongkoda Judas ko tiicko bako doniiñ, Jisu mohmi lukotii, “Riito niihna ngunu dituñpa anna donii”; malo, rongkoda mo arro mi ngoya bike nendupa hiila. 30#Lk 22.53. Hopa, yatañ petu mi lala la, mo nyibya loda agoho lintii; ho hiikahii ayoh tii.

Niti Lujubiniiñ

31 # Jn 17.1. Mohka ago linne kuho, Jisu lutii, “Siisi miyu ka Oho mi assañdiilañ kendo, ho mohko Pinii mi assañdiilañ kendo; 32Pinii mi matiirḛ mohko assañdiilañ dokoda, Pinii tiirḛ mohmi assañdiilañ kendo mohko, ho rongepa mohmi assañdiilañ kendo. 33#1 Jn 2.1; Jn 7.33.Himme atu atañ, hojalo ichuche ngo nunu agiñho date hela. Nunu ngiimi mekiñdo; ho niihtañpa ngo Jew atañmi luto hii chulipa siisi ngo nunumi ludu, ‘Ngiika inko ho nunu ahla kemake.’ 34#Jn 15.12,17; 1 Jn 3.23; 2 Jn 5; 1 Tes 4.9; 1 Pit 1.22; Hib 13.1; Ipi 5.2; 1 Jn 4.10. Niti lujubiniiñ ngo nunumi biso, nunu kone anyañ mi hensu tolya; ngiika nunumika henchañho, hiichuli nunu tiirḛ kone anyañ mi hensu tolya. 35Siika silo hikha miyuatañ chinkiñ doke nunu ngiika henjeajiñ atañ hiila, nunu matiirḛ kone anyañmi hensu dokoda.”

Jisu Pitar Ka Mapah Niimi Luko Lumyo Biido

(Mt 26.31-35; Mk 14.27-31; Lk 22.31-34)

36 # Jn 21.18; 2 Pit 1.14. Saimon Pitar mohmi lutii, “Attoh, no noh impa?” Jisu lusitii, “Ngiika inko ho no siisi imbo lakiñ make; hojalo no piijoda imbo monkiñdo.” 37#Mt 26.33-35; Mk 14.29-31; Lk 22.33-34. Pitar mohmi lutii, “Attoh, niimpa ngo siisi niimi imbo lakiñma? Ngo ngiika sango mi niipa hempa bichi.” 38Jisu lusitii, “No niika sango mi ngiipa hempa bichi ha? Jijeloda, jijeloda, ngo niimi lukoso, paro khokiñ make, nii dahepa no ngiimi rohiñhe mapah tama.

Currently Selected:

JON 13: APATBSI

Highlight

Copy