METHU 25
25
Nyimuñ Alyañ hemika Lutiñnaniiñ
1 #
Lk 12.35. Ho dariiganda ka raddeganda mi nyimuñ alyañ hemi khiitiñ nantii hutiina mohluka muru mi biitola ho mihielasa bomi kappa dupa intiinii. 2Mohlu yangohe piichatii, ho yangohe piibitii. 3Piicha atañ mohluka muru mika biilyiho, mohlu kutu jobii matii mohlupa; 4hojalo piibi atañ mohluka muru agiñho pinta ho kutu miilañ jobiitii. 5Mihielasabo atañ nyibya ahma lyinii, mohlu miilañru imi niitetii ho imi nyatii. 6Hojalopa ayohliipa ho gyuritii, Kato, mihielasabo! Ago linyato mohmi karii dupa. 7Ho hikha hiika nyimuñ atañ guritii ho mohluka muru atañmi tige nyatii. 8Ho piicha atañ lutii piibi atañmi, Ngunumi nunuka kutu eche bipe, niimpalukoda ngunuka muru si mipa miilyila. 9Hojalopa piibi atañ lusitii, Rongkoda ngunu pala ho nunu pala khe diima; pyunii bokoya ingela ho nunupa riibii tiika. 10Ho mohluka riidu paka inne ho, mihielasabo ahtiiku, ho hutiina henju nyatiinii hii mo agiñho ahbotii mihiemilo lasu lyiho hoka apiñ diikoho; ho alyeh mi miitiñ tiiku. 11#Lk 13.25. Dahidamo lala nyimuñ tange hiitiirḛ ahtiiku, lunyado, Attoh, attoh, ngunupa miiko tope. 12Hojalo mo lusitii, Jijeloda, Ngo nunumi lukoso, Ngo nunumi chimake. 13Hopa hendila dato, niimpalukoda nunu chimake allo mi ho myodu mitrḛ.
Miira hinge mika Lutiñnaniiñ
(Lk 19.11-27)
14 #
Lk 19.11-27. Niimpalukoda si hiila lyinii chitañdo, miyu kone myodi indupa mohka miira atañmi gyola la ho mohka doniidanii mi mohlumi kabii tolya lutii; 15kone mi talents#25.15-28: Talent: Talent luniiñsi danyi nyalyañ hela nyangohe ajho innii ka injo mi abuya pengohe bitii, kone mi penye, kone mi pere, mohluka miilalula mi kabii dola bitii. Ho mo intii. 16Huna talents pengohe labii tiinii mo nyibya loda inkula ho hiilo kiiri miina nantii; ho mo pengohe abuyapa miiliñ biitii. 17Hii chulipa, talents penye labii botrḛ penye abuyapa miitii. 18Hojalopa huna talents pere kontii labii tiinii intiiku ho kiiddi hekko lala ho mohka atoh ka tiicko mi alitii. 19Siisi hempḛr myodu abuje hiiba ho hiika miira atañka atoh ahtiiku ho mohluka agiñho khiika siitiiku. 20Ho huna talents pengohe biitiinii hii ahtii, talents pengohe biibyañ liitii, lubiidola, Atoh, no ngiimi talents pengohe bi; si ngo pengohe talents abu dopa miibyañ tiike. 21Mohka atoh mohmi lutii, Aya miitii, denki ho lotii miira; no eche mitrḛ lotii biida, Ngo niimi abujemi kabii kiine talyi; kiije ahto niika atoh ka hempyo sokoso. 22Ho hiika talents penye biinii botrḛ aruñ ahhitii, lubiidola, Atoh, no ngiimi talents penye bihii; si ngo talents penye abuyapa miitii. 23Mohka atoh mohmi lutii, Aya miitii, denki ho lotii miira; no eche mitrḛ lotii biida, Ngo niimi abujemi kabii kiine talyi; kiije ahto niika atoh ka hempyo sokoso. 24Huna talent pere kontii biitii nii motrḛ aruñ ahhitii, lubiidola, Atoh, ngo chindu no luruluka miyu hiila, lilo mapa dola no amoo pidiñbo, ho no endi lilo mapa elyañ ladiñ laniibo; 25hopa ngo biisola, ho ngo ila ho niika talent mi kiiddi ho achuñto. Kato sike niikii. 26Ho mohka atoh mohmi lusitii, No diimmah ho assu miira! No chindo ngo lilo mapa dola amoo pidiñbo ho ngo endi liimapa elyañ ladiñ laniibo hiila? 27Hiila koda no ngiika tiicko mi kiirilya miina nantii koda, ho ngiika ahlyi kuho ngiimi ngiika tiicko agiñho atu lata la lado kupa. 28Hopa mohkokii talents mi latiiku, ho hiimi hiika pelyañhe biinii bomi bitii. 29#Mt 13.12; Mk 4.25; Lk 8.18. Niimpalukoda hukiina donii hiimi abuyaya bikiñdo, ho mohkii abuje dokiñdo; hojalo hukiina nyimanii, niihna mohko donii hiimi miilañ lara biikiñdo. 30#Mt 8.12; 22.13; Lk 13.28. Ho piigoama nii miira mi kamoramba doko ho jopa liibiido; hiiko miyuatañ khela ho mohluka aih mi nyensu la dokiñdo.
Kami Japaka Ayakacho Kakuniiñ
31 #
Mt 16.27; Mt 19.28. Miyu ka Oho ka huda khada ahlyi kuho, ho hikha miidopopi atañka agiñho, mo mohka tatu katu duta naniiñho dukiñdo. 32Mohka hataho hikha ganda daka miyuatañ dakuñ kendo, ho mo nenkhu nenche kendo subuñ sornii ka subuñ mika siibiñ kokiika nenkhu nencha jaho, 33ho mo subuñmi mohka lahbi dalyiho atii kendo, ho siibiñ atañmi mohka lahchi dalyiho. 34Ho Radde mohka lahbi dalyi hoka danii atañmi lukiñdo, Ahto, ngiika Aba ka Lyaniiñ atañ, nunupaka dohadolo mika pulyi jaho hokii ka miimyo tola donii raddeganda mi labii heku; 35niimpalukoda ngiika haya lyiho no ngiimi diigo bihii, ngiika yasie tana lyiho no ngiimi yasie bihii, ngiika nyibo pa lyila ahlyi ho no ngiimi kariine, 36Ngo arapa dato ho no ngiimi pulye agii, ngo achihla doto no ngiimi kalyañ ha, ngo patiihude ho duto ho no ngiiko ahhii. 37Ho denki atañ mohmi luko lusi kendo, Attoh, niido ngunu niimi haya dopa kappa ho niimi diigo bihii, malo yasie tana lyiho ho niimi yasie bihii? 38Ho niido niimi ngunu nyibopa kappa ho niimi gyolii, malo arapa kappa ho niimi pulye agii? 39Ho niido ngunu niimi achih dopa kappa malo patiihude ho niimi kaha? 40Ho Radde mohlumi luko lusi kendo, Jijeloda, Ngo nunumi lukoso, nunuka siika khiima janii ngiika anubarmii atañ mika kalyañ nii hii, nunu ngiimi ke kalyañ donii. 41Hiika hiiba ho mo lukiñdo mohka lahchi dalyi hoka danii atañmi, Ngiiko hokii insa nyato, nunu bekonii atañ, yamu lyame lama lyako ho igii la mohka miidopopi atañ paka miimyo tola doko; 42niimpalukoda ngiika haya laka daho nunu ngiimi diigo bima, ngiika yasie tana lyiho nunu ngiimi yasie bima, 43Ngiika nyibopa daho nunu ngiimi gyoliima, arapa daho nunu ngiimi pulye agiima, achihla doto, patiihude ho duto ho nunu ngiimi kahama. 44Ho mo lutrḛ luko lusi kendo, Attoh, niido ngunu niimi haya dopa kappa to malo yasie tana dopa malo nyibopa malo arapa malo achih dopa malo pattiih udeho, ho niimi ngunu kalyañ mato? 45Ho mo lusi kendo mohlumi, Jijeloda, Ngo nunumi lukoso, nunu ngiika siika khiimaniija anubarmii kone mi kalyañ tama lutii koda hii ngiimi ke kalyañ tama lutiinii. 46Ho mohlu mungu mapa ka miikhiiñ ko gandaho inkiñdo, hojalo denki atañ santḛrlamanii sango dokoho.
Currently Selected:
METHU 25: APATBSI
Highlight
Share
Copy
Want to have your highlights saved across all your devices? Sign up or sign in
Apatani New Testament - NITI GONTU
Copyright © The Bible Society of India, 2014.
Used by permission. All rights reserved worldwide.
