LUK 9

Jisu Alyañlenye Henjeajiñ Atañ mi Kiiniñ Biido

(Mt 10.5-15; Mk 6.7-13)

1 # Mt 10.1,5,7-11,14; Mk 6.7-12; Lk 10.4-11. Ho mo alyañlenye mi gyokuñ lala ho harchichike la otority nyimi bibiido igii atañmi miina naniipa ho achih-ahe mi miipya ladopa, 2ho mo kiiniñ biido Pinii ka raddeganda mi tonsḛr khenyo niipa ho miipya niipa. 3Ho mo mohlumi lutii, “Hang biilyayo nunuka myodi inkoho, panyi biiyo, chiru bayo, yatañ bayo, tiicko tiirḛ; ho abi benye balyayo. 4Ho huka ude ho nunu ahchi, hiikaho dutolya, ho hiikahokii into kulya. 5#Miin 13.51. Ho nohjalopa nunumi karii tama, nunuka ilyi kuho, nunuka alih daka dimḛr giiniimi pipa siito kulya mohlumi pyako pyagiñ naniiñpa.” 6Ho mohlu impe siitii ho lemba atañ ho intii, ayapuyu mi tonsḛr-khenyotii ho miipya nyatii kapakohe.

Herod ka Henko henpe nii

(Mt 14.1-12; Mk 6.14-29)

7 # Mt 14.1-2; Mk 6.14-16; Lk 9.19. Siisi hakhupiilye ako mika sangiinii Herod tapatii hikha lyiniiñmi, ho mo hendḛr lamatii, niimpalukoda tange lunyatii Jon shiiniiñ hokii turi doku hiila, 8tange Elija ahkur doku, ho tange ayu hoka khu nyibuhenii turi doku. 9#Lk 23.8. Herod lutii, “Jon mi ngo adiñ papato; hojalo hujana siika ngiika tapanii drih atañsi?” ho mo mohmi kappa nala metii.

Jisu Jarngohemi Diigo Hobiido

(Mt 14.13-21; Mk 6.30-44; Jn 6.1-14)

10 # Mk 6.30-31; Lk 10.17; Jn 1.44. Kiiniñkonii atañ mohlu ahkur biikula mohmi lukotii mohlu niihna miitiinii. Ho mo mohlumi ingiila ho Betsaida luniiñ citi ho ingiitiiku. 11#Mt 14.13-21; Mk 6.32-44; Jn 6.1-14; Mk 8.4-10. Miyu atañ hiimi chimpa lala, mohlu mohmi imbo montii; ho mohlumi ayapa ahto hiila kariila ho Pinii ka raddeganda mi mohlumi lukotii, ho hutiina miipya konañtiinii hiimi miipya bitii. 12Siisi allo loja kupa miitii; ho alyañlenye ahbiila ho mohmi lutii, “Miyu atañmi kiiniñ toku, lemba atañ ho gandasiiko ho, imi kiine dupa ho diigotango diike nendukupa; niimpalukoda ngunu so jirara myokoh hoke danii.” 13Hojalo mo mohlumi lutii, “Nunu mohlumi diisa iche bito tiika.” Mohlu lutii, Ngunuko yatañ pengo hela ho ngiiyyi sonye mi abuyapa nyima, nii dahepa ngunu ila hikha siika miyu atañpa diigo riitema. 14Niimpalukoda miyu jarngohepa datii. Ho mo lutii mohka henjeajiñ atañmi, “Mohlumi tonge tonge pa duha tote luto, alyañlyango hepa tongeho.” 15Ho mohlu hiila miitii, ho miilañ rumi duha kiinetii. 16#Lk 22.19; 24.30-31; Miin 2.42; 20.11; 27.35. Ho yatañ pyarngo hemi la ngiiyyi sonye mi lala la mo yapuñ hahoho kachatii, ho lyala la hiimi petutii, ho henjeajiñ atañmi bitii miyu atañmi kheke nendupa. 17Ho miilañru diitii ho diide patii. Ho mohlu diiletale mi tukuñ tiiku, yagii giilyañlenye petu peponii atañmi.

Pitar ka Jisu mi Hiila ku Hiilaka Goliñ Kuniiñ

(Mt 16.13-19; Mk 8.27-29)

18 # Mt 16.13-20; Mk 8.27-30; Jn 1.49; 11.27; 6.66-69. #Lk 3.21; 5.16; 6.12; 9.28; 11.1. Siisi hiila lyitii mo mohkontii kula dokele henjeajiñ atañ mo agiñho dabotii; ho mo mohlumi takatii, “Ngiimi miyuatañ hu hiila luda?” 19#Lk 9.9; Mk 9.11-13. Ho mohlu lusitii, “Jon Baptisma biniibo; hojalo tange ludo, Elija; ho tange, ayuhoka nyibuhenii kone turiturku doku hiila.” 20Ho mo mohlumi lutii, “Hojalo nunu ngiimi hu hiila ludu? Ho Pitar lusitii, Pinii ka Kristo.”

Jisu Mohka Heru Saniiñ la Shiisaniiñ Piigo mi Ludo

(Mt 16.20-28; Mk 8.30—9.1)

21Hojalo mo lutiñ biido ho lubiido mohlumi siika siimi kone mitrḛ luko lyayo hiila, 22#Mt 16.21; Mk 8.31; Lk 9.43-45; 18.31-34; 17.5. lubiidola, Miyu ka Oho abuje heru henkiñdo lodake, ho amiabañ atañlo, nyibu burii atañlo ho pagenii atañlo khiipa kokiñ doke, ho menko kendo, ho allo lohiñ niiho turku rikiñdo

23 # Mt 16.24-28; Mk 8.34—9.1. Ho mo lutii miilañ rumi, Hujalo ngiika kiiliñ ho matiirḛ ahbo monchi, atoh mi hempa siike nentorañ ho allo karmyañmi mohka pogyañ mi jobii kiineto ho ngiimi imboto. 24#Mt 10.38-39; Lk 14.27; 17.33; Jn 12.25. Niimpalukoda hujalopa atoh sango mi lyangur siichi hiimi alyu siikiñ do; ho hujalopa mohka sango mi ngiika piigopa alyu siichi, mo hiimi lyangur siikiñdo. 25Niimpalukoda niihpe miyu pa ayadonii mo matiirḛ hikha dohadolo mi biisu dojalo ho mohka sangomi alyu siido koda? 26#Mt 10.33; Lk 12.9; 1 Jn 2.28. Niimpalukoda hujalopa ngiipa la ngiika aguñpa hiinyañ talyi, hiipa miyu ka Oho tiirḛ hiinyañ talyi niida mo mohka tatukatu ho ahchiku ho Aba ka tatukatu ho darii miidopopi atañka agiñho. 27#Lk 22.18; Mt 10.23; 1 Tes 4.15-18; Jn 21.22. Hojalo Ngo nunumi jijeloda lukoso, so tange danyada nii dahepa mohlu Pinii ka raddeganda mi kappa tama mohlu shiiniiñ mi hempa kemake.

Lyiguhniiñ

(Mt 17.1-8; Mk 9.2-8)

28 # Mt 17.1-8; Mk 9.2-8; 2 Pit 1.17-18. #Lk 8.51; 3.21; 5.16; 6.12; 9.18; 11.1. Siisi siika kolobiisie sokii allo lopinye hepa dakulala mo Pitar mi ho Jon mi ho Jems mi mo agiñho ingiitii, ho putoo ho chagiitii kudupa. 29Ho mo kula dokele, mohka nyitumoru hii lyiguh ritii, ho mohka pulye giiniiñ hii hempḛr puloo ritii. 30#Miin 1.9-11. Ho kato, miyu anye mohmi luriila dami, Mose la Elija nyi, 31mo anye huda khada ahtii ho mohka insa kuniiñ mi lukotii, nii mina mo Jerusalem ho miipe kentiinii. 32#Jn 1.14. Siisi Pitar la ho hutiina mo agiñho datiinii hempḛr uropa imi la dotii, ho mohlu huro biikele mohlu mohka huda khada mi kappa biido ho miyu anye mo agiñho dapa. 33#Lk 5.5; 8.24,45; 9.49; 17.13. Ho miyu anye mohmi apatela inkupa miikele, Pitar lutii Jisu mi, Atoh, si aya doke ngunu so da; kiije ngunu tabyo pehiñhe pensa, penge niipa ho penge Mose pa ho penge Elija pa, mo nii hiila lutii hiimi chinsu mapa. 34Mo hiila siimi lukele, jomii lyiha biila ho mohlumi lyipu biitii; ho mohlu biisotii mohlu jomii ura ho ahkele. 35#Lk 3.22; Jn 12.28-30. Ho aguñ gonge hempḛr goropa jomii hokii luliñtii, lubiidola, “Siikasi ngiika Oho ke, ngiika kahenii; mo luniiñtatolya!” 36#Mt 17.9; Mk 9.9-10. Ho aguñ luku lala, Jisu kontii mi kappa biido ku. Ho mohlu adu abiñ matii ho kone mitrḛ hang luko matii hiika myodu ho niihna mohlu kappa tiinii.

Jisu Himme kone mi Diimmah Yajiyallo Hokii Miipya Biido

(Mt 17.14-18; Mk 9.14-27)

37 # Mt 17.14-18; Mk 9.14-27. Allo lohe yaho, mohlu putoo ayoh hokii toku kiile, hempḛr miyu taropa mohmi kappatii 38Ho kato, miyu kone miyuapur hokii gyutii, “Tonsḛrbo, ngo niimi yardu ngiika oho mi iche kaka tope, niimpalukoda mo ngiika oho kone kontii siike; 39ho kato, yajiyallo mohmi latu biidu, ho mo aluñ pada gyuridu; hiika hii mohmi hitiñ lobiitola biidu nii dahepa sarpu puliñ tama, ho mohmi miimii ripa miidu, ho cheche pasu mohmi apa sudu kunii. 40Ho ngo niika henjeajiñ atañmi mompa tope hiila yarto, hojalo mohlu mompa lama.” 41Jisu lusitii, “O henje manii ho ingyamiigya santuñ, nii dahepa Ngo nunu agiñho dachi ho nunumi hembyuñ talyi? Niika oho mi so ahgii.” 42Mo ahla dokele, igii mohmi siiche lotii ho hitiñ lotii. Hojalo Jisu kacho yajiyallo mi gatii, ho himme mi miipyatii, ho mohka aba mi bikur tiiku. 43#Mt 17.22-23; Mk 9.30-32; Lk 9.22; 18.31-34; 17.25. Ho miilañru hemur nyatii Pinii ka kahe miigo miiniiñmi.

Jisu Hiira Mohka Shiisa nii piigomi ludo

(Mt 17.22-23; Mk 9.30-32)

Hojalo miilañ ruka mohka kapane miiniiñmi hemur laka doho, mo lutii mohka henjeajiñ atañmi, 44“Siika aguñ siimi nunuka yaroo ho tage giito; niimpalukoda miyu ka Oho mi miyu atañka alah ho nembi kendoke.” 45Hojalo mohlu siika luniiñmi tachiñ matii, ho siika siimi mohluko hokii achuñ tola dotii; siimi mohlumi tachiñ madopa; ho mohlu siika luniiñ piigo siimi taka dupa biisonyatii.

Kayeja Hupe?

(Mt 18.1-5; Mk 9.33-37)

46 # Mt 18.1-5; Mk 9.33-37. Ho mohluka punkoho chesu ritii mohluka apur hokii huyape kayeja hiila. 47Hojalo Jisu mohluka ahha hoka heniiñmi hempa lala, mo himme kone mi gola lala ho mohluka aruñho atiitii, 48#Lk 10.16; Mt 10.40. ho mohlumi lutii, “Hujalopa siika himme siimi larii talyi hii ngiimi lariido, ho hujalo ngiimi larii talyi hii mohmitrḛ lariido huna ngiimi kiiniñ tiinii; niimpalukoda huna nunu miilañ ruka punkoho khiima janii hiike kahe jahii.”

Hujalopa Nunumi Chekhoma Hii Nunu Pake

(Mk 9.38-40)

49 # Mk 9.38-40; Lk 11.23. #Lk 5.5; 8.24,45; 9.33; 17.13. Jon lusitii, “Atoh, ngunu miyu konemi niika armyañ pa igii mompa dopa kappa tola, ho ngunu mohmi lutiñte, niimpalukoda mo ngunu agiñho imbo momma.” 50Hojalo Jisu mohmi lutii, “Mohmi lutiñyo; niimpalukoda mo nunumi chekho mako da nunupake.”

Samarita Lemba Jisu mi Lariimatii

51 # Mk 10.1; Lk 17.11; Jn 4.40-42. Allo hii tunii yaya tiiku niimpalukoda mohmi hahoho larii diikupa, mo Jerusalem ho inchi hiila henju tiiku. 52#Mt 10.5; Jn 4.4. Ho mo mohmi kapyo yapa puyu bakonii atañmi kiiniñtii, hii ila ho Samarita lemba ho ahtii, mohpa miimyo bidupa hiila; 53hojalo miyuatañ mohmi larii matii, niimpalukoda mohka ahha hii Jerusalem dalyi hentii. 54#Mk 3.17. Ho mohka henjeajiñ anye Jems la Jon nyi siimi kappa lala, mo anye lutii, “Attoh, no ngiinyi mi dariiganda hokiika yamu toniimi gyolii tote hiila hendoha ho mohlumi lyake nendupa?” 55Hojalo mo mokur biila ho mo anye mi gatii 56Ho mohlu lemba ponge yaho intii.

Jisu Mi Imbo Mondu Pakoda

(Mt 8.19-22)

57 # Mt 8.19-22. Mohlu lembo aruñho ila dokele, miyu kone mohmi lutii, “No noh inchi ngo niimi imbo talyi.” 58Ho Jisu mohmi lutii, “Yali atañ kii ubu dodu, yapuñ daka piita atañpa asi dodu; hojalo miyu ka Oho pa dinta dingi ko nyima.” 59Koneyami mo lutii, “Ngiimi imbo monto.” Hojalo mo lutii, “Attoh, ngiimi inke nenku rampe ho ngiika aba mi alie dupa.” 60Hojalo mo mohmi lutii, “Shiima mi apato mohmi atoh alie siike nento; hojalo niipa koda, inge ho Pinii ka raddeganda mi gyukohe.” 61#Pil 3.13. Koneya lubiido, “Ngo niimi imbo monchi, Attoh; hojalo ngiimi ngiika ude daka dunii atañmi ilyi ke hiila luko kiine rañpe.” 62Jisu mohmi lutii, “Kone hetḛr huna siih halemi alah gala kulala ho kaku nyachinii hii Pinii ka raddeganda ho ahdopa lyima.”

Currently Selected:

LUK 9: APATBSI

Highlight

Copy