TIRTÔNHEI SINTHO 5
5
Anania neh Sapfiri
1Mi dang khatkah, arming Anania a om a, a nupui kha Sapfiri a nit. Anni khan an rinêng a zuar a, 2a man khah a nupui riatpuiin anmani ta rangin a ṭhen a thup a, a dang khah ichôiin tirtônhei kutah a hong lan a.
3Nikhomsela, Peteran a ziangah, “Anani, Rithla Rithiang ilêm rang neh rinêng man a ṭhen ithup rangin ithôm Soitana ni lungrilah #5:3 ‘Soitanan nang a îthlêm hi,’ ‘Ni lungril Soitana ni înlua,’ iti thei a nit. richam ni înnei hi? 4Rinêng khah ni zuar mâkah kha ni ta ni mak im a? Ni zuar nung khomin a man khah ner cham chama om ni mak im a? Ithôm hingkana thil itho ranga lungril ni irput hi? Miriam nî lêm ni mak a, Pathian nî lêm kêng ai nit,” a ti a.
5Ananian kha ṭong khah a riat kaneh chu â lîr a, a thi tâk a; khanchu, kha thurchi ria murdi khan chu an ṭi tak tak tâk a. 6Khante, tlangvâlhei an hong a, an tuam a, an rizôn suak a, an phûm tâk a.
7Dârkâr ithumkah vêl nungah chu a nupui khah thil omzia reh loiin a hong lût a. 8Petera khan a ziangah, “Ne ril ta, rinêng man nin imu khah hi zâkah bang hîm ai nit?” a ti a.
Ani khan, “O, hi zâkah bang hih a nit,” a ti a.
9Khanchu, Petera khan, “Ithôm Pumapa Rithla ifia tuma ni pasal neh nin înrual? Ringai roh, ni pasal iphûmtuhei kepha khah inkotah a zuang om tâk, nang khom nang rizôn suak an ti,” a ti a.
10Khanungchu, voikarengin Petera ke bulah khan â lîr a, a thi tâk a. Khante, tlangvâlhei khah an hong lût a, ani khah â thi saiin an hong mu a, an rizôn suak a, a pasal kôlah an phûm sa tâk a. 11Koindang pumpui neh mi dang kha thurchi ria murdi khan an ṭi tak tak tâk a.
Thilrikhêl neh sinrikhêl an sin
12Tirtônhei khan mipuihei lâiah thilrikhêl neh sinrikhêl itam takkah an sin mai a. Annihei chu an rêngkan lunginrual takkan Solomona Thapukah khan an inkhôm ngai a. 13An lâiah khan putianga mi tute ṭang ngam maka chu, mihei khan anni khah an ringai inrisâng tak tak a. 14Pumapa iamtuhei kha chu, nupang ipa, an lâia ṭang an hong ribôk tîr tîr a. 15Khaangkan, daminohei khom lamilianheiah an rizôn suak a, zâlmunheiah, puanthaheiah an inzâl a. Petera rilîm khan a thleng rilôi zoron an lâia ṭhenka lua arkhû theina rangin an iti a nit.#TS.19:11,12; Mk.6:56. 16Jerusalem kôl kianga khuaheia rithok khomin mipuihei an hong a, daminohei, ramrili imanhei an hong ṭhui a; an rêngkan an hong dam khai tâk a.
Tirtônhei nuam an lo
17Khanchu, Thiampu Laltak neh a champui, Sadukai pôla mihei murdi khan tirtônhei khah an inar tak tak a, an chunga kut itlâk an nuam tâk a. 18Khaangkan, tirtônhei khah an man a, vântlâng tâng inah an khum a.
19Khannisela, zânah Pumapa vântirtôn khatkan tâng inkhârhei khah a zuang iong a, a ṭhui suak a; an ziangah, 20“Fe unla, Tempilah va ngîr unla, mipuihei ziangah hi ringna thu murdi hih va sîr ta rei,” a ti a. 21Kha thu khah an zôm a, khua a vâr kaneh chu Tempilah an lût a, mi an inrisei tâk a.
Khante, Thiampu Laltak neh a champuihei khah an hong a, Juda ulianhei murdi kha Roirêlna lian inei rangin an koi bûm a, tirtônhei kha va ṭhui rangin tâng inah mi an tir a. 22Khannisela, an mi tirhei khah an va tlungin chu tâng inah khan tirtônhei khah mu khâi mak a; khanchu, an hong kîr nôk a, 23“Tâng in kha rikhâr ṭiankan, â ngâkhei khom inkhâr bula ngirin kin mu a; nikhomsela, kin hei iong a, a sungah tute mu mang ung e,” itin an hong iril a. 24Tempil vêngtuhei iruitu neh thiampu lalhein kha thu khah an riatin chu “Tirtônhei khah im an ichang tâk?” itin an ringai arkhêl tak tak a. 25Kha lâi takah khan mi khatkah a hong a, an ziangah, “Ringai ta u, tâng ina mi nin ikhumhei khan Tempilah mi an inrisei mai,” itin a hong iril a. 26Khanchu, Tempil vêngtuhei iruitu khah a champuihei neh an va fe a, tirtônhei khah zâlrât mang loiin an hong ṭhui a, zâlrâta an manin chu mipuiin lungin an dêng lôiin iti an iṭi a nit.
27Khante, an hong ṭhui ithlunin chu Sanhedrin makungah an inngîr a. Thiampu Laltakin an ziangah, 28“Hi miriam rimingah hin inrisei tlak khâi loi rangin ṭong ikhir tak nangni kin pêk kha; khannisela, ringai ta u, nin thu inriseiin Jerusalem pumpui nin însip zit tâk hi; kha mi thina khah keimani nen pêl nin itum a nit hi te,” itin a sualsân a.#Mat.27:25.
29Nikhomsela, Petera neh tirtôn danghei khan, “Miriam thu nêkan Pathian thu kin izôm rang a nit.#TS.4:19; Dan.3:18. 30Krosa ihêmdea nin ithat Jisua khah ei chibulhei Pathian khan a kâiithoi nôk tâk a.#Dn nik.21:22. 31Israelhei sual inrileta izâ an nit theina rangin Amah ngêi khah Pathianin Rêng neh Saninringtu rangin a kut changtiang a chôiinrisâng tâk a. 32A thu zômtuhei zianga Pathian ipêk Rithla Rithiang neh keimani hih kha thu repuituhei kin nit,” itin an sâm a.#Lk.24:48; Joh.15:26,27.
33Khante, roirêltuhei khan kha thu khah an riatin chu an ning a thik tak tak a, tirtônhei khah ithat an tum tâk a. 34Nikhomsela, an lâia Farisai khatkah, arming Gamaliela, Dân inriseitu, mi tinin marit an itho ngai khah â ding a, tirtônhei khah la sua rangin thu a pêk a. 35Khanchu, roirêltuhei ziangah khan, “Ki Israel champuihei o, hi mihei chunga thil itho nin itumah hin ridîn rei. 36Maton khomah khan Theoda kha mi roinpui tak inia riben a hong a, mi rizalikah vêlin an zui iti nin riat a. Nikhomsela, ani khah ithatin a om a, â nung izuituhei murdi khom an rêngkan an rithekindar chit a, îte chang khâi mak. 37Kha nung khomah khan, riteppui lâiah khan, Galili rama mi Juda khah a hong nôk a, ani khom khan a tiang mi itam takkah arkuai nôk a; nikhomsela, ani khom ithatin a om nôk a, â nung izuituhei murdi khom an rêngkan an rithekindar chit a. 38Khasikin, atûnah hin hi chungchângah hin nangni kî ti a nit, hi mihei hih tôn no unla, om ṭian riseh; hi an thiltumhei neh an sinthohei hih miriama rithok a nitin chu rimang a ti.#Mat.15:13. 39Khannisela, Pathiana rithok a nitin chu inrimang thei no tin u; Pathian idoi kêng nin init rang,” a ti a.
Khanchu, Gamaliela thu khah an ipom tâk a. 40Tirtônhei khah an koi a, an itôk a, Jisua riminga thu sîr tlak khâi loi rangin thu an pêk a, an isua tâk a. 41Khante, roirêltuhei lâia rithoka an suak lâiah khan, Jisua riming sika mualphoina tuang tlâkin Pathianin ân kung sikin an lôm tak tak a. 42Nîn tin, Tempilah neh insungheiah Jisua kha Mesia chu a nit thu sîr neh inrisei bâng ngai mak a.
Currently Selected:
TIRTÔNHEI SINTHO 5: BIATBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More
