LUK 10
10
Jisu Kanukhange la anyemi Kiiniñ Biido
1 #
Lk 9.1-2,51-52; 7.13. Hiika hiibapa Attoh kanukhange tongelya kahebiido, ho mohlumi mohmi kapyo yapa kiiniñtii, anye anye, hikha taun la gandaho nohna mo ahdupa miitiinii. 2#Mt 9.37-38; Jn 4.35. Ho mo mohlumi lutii, Amoo lasa abuje do, hojalo amoolanii ichesii dasu danii; kuto amoo Attoh mi amoo lanii atañmi mohka amoo lasako ho kiiniñ tote hiila. 3#Mt 10.7-16; Mk 6.8-11; Lk 9.2-5; 22.35-36. Nunuka lemboho inge; kato, Ngo nunumi subuñ hiilyañpa kiiniñ biilyi ke siipya atañka apurho. 4Chiru bagii lyayo, lera tiirḛ, nyota nanii tiirḛ; ho lemboho kone mitrḛ lurii lyayo. 5Huka ude hojalo ahchi, kapyopa luto, Siika ude so chimie dotope! 6Ho chimie heminii matiirḛ hiiko dukoda, nunuka chimie hii mohko dobo kendo; hojalo hiilamatrḛ nyima koda, hii nunuko ahkur kendo kuke. 7#1 Kor 10.27; 9.14; 1 Tim 5.18. Ho hiika ude duko jaho dutolya, diito tantolya mohlu nii bichi, niimpalukoda miinii atañmi mohluka miijomi bikiñ doke; ude penge abi ilyayo. 8Nohjalo nunu taun ho ahchi ho mohlu nunumi karii lyimilo, diitolya niihna nunuka hataho atii bitii nii; 9miipya tolya hoka achih doniimi ho mohlumi luto, Pinii ka raddeganda hii nunuko aruñho ahdo kuke. 10Hojalo niida nunu taunho ahchi ho mohlu nunumi larii malyi milo, hiika lembo hopa intolya ho luto, 11#Miin 13.51. Nunuka taun hoka dimḛr lohepa ngunu alih hoka giiniimi, ngunu pija siibii lyike nunumi chekhola; pema nunu simi chilyayo, Pinii ka raddeganda hii aruñho ahdoku hiila. 12#Mt 11.24; Jud 7. Ngo nunumi lukoso, siikasi Sodom ya pigiilaya kendo hiika allo ho siika taun mi hentola.
Henje Manii Taun Atañ
(Mt 11.20-24)
13 #
Mt 11.21-23; Lk 6.24-26. Aiya hiila nunumi hembido, Korajin! Aiya hiila nunumi hembido, Betsaida! Niimpalukoda siika kaye miigo nunu koka miiniiñ simi Tyre la Sidon nyiho hoya miitii koda, mohlu ayuho henkur nyatii kudo, niirepulye la miibu piipu giitola dula. 14Hojalo ayakacho kalyi kuho Tyre la Sidon nyiya pigiilaya kendo nunumi hentola. 15Ho nunu, Keparnam, nunumi dariiganda ho chagii lyido hendoha? Nunumi nelimyoko ho togiikendo.
16 #
Mt 10.40; 18.5; Mk 9.37; Lk 9.48; Jn 13.20; 12.48. Huna nunuka luniiñmi tadonii ngiimi tado, ho huna nunumi khiipa donii hii ngiimi khiipado, ho huna ngiimi khiipa donii hii hiimi tiirḛ khiipado huna ngiimi kiiniñ tiinii.
Kanukhange la anyeka Ahkur Kuniiñ
17Kanukhange hii ahkur tiiku hempyo biidola, lubiidola, “Attoh, igii atañ miilañmi ngunu mompa lato niika armyañ pa!” 18#Mih 12.9; Jn 12.31. Ho mo mohlumi lutii, “Ngo Saitan mi yapuñ hokii yamu chitañ byohi dopa kapato. 19Kato, ngo nunumi otority bibii lyike tabu atañ la tarji atañmi nyorpi ladopa, ho ahha banii boka hikha harchichike mi kaye yadopa; ho hang kone hetḛr nunumi heru miipa lakiñ make. 20#Pil 4.3; Hib 12.23; Mih 3.5; 13.8; 21.27. Hojalo hempyo nyayo siika sipa, yajiyallo atañ nunuka luniiñ tado hiila; hojalo hempyo nyato nunuka armyañ hii dariiganda ho ketiiku hiila.”
Jisu Hempyo Da
(Mt 11.25-27; 13.16,17)
21 #
Mt 11.25-27. #1 Kor 1.26-29. Hiika myodu jaho mo Darii Yajiyallo ho hempyotii ho lutii, “Ngo niimi payapacho ludu, Aba, dariiganda la kiiddiapiñ nyika Attoh, no siika drih atañmi chila ho talanii atañ kokii achuñtii ho himme atañ miya kakiñtii; ḛh, Aba, niimpalukoda siikasi niika aroh-aya henju. 22#Mt 28.18; Jn 3.35; 13.3; 10.15; 17.25. Hikha drih atañmi ngiika Aba ngiimi bitii; ho kone hetḛr chima hu Oho hiila Aba kontiisii, malo hu Aba hiila Oho kontiisii ho hutii mina Oho kahe tiinii mohmi kakiñ dupa.”
23 #
Mt 13.16-17; Jn 8.56; Hib 11.13; 1 Pit 1.10-12. Ho henjeajiñ atañ kii dalyi mobo biila mo lutii lusila, “Lyanko niike amee atañ hutiina kappa nyadonii nunuka kaniiñmi! 24Niimpalukoda ngo nunumi lukoso abuje nyibuhenii atañ la radde atañ nunuka kaniiñmi kappa nala hene, ho hiimi kappa mane, ho tanañne niihna nunu tadonii, ho hiimi tapa mane.”
Denki Samarita Mika Lutiñnaniiñ
25 #
Mt 22.34-39; Mk 12.28-31. #Mk 10.17; Mt 19.16; Lk 18.18. Ho kato, dapochenii kone guritii mohmi tenka dupa, lubiidola, “Tonsḛrbo, ngo niihpe miichinii santḛrlamanii sango kappa dupa?” 26Mo mohmi lutii, “Nii hiila dapo ho ketola do? Niihtañpa no ridu?” 27#Rom 13.9; Gel 5.14; Jem 2.8. Ho mo lusitii, “No hento Attoh niika Pinii mi hikha niika ahha lo, ho hikha niika yallo lo, ho hikha niika tamo lo, ho hikha niika punyulo, ho niika ariapii mi atoh mika hensu henchañho.” 28#Lk 20.39. Ho mo mohmi lutii, “No ludiko jaho lukodo; siimi miito, ho no sankiñ doke.”
29Hojalo mo, atohmi lupya sudupa hiila, Jisu mi lutii, “Ho hu ngiika ariapii?” 30Jisu lusitii, “Miyu kone Jerusalem hokii Jeriko topa totii, ho mo diipyo niika alah ho ahtii, hiika atañ mohmi hitii ho mohmi miinetii, ho intiiku, mohmi shiikusiilya dopa apatela. 31Siisi matiirḛ nyibu kone hiika lembo ho totii; ho mo mohmi kappa lala lembo byahe yapa ingu giitii. 32Hii chulipa Lebait tiirḛ, mo hiika lengo ho ahbiila ho mohmi kappa lala, lembo byahe yapa impo biitii. 33#Lk 9.51-56; 17.11-19; Jn 4.4-42. Hojalo Samarita kone, mo myodi innii, ahtii nohna mo dotiinii; ho mo mohmi kappa lala, mo aroh ritii, 34ho mohko ahtii ho mohka une atañmi pubitii, kutu la roalha topubiidola; hiika hiibaho mo mohmi mohka achu-amyo ho gocha lala ho ude ho ahgiitii, ho mohmi kalyañ kadatii. 35Ho allo lohe yaho mo denarii#10.35 Denarii hii allo lohe ka ajho injo penye laliñ lala ho ude atoh mi bitii, lubiidola, ‘Mohmi kalyañ kada tolya; ho niimkane abu no miilya talyi, ngo bikur talyi kuke ngiika ahkur lyikuho.’ 36Siika hinge sokii, humi no hendo, ariapii pa lyido hiila hiika miyu diipyo nii alah hoka ahnii bopa?” 37Mo lutii, “Hii bocho huna mohmi aroh tiinii.” Ho Jisu mohmi lutii, “Inge ho sichuli miinge.”
Jisu Marta la Mary Nyiko Sohatii
38 #
Jn 12.1-3; 11.1-45. Siisi mohlu mohluka lembo ho ila dokele, mo lemba ho ahtii; ho nyimii kone Marta hiila armyañ mohmi mohka ude ho ahgiitii. 39Ho mohkii anu kone dutii Mary hiila, mo Attoh ka alih aruñho dutii ho mohka tonsḛr niimi tatii. 40Hojalo Marta henga henkhatii abuje miiho luho kopa; ho mo mohko ahla ho lutii, “Attoh, no kappa mapo ngiika anu ngiimi kontii miiho dopa apa bitii hiila? Mohmi luto ngiimi hembyuñ tote hiila.” 41#Lk 7.13. Hojalo Attoh lusitii mohmi, “Marta, Marta, no abuje drihpa henala ho ahiarela dosudo; 42drih kone annaja dorañke. Mary chidiko chibii doke, hiika hiimi mohkokii lara biila kemake.”
Currently Selected:
LUK 10: APATBSI
Highlight
Share
Copy
Want to have your highlights saved across all your devices? Sign up or sign in
Apatani New Testament - NITI GONTU
Copyright © The Bible Society of India, 2014.
Used by permission. All rights reserved worldwide.
