TIRTÔNHEI SINTHO 8
8
1Saula khom khan Stefana an ithat khah a îhampui a nit.
Saulan Koindanghei a nuam a lona
Kha nikhuaa rithokin chu Jerusalema koindang khah natinsat takka nuamlona an tuang zel tâk a. Tirtônhei ti no chu iamtuhei khah Judai neh Samari ram kho tinah an rithekindar chit tâk a.#TS.7:58; 11:19; 22:20.
2Khante, Pathiana ripeh mi ṭhenkahein Stefanah khah an phûm a, iṭha takkah rengin an ṭâ a.
3Nikhomsela, Saula khan chu koindang inboi a tum a, in tinah a lût a, a nupang a pan a nûk isua a, tâng inheiah a khum a.#TS.9:1; 22:4,5; 26:9-11.
Samari ramah Thurchi Ṭha isîrin a om
4Khante, iamtu kho tina rithekhei khah mun tinah an fe a, Thurchi Ṭha an isîr thiai a. 5Filipa khah Samari khopuiah a fe a, an ziangah Mesia thurchi â sîr a. 6Mipuihei khan a thu sîr khah an riat a, a sinrikhêl sinhei an mun chu a thusîrhei khah iṭha takkah rengin an ikuar an sung a. 7Ramrilihei khah iring takka khêkin mi itam takka sunga rithokin an hong suak a, izenghei neh kebâihei itam takkah khom an hong dam tâk a. 8Khasikin, kha khua khah an lôm tak tak tâk a. #Joh.4:40-42.
9Kha khuaah khan mi khatkah, arming Simona an iti, dôiithiam a om a. Mi roinpui tak arti ngai a, Samari mihei khah a dôi imangin ringai rikhêl tak takkan a lei siam tâk ngai a. 10Khasikin, mi murdîn, â chîn taka rithoka â liantak idênin a ṭong an ringai ngai a, “Hi mi hih Pathian sinthotheina, ‘Sinthotheina Roinpui’ an iti khah a nit hi,” an ti a. 11A dôi imangin an ringai a lei inrikhêl pêk tak tak ngai sikin a ṭong an irngai ngai a nit. 12Khannisela, Pathian Ram Thurchi Ṭha neh Jisua Krista riming Filipa îsîr khah an iam tâk sikin, a nupang a pan baptisma an chang tâk a. 13Simona ngêi khomin a iam sa tâk a; baptisma a chang zoi ata chu Filipa ziangah a om mai a, thilrikhêl neh sinrikhêl ai sinhei khah a mu a, arkhêl a ti tak tak ngai a.
14Jerusalema tirtôn iomhei khan Samari khuaa mihein Pathian thu an iam tâk iti an riatin chu an ziangah Petera neh Johana an tir a. 15Anni khah an tlungin chu iamtuhein Rithla Rithiang an dong theina rangin an ṭongṭai pêk a. 16An lâia tutên Rithla Rithiang kha la dong mak a, Pumapa Jisua riminga baptisma an ichang bang khah a la nit. 17Khanchu, Petera neh Johana khan an lu chungah kut an ringat a, Rithla Rithiang an dong tâk a.#1 Tim.4:14.
18Tirtônhei kut ringat sika Rithla Rithiang ipe a nit iti Simona khan a mu a. 19Khanchu, Petera neh Johana khah sum ipe a tum a, an ziangah, “Hi sinthotheina hih kei khom ne peh sa rei, tu chungah khom ki kut ker ngatna kipah Rithla Rithiang an dong theina rangin,” a ti a.
20Khannisela, Peteran a ziangah, “Nangmah neh ni sum hih rimang riseh, Pathian thiltlongpêk suma richo ni tum sikin. 21Ni lungril riput dân Pathian mitmuah a fel no sikin hi sinah hin ṭangna neh rangtum nî nei ino a nit.#Lap.18:37; Efes.5:5. 22Nikhomsela, ni sual hih rilet inla, Pumapa ziangah ṭongṭai inla, ni ngaituana sual hih nang a la zâ duai khom a nit thei. 23Rizukna lungril iseh tak ner put a, sualin nang a khuap khap iti kî mu a nit,” a ti a.#Dn nik.29:18; Isa.58:6; Heb.12:15.
24Khante, Simona khan Petera neh Johana ziangah, “Nin thil tihei hih khatkah khom ki chungah a tlung nona rangin nangmanin Pumapa ziangah ne ṭongṭai pêk rei,” a ti a.
25Khanchu, Petera neh Johana khan anmani thurchi neh Pumapa thu an isîr zoiin chu Jerusalemah an kîr nôk tâk a. An fe malamah khan Samari rama khua tam takkahei ziangah Thurchi Ṭha an isîr thiai a.
Filipa neh Ethiopia milian
26Pumapa itir vântirtôn khan Filipa â sôn a, “Risiam inla, Jerusalema rithoka Gaza khua zu sun, sim tiang ramchâr pâlna lampuiah khan#8:26 Mss ṭhenkatah, ‘Ramchâr lampui ram’ itih a nit. fe roh,” a ti a. (Atûnah hin chu hi lampui hih imang ni khâi mak e.) 27Khanchu, arsiam a, a fe tâk a. Khante, Ethiopia thâinuzel khatkah, Ethiopia rêngnu Kandaki nuaia milian, archon murdi enkoltu kha Jerusalemah Pathian isôn rangin a hang fe a. 28A kîr nôk tiangah khan a tâli chunga ṭhung pumin zânthla Isaia lekhabu a tep a. 29Khanchu, Rithla Rithiangin Filipa ziangah, “Fen la; tâli so va nâi roh,” a ti a. 30Khanchu, Filipa khah a va tlân a, thâinuzelin zânthla Isaia lekhabu ai tep khah a riat a, “Nî tep khah a omzia ni riat thei im?” itin ardon a.
31Ani khan, “Tutên ne rilfia pêk loiin ingkam ki riat thei ranga?” a ti a. Khanchu, Filipa khah a kôla hang iṭhung rangin a fial a.#Joh.16:13. 32Pathian Thubu ai tep khah amahih a nit:
“Bera ithat rang angkan ani khah an ṭhui a,
Berate a mul imêttu maah ai dâirek angkan,
Ani khomin a bâi âng mak.#Isa.53:7,8 (LXX).
33Mualphoi isak a nit a, dikino takka rêl pêk a nit;
Archihei thurchi tu ngânin im ril tâng a ta?
Rammuala rithokin a ringna ilah pêk a nit tâk a,”
iti hi.
34Khante, thâinuzel khan Filipa ziangah, “Zânthla hin tu thurchi tak îm a îsîr? Ama thurchîm mi dang thurchîm? Ne ril ta,” a ti a. 35Khanchu, Filipa khan hi Pathian Thubu-a phutin Jisua Krista Thurchi Ṭha â ril tâk a.
36Khangkana an fe mai lâiah khan tui omna an tlung a, mi lianah khan, “En ta, hin tui a om a, baptisma ki changna rangin im ne khap a om a?” a ti a. 37Filipa khan, “Ni lungril murdin ni iamin chu ni chang thei,” a ti pêk a.
Ani khan, “Ki iam, Jisua Krista chu Pathian Naipa a nit iti ki iam,” a ti a. #TS.10:47. 38Khanchu, tâli khah ân ringam a, Filipa neh mi lianah khah an ruaikan tuiah khan an zu fe a; Filipa khan a baptis tâk a. 39Tui ata an hong suakin chu Pumapa Rithla khan Filipa khah a lâk inrimang tâk a. Mi lianah khan mu khâi mak a; nikhomsela, ilôm takkan a fe mai tâk a. 40Filipa chu Azota khuaah mîn an lei mu a; khanchu, Kaisari khua a tlung mâkah chu kho tinah a fe a, Thurchi Ṭha â sîr thiai a.
Currently Selected:
TIRTÔNHEI SINTHO 8: BIATBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More
