JON 14

Jisu Aba Koka Inko Lembo

1“Nunu ahha heru yo; Pinii mi henjeto, ngiimi miilañ henjeto. 2#Jn 13.33. Ngiika aba ka ude ho abuje chidii doke; ho matiirḛ nyima lyimilo, ngo nunumi luko matoha ngo nunupa duko miimyo dupa ilyi ke hiila? 3Ho ngo ila ho nunupa duko miimyo tela, Ngo hiira ahkur talyi ho ngo nunumi ingii talyi, niimpalukoda noh ngo da ho nunu miilañmi dagii dupa. 4Ho nunu chindo lembomi ngo noh ilyi hiila.” 5#Jn 11.16. Tomas mohmi lutii, “Attoh, ngunu chima no noh ilyi hiila; niihtañpa ngunu chila kendo lembomi?” 6#Jn 10.9; 1.4,14. Jisu mohmi lutii, “Ngoke lembo, ho jije, ho sango; kone hetḛr Aba ko ahla kema, hojalo ngiiko hopasii. 7No matiirḛ ngiimi chintii koda, no ngiika Aba mitrḛ chintii do; siisikiila no mohmi chindo ho mohmi kapa tiiku.”

8Pilip mohmi lutii, “Attoh, ngunumi Aba mi kakiñpe, ho ngunumi hembyañ biidopa.” 9#Jn 12.45. Jisu mohmi lutii, “Hiimkane diirii ngo nunu agiñho dabii lyiku, ho siisi lohepa no ngiimi chima rañ, Pilip? Huna ngiimi kapa tiinii hii Aba mi kappatii; niihtañpa no ludu, ‘Ngunumi Aba mi kakiñpe hiila’? 10No hiila henjema ha Ngo Aba ko da ho Aba Ngiiko da hiila? Ngiika aguñ niimi ka lurii niisi ngo ngiika atoh otority lo luma; hojalo Aba ngiika ura hoka duniibo mo mohka miigo atañmi miido. 11#Jn 10.38. Henjeto ngiimi Ngo Aba ko da hiila ho Aba ngiiko da hiila; malo hojalo ngiimi henjeto niimpalukoda miigo miiniiñ atañpa.

12“Jijeloda, jijeloda, ngo nunumi lukoso, huna ngiimi henje talyinii hiitiirḛ ngiika miiniiñ chulipa miigo atañmi miikiñdo; ho siika atañ mitrḛ kayeya miigo miikiñdo, niimpalukoda ngo Aba ko ilyiku. 13#Mt 7.7; Jn 15.7,16; 16.23; Jem 1.5. Niijalo nunu ngiika armyañ pa kuchi, Ngo hiimi miibi talyi, niimpalukoda Aba mi Oho ko assañ kiinedupa; 14niijalopa nunu ngiika armyañ pa kuchi, ngo hiimi miibi talyi.

Darii Yajiyallo Mika Hemme Biniiñ

15 # Jn 15.10; 1 Jn 5.3; 2 Jn 6. “Nunu matiirḛ ngiimi hendo koda, nunu ngiika lujubiniiñ atañmi atii kendo. 16#Jn 14.26; 15.26; 16.7; 1 Jn 2.1. Ho ngo Aba mi kuchi, ho mo nunumi Hembyuñnii koneya bikiñdo, nunuka agiñho ayu dahepa dabo niipa, 17jijeka Yajiyallo tiirḛ, humina dohadolo si larii lamanii, niimpalukoda mohmi kapa lama malo mohmi chinya ma; nunu mohmi chindo, niimpalukoda mo nunuka agiñho da, ho nunuko giikiñdo.

18“Ngo nunumi kapa tama ke; ngo nunuko ahchike. 19#Jn 7.33. Hojalo ichuche dahidamo lala, ho dohadolo atañ ngiimi kapa keñku ma, hojalo nunu ngiimi kapa kendo; niimpalukoda ngo turla dakiñdo, ho nunu tiirḛ turla dakiñdo. 20Hiika allo ho nunu chinkiñdo ngo Aba ko da hiila, ho nunu ngiiko, ho ngo nunuko da hiila. 21Hii huko hona ngiika lujubiniiñ donii ho hiimi atii biido nii, hiike huna ngiimi hendo nii; ho hii huna ngiimi hendo nii ngiika Aba lo henko kendo, ho mohmi henchi ho ngo atohmi kakiñ siichi mohmi.” 22#Miin 1.13; 10.40-41. Judas (Iskariot mapa) mohmi lutii, “Attoh, niihtañpa hii no atohmi ngunumi kakiñ siikiñ do, ho dohadolo mima pa?” 23#1 Jn 2.24; Mih 21.3. Jisu mohmi lusitii, Miyu matiirḛ ngiimi hendo koda, mo ngiika aguñmi atii biikiñdo, ho ngiika Aba mohmi henkiñdo, ho ngunu mohko ahkiñdo ho ngunuka ude mi mohko penkiñdo. 24Hii huna ngiimi hema nii ngiika aguñ atañ mitrḛ atiima; ho nunuka aguñ tapa niisi ngiikii make hojalo Aba kii huna ngiimi kiiniñ tiinii.

25Siika drih atañmi ngo nunumi lubii lyike, ngiika nunu agiñho darañso. 26Hojalo hembyuñnii, Darii Yajiyallo, humina Aba ngiika armyañ pa kiiniñ tiinii, mo nunumi hikha drih atañmi tonsḛr kendoke, ho nunumi hempa dopa miilyi diike hikha ngiika nunu mika luniiñmi. 27Chimie mi ngo nunuko atii bibii lyike; ngiika chimie mi nunumi bibii lyike; dohadolo ka bichañ ho ngo nunumi bima lyike. Nunuka ahha heru yo, malo hiimi biiso kiine yo. 28Nunu ngiika nunumika luniiñmi tapa biilyi, Ngo ilyi kuke, ho ngo nunuko ahchi ke. Nunu matiirḛ ngiimi hendo koda, nunu hempyo kendoke, niimpalukoda ngo Aba ko ilyi ke; niimpalukoda Aba ngiimi kahe yake. 29#Jn 13.19. Ho siisi ngo nunumi lyima rampa luko lumyo biilyi ke, niimpalukoda niidana hiila lyichinii, nunumi henje kiine dupa. 30#Jn 12.31. Ngo nunumi ano lurii lukañ takuñ make, niimpalukoda siika dohadolo mika sangiinii ahla do. Mo ngiimi harchichike giimiñ lakiñ make; 31#Mk 14.42; Jn 18.1. hojalo Aba ngiimi nii miito ludo hiimi siike ngo miisu dunii, niimpalukoda dohadolo mi chinke nendupa ngo Aba mi hendo hiila. Gurito, kiije ngunu insa.

Currently Selected:

JON 14: APATBSI

Highlight

Copy