METHU 26

Jisu Mika Rhuniiñ

(Mk 14.1,2; Lk 22.1,2; Jn 11.45-53)

1 # Mt 7.28; 11.1; 13.53; 19.1. Jisu siika kolobiisie nii atañmi luja kula la, mo lutii mohka henjeajiñ atañmi, 2“Nunu chindo allo lonye hiiba ho Impobiiniiñ dituñ sokiñdo, ho miyu ka Oho mi pogyañ lohe leda dopa nembi kendo.”

3Ho nyibu burii atañ la miyu atañka amiabañ atañ dakuñ nyatii bukuñ nyibu ka raddeduko ho, humina Kaipas hiila gyotiinii, 4ho lukuñ siitii niitañpana Jisu mi amuhpa halii lala pattiih bochinii ho mohmi menchinii. 5Hojalo mohlu lutii, “Butiiapiñ diido homasa, hiilamakoda miyuatañ rukha adu nyakiñ doke.”

Jisu mi Betany ho Arrḛyartii

(Mk 14.3-9; Jn 12.1-8)

6 # Mk 14.3-9; Jn 12.1-8; Lk 7.36-38. Siisi Jisu Betany ho Saimon tahikoya giinii boka ude ho dukele, 7annii akha kone mohko ahtii alabaster pinchu ho hempḛr khiiniiñ kutu biitola, ho mo hiika hiimi Jisu ka dinta ho toputii, mohka diitananii ho dupa. 8Ho hiimi henjeajiñ atañ kappa lala, mohlu kakhatii, lubiidola, “Niimpa miilyi miipya danii? 9Siika kutu mi abuje tiicko pa pyula kendo, ho arroatu atañmi bila kentii.” 10Hojalo Jisu, siimi hempa biitola, mohlumi lutii, “Niimpa nunu annii akha mi ahiare miipada? Niimpalukoda mo ngiipa aya miigo miibida. 11Nunu agiñho kiirañ arroatu dakiñ doke, hojalo nunu ngiimi kiirañ kappa kemake. 12#Jn 19.40. Siika kutu mi ngiika apo topu biidola mo ngiimika alie lyiho hopake miimyo danii. 13Jijeloda, Ngo nunumi lukoso, nohjalo siika ayapuyu mi tonsḛrkhenyo talyi siika kiiddidotrḛ so, niihna mo miitiinii hiimi tiirḛ luko kendoke mohmi hempa hengi naniiñpa.”

Judas Jisu mi Talubalo Dupa Talii biido

(Mk 14.10,11; Lk 22.3-6)

14 # Mk 14.10-11; Lk 22.3-6. Hiika alyañlenye hokii kone, Judas Iskariot luniiñbo, nyibu burii atañko intii 15mo lutii, “Nii bichi nunu ngiimi ngo matiirḛ Jisu mi nunumi nembi dokoda?” Ho mohlu mohmi rupu posa hikhañhe bitii. 16Ho hiika myodu jaho hokii mo myoduaya mela dotii mohmi talubalo dupa hiila.

Jisu Mohka Henjeajiñ Atañ Agiñho Impobiiniiñ Dituñ ka Diigo Diibodo

(Mk 14.12-21; Lk 22.7-13,21-23; Jn 13.21-30)

17 # Mk 14.12-16; Lk 22.7-13. Siisi Ipomiiyo maniiñ Yatañ dituñ ka sotu allo ho henjeajiñ atañ Jisu ko ahtii, lubiidola, “No ngunumi niipa impobiiniiñ dituñ ka diigo mi dudupa miimyo hete hiila ludu”? 18#Mt 26.45; Jn 7.6; 12.23; 13.1; 17.1. Mo lutii, “Citi ho miyu kone ko ahngela, ho mohmi lunge, ‘Tonsḛrbo ludo, ngiika myodu tunii dokuke; Ngo impobiiniiñ dituñmi niika ude ho ngiika henjeajiñ agiñho sochi.’” 19#Mt 21.6. Ho henjeajiñ atañ Jisu ka mohlumi luniiñ chulipa miitii, ho mohlu miimyotii impobiiniiñ dituñpa.

20 # Mk 14.17-21; Lk 22.14,21-23; Jn 13.21-30. Alyiñdalyi kukele, mo alyañlenye henjeajiñ atañ agiñho diibola dutii; 21ho mohlu diila dopa, mo lutii, “Jijeloda, Ngo nunumi lukoso, nunu kokii kone ngiimi talubalo kendo.” 22Ho mohlu hempḛr heru nyatii, ho koneabi mohmi lutii, “Attoh ngo masuha?” 23Mo lukotii, “Hii mohka alah mi ngiika agiñho pakoo hoka niihi doniibo, ngiimi talubalo kendo. 24#Lk 24.25; 1 Kor 15.3; Miin 17.2-3; Mt 18.7. Niimpalukoda miyu ka Oho hii nii hiila mohmi ketola do hiila lyikiñdo, hojalo hiika miyu mi aiya hiila hembido huna miyu ka Oho mi talubalo kendo nii! Hiika miyu pa wiinga buko matii koda ya aya yakiñne.” 25Judas, mohmika talubalobo, lutii, “Ngo masuha, Attoh?” Jisu mohmi lutii, No ludonii hiilasiilo.

Attoh Apiñ

(Mk 14.22-26; Lk 22.14-20; 1 Kor 11.23-25)

26 # Mk 14.22-25; Lk 22.17-19; 1 Kor 10.16; 11.23-26; Mt 14.19; 15.36. Siisi mohlu diila dokele, Jisu yatañ mi tula la, ho lyantii, ho hiimi petutii, ho hiimi henjeajiñ atañmi bitii ho lutii, “Lariito, diito; siikasi ngiika apoke” 27Ho mo turla mi jolala, ho payapacho luku lala mohlumi bitii, lubiido, miilañru, siimi tanto; 28Niimpalukoda Siikasi ngiika hemmesiiniiñ ka ai ke, abuje miyuatañ paka bipa biniiñ mohluka ingyamiigya mi hello bina naniipa. 29Ngo nunumi lukoso Ngo hiira ronge hetḛr tante kuma siika roahee ka alha siimi hiika allo lohepa nii dahepa Ngo Aba ka raddeganda ho nunu agiñho nitipa tantema. 30#Mk 14.26-31; Lk 22.33-34,39; Jn 14.31; 18.1; 13.36-38. Ho mohlu bariebiisie sikulala, mohlu Olives Putoo ho chatii.

Jisu Pitar Ka Mapa Niimi Luko Lumyo Biido

(Mk 14.27-31; Lk 22.31-34; Jn 13.36-38)

31Ho Jisu mohlumi lutii, “Nunu miilañru hargii nyakiñdo ngiika piigopa siho ayohso; niimpalukoda hiila ketolado, ‘Ngo subuñ sornii bomi hichi, ho subuñ atañ harpya hasa nyakiñdo’. 32#Mt 28.16. Hojalo Ngo turiturku biikula, Ngo nunumi impyo yapa Galili ho inchi.” 33Pitar mohmi lutii, “Miilañru niika piigopa harja gussu nejalo, Ngo iche hetḛr hargii tama.” 34Jisu mohmi lutii, “Jijeloda, Ngo niimi lukoso, siho ayoh jaho, paro khoma rampa, no ngiimi rohiñhe mapah kendoke.” 35Pitar mohmi lutii, “Ngo niika agiñho siibii lyijalo, ngo niimi mapah tama.” Ho hiichuli pa hikha henjeajiñ atañ tiirḛ lutii.

Jisu Getsemani ho Kudo

(Mk 14.32-42; Lk 22.39-46)

36 # Mk 14.32-42; Lk 22.40-46. Ho Jisu mohluka agiñho Getsemani hiila lunii gandaho intii, ho mo lutii mohka henjeajiñ atañmi, “So duto, ngo inkaso ahhila ho kuchike.” 37Ho mo agiñho Pitar la Zebedi ka oho anye mi ingiitii, ho hempḛr heru ritii ho henga henkha ritii. 38#Jn 12.27; Hib 5.7-8. Ho mo mohlumi lutii, “Ngiika yallosi hempḛr herudo, siida tado niihtañ do; so dulya tolya, ho ngiika agiñho hurola dulyato.” 39#Jn 18.11; Mt 20.22. Ho ichuche ahhila mo kiiddi ho chukila ho kutii, “Ngiika Aba, miila kendo milo, siika turla siimi ngiimi impo biike nentope, hojalopa, ngiika hengko homapa, niika hengko hotiika.” 40Ho mo limbii kukele ho henjeajiñ atañmi imila dopa kappatii; ho mo lutii Pitar mi, “Oha, No gunta tahe hetrḛ hurola dula ma ha ngiika agiñho? 41#Mt 6.13; Lk 11.4. Hurola duto ho kuto nunuko tenkalarka ahma yapa; yajiyallo si tasu dope hensu do, hojalo asiialyo sike ajju donii.” 42#Jn 4.34; 5.30; 6.38. Hiira, ronye niipa, mo ahkula ho kutii, Ngiika Aba, siika heru hensa niisi mi ngo hemapa lyila kema milo niika henko ho lyida kiineto. 43Ho hiira rongeta mo linkutii ho mohlumi imila dopa kappatii, niimpalukoda mohluka amee hempḛr imi nantii. 44Hopa, mohlumi hiira apatela, mo ahkurla rohiñ niipa kutii, luniiñmi luti biidola. 45#Mt 26.18; Jn 12.23; 13.1; 17.1. Ho mo henjeajiñ atañ ko ahbiila ho mohlumi lutii, “Nunu siisi lohe imila dorañnii ho nunu hemmola dunii? Kato, myodu ahdo kuke; miyu ka Oho mi ingyamiigya miyu atañka alah ho talubalo tiikuke. 46Gurito, Kiije inkusa; kato, ngiimika talubalobo si hachokiilo.”

Jisu Mika Latuniiñ

(Mk 14.43-50; Lk 22.47-53; Jn 18.3-12)

47 # Mk 14.43-50; Lk 22.47-53; Jn 18.2-11. Mohka lula dorañpa, Judas ahtii, alyañlenye hokii kone, ho mohka agiñho hempḛr miyu taropa ilyo ho gyambo pana nanii biitola, nyibu burii atañ la miyu atañka amiabañ atañ kokii. 48Siisi talubalobo mohlumi kakiñ kehotii, lubiidola, “Ngo humina mochu talyinii hiika miyu ke; mohmi latuto.” 49Ho mo Jisu ka aruñho ohepada ahtii ho lutii, “Ayasiidolo, Attoh!” Ho mohmi mochutii. 50#Mt 20.13; 22.12. Jisu mohmi lutii, “Ajiñsi, niimpa nunu so da?” Ho mohlu aruñ ahhila ho Jisu mi alah gatu lala mohmi latutii. 51Ho kato, Jisu agiñ hoka dabo monii kone mohka alah lyuliñla ilyo mi seliñ lala, ho bukuñ nyibu ka miira mi tupa lilala, ho mohka yaroo mi papa lintii. 52#Mih 13.10. Ho Jisu mohmi lutii, “Niika ilyo mi hubyu ho liilii giitoku; niimpalukoda huna ilyo biinya danii hii ilyo hoke shiiha nyakiñ donii. 53Nunu hiila henduha Ngo ngiika Aba mi gyola kema hiila, ho mo ronge pada miidopopi tolyañ lenye mi abu yapa nembi diima hendoha? 54Hojalopa niihtañpa piniipota hoka donii hii lyipe kendo? hiimi lyipe kiine dupa hiila.” 55#Lk 19.47; 21.37. Hiika myodu ho Jisu miyu atañmi lutii, “Nunu diipyo niimika miichañho miipa ahdunii, ilyo la gyambo pana naniimi biitola ngiimi latupa ahdunii? Allo loliñ karmyañmi ngo piniiude ho dula tonsḛrto, ho nunu ngiimi latuma. 56Hojalopa hikha siika lyiniiñsi, nyibuhenii atañka piniipota mi lyipe kiine dupa.” Ho hikha mohka henjeajiñ atañ mohmi apatela ho hargiinyatii

Jisu Bulyañ Apurho

(Mk 14.53-65; Lk 22.54,55,63-71; Jn 18.13,14,19-24)

57 # Mk 14.53-72; Lk 22.54-71; Jn 18.12-27. Ho hutiina Jisu mi latu nyatiinii mohmi bukuñ nyibu Kaipas ko ahgiitii, nohna pagenii atañ ho amiabañ atañ dukuñ nyatiinii. 58Hojalo Pitar adhopa mohmi injo montii, bukuñ nyibu ka lengo aruñ lohepa, ho uraho ahla mo dagur biinii agiñho dutii kamikalo lohe kadupa hiila. 59Siisi nyibu burii atañ la hikha bulyañ atañ Jisu mi mendupa hiila mohmika lugiñnanii koneja dokoda hiila mela dotii, 60hojalo mohlu kone hetḛr khiilii lamatii, abuje amuhpa haliinii ahnya siitii. Kamikalo jaho anye ahtii. 61#Jn 2.19. ho lutii, “Siika miyusi lune, ‘Ngo Pinii ka ude mi pyadu lakiñdo, ho allo lohiñ heho pencha lakiñdo.’” 62Ho bukuñ nyibu guritii, ho lutii, Niiko hang lusi sanii nyimaha? Si niihpe siika miyu atañka niimi ka halii niisi? 63#Mt 27.11; Jn 18.33. Hojalopa Jisu adumatii. Ho bukuñ nyibu mohmi lutii, “Ngo niimi turnii Pinii armyañ pa lyarlyike, ngunumi lukope no matiirḛ Kristo, Pinii ka Oho milo.” 64Jisu mohmi lutii, “No ludonii hiila siilo. Hojalopa ngo nunumi lukoso, siisikiija nunu miyu ka Oho mi Pinii ka lahbi alah ho dupa kappa kendo harchichike mi giitola, ho dariiganda daka jomii ho ahla dopa kappa kendo.” 65Ho bukuñ nyibu mohka tarii mi sarche siibiido, ho lutii, “Mo nipa dake. Niimpape ngunu hiira haki anna dorañnii? No siisi mohka nipa niimi tapa biine. 66Nii hiila ayakacho katii?” Mohlu lusitii, “Mo menko dopa lyidoke.” 67Ho mohlu Jisu ka nyimo ho chukḛr chuputii, ho mohmi kiibiido; ho tange mohmi pitatii, 68lubiido, Ngunumi Nyibuhenkato, no Kristo! Hupe si niimika kiiniibo?

Pitar Jisu Mi Mapah Biido

(Mk 14.66-72; Lk 22.56-62; Jn 18.15-18,25-27)

69Siisi Pitar byago ka agoho dutii. Ho nyimii miira mohka aruñ ahtii, ho lutii, “No tiirḛ Galili daka Jisu agiñho dane.” 70Hojalopa mo mapah tii hikha miyu ka hataho, lubiidola, “Ngo tachiñma no nii lusa niimipe ludanii.” 71Ho mo simbya ho linkele, miira koneya mohmi kappatii, ho mo lutii aruñare hoka danii atañmi, “Siika miyu sitrḛ Nazaret daka Jisu agiñho dabone.” 72Ho hiira mo mapahtii hemme biidola, “Ngo kachiñ makeya siika miyumi.” 73Iche dahidamo lala aruñare hoka danii atañ ahbiila ho lutii Pitar mi, “Notiirḛ mohluka agiñ hoka dabo monii koneke, niimpalukoda niika luniiñlo no talubalo siibiido.” 74Ho mo atoh besu biidola ho hemme biidola lutii, “Ngo siika miyu mi kachiñ make ya.” Ho ohepada paro khoridatii. 75#Mt 26.34. Ho Pitar Jisu ka luniiñmi hempa ritii, “Paro khoma rampa, no ngiimi rohiñhe mapah kendo.” Ho mo hempḛr uropa khejo biila intiiku.

Currently Selected:

METHU 26: APATBSI

Highlight

Copy