TIRTÔNHEI SINTHO 9
9
Saula riletna
(TS.22:6-16; 26:12-18)
1Kha lâiah khan Saula kha chu Pumapa kôilômhei khah ithat rangin a la ṭhi mai ngai a. Thiampu Laltak ziangah a fe a, 2tukhom Pumapa zui mi a mun chu nupang mo, ipa mo, imana Jerusalemah a hong ṭhui theina rangin Damaska khuaa inkhôm in murdia peh rang lekha a va nî a.
3Khante, Saula khah Damaska pana a fe lâiin, a tlung rangto takin, tukvakkan rivâna rithokin ivâr a vêlkan a zuang vâr pum a.#1 Kor.15:8. 4Khanchu, rinêngah â lîr a; rôl a riat a, “Saula, Saula, ithôm ni nuam ni ne ilo?” a zuk ti a.
5Khante, Saula khan, “Pumapa, tûm nî nit?” a ti a.
Rôl khan, “Jisua, ni nuam nî lo ngai khah ki nit. 6Nikhomsela, thoi inla, khosungah lût roh; khanchu, ni sin rang nang lei iril an ti,” a ti a.
7Saula champuihei kha chu an ti rang reh loiin an ringam rak a, rôl kha chu an riat a; nikhomseh, tute chu mu mak e. 8Saula khah a hong thoi a, a hang meng a; khanniseh, îte mu thei khâi mak a. Khanchu, a kutah an kâi a, Damaskaah an ṭhui inlût tâk a. 9Sûn thumkah chu rammual mu loiin a om a, kha sungkah chu îte ifan in mak e.
10Khante, Damaskaah khan Krista nung izui mi khatkah arming Anania a om a. Pumapa kha a ziangah ân lâr a, “Anani” a ti a.
Ani khan, “Pumapa, hin ki om,” a ti a.
11Pumapa khan, “Thoi inla, Lampui Itlûn an iti-ah khan fen la, Juda inah Tarsas khuaa mi arming Saula va zong roh. Ani khah a ṭongṭai mai a,#TS.21:39. 12inlârnan mi khatkah arming Anania ihong a, a mit invâr pêk nôk ranga a chunga kut ringatin ai mu a nit,” a ti a.
13Anania khan a sâm a, “Pumapa, kha mi khan Jerusalema ni mi rithianghei deng ân thei ngai thu mi tam takka bâia rithokin ki riat a. 14Damaska khomah hin ner ming rilamtu murdi man theina rangin thiampu lalheia rithoka richamneina lan ai zuang a nit,” a ti a.#1 Kor.15:9; Gal.1:13.
15Pumapa khan a ziangah, “Fe roh, hi mi hih Jentailhei, rênghei neh Israelhei zianga ki sin itho a, ker ming inreh ranga ki mi rithlang a nit. 16Ker ming sika a la tuang rang murdi amah lan mûng ki ti,” a ti a.
17Khanchu, Anania khah a fe a, Saula omna inah a va lût a, Saula chungah a kut arngat a, “Suapui Saula, ni mit vâr nôk theina rang neh Rithla Rithiang isipa ni om theina rangin, ni hongna lampuia ni zianga inlâr Pumapa Jisua khan ni ziangah a ne hong itir a nit,” a ti a.
18Tukvakkan a mita rithokin phulip angkan a ṭul a, a mit a vâr nôk tâk a. Khanchu, a thoi a, baptisma a chang tâk a. 19Bu a nêk a, a hong har nôk tâk a.
Saulan Damaskaah thu â sîr
Khante, Saula kha Damaskaa iamtu omhei ziangah khan sûn izâka manih chu a châm a. 20Inkhôm inheiah khan Jisua chu Pathian Naipa a nit iti â sîr phut zel tâk a.
21Khante, a thu sîr ireh murdîn arkhêl an ti a, “Hi mi hih Jerusalema Jisua riming rilamtuhei nuamilo ngaitu khah ni mak im a? Thiampu lalhei zianga ṭhui ranga Jisua riming rilamtuhei iman ranga hin khom ai hong ni mak im a?” an ti a.#TS.8:1. 22Saula thu sîr khah ritha a nei ual ual a, Jisua chu Mesia a nit iti ifel takkan a rilfia ngai sikin Damaskaa Juda omhei khom khan sêl thei mak a. 23Sûn itam takka nungah chu Saula that itumin Judahein lungvâr an siam a. 24Nikhomsela, ani khan an lungvâr siam khah a lei riat a. Ithat itumin a sûn a zân kul kotbâiheiah an iruang ṭian ngai a. 25Khanniseh, â nung izuituhein ani khah an ṭhui a, zânah kul bang putiang kokin an iṭhum tâk a.#2 Kor.11:32,33.
Saula Jerusalemah a om
26Khante, Saula khah Jerusalemah a fe a, kôilômhei lâia ṭang a tum a. Nikhomsela, anni khan kôilôm a nit sa iam thei mak a, an rêngkan an ṭi tak tak a.#Gal.1:17-19. 27Khanchu, Barnaba khan tirtônhei ziangah a fepui a; lampuia Pumapa a mu tlia hei; Pumapan amah â sôn thu hei, Damaskaa Jisua riminga ihâi takka thu â sîr tlia hei kha an ziangah â sîr pêk tâk a. 28Khanchu, Saula kha an ziangah a om tâk a, Jerusalem pumpuiah ihâi takkan Pumapa rimingin thu â sîr ngai a. 29Grik ṭong imang Judahei ziangah khom thu â sîr a, a sêl a, anni khan ithat an lei tum a. 30Kha thu khah iamtuhein an riatin Saula khah Kaisari khuaah an ṭhui a, Tarsas khuaah an infe thal tâk a.#Gal.1:21.
31Khante, Judai ram hei, Galili ram hei, Samari ram pumpui heiah koindang mihei khah lungringam takkan an om a, an hong det tîr tîr a, Pumapa marit itho pumin an om a. Rithla Rithiangin ân rât ual ual a, an hong pung tîr tîr tâk a.
Ainia indam thu
32Peteran mun tin arfang a, zoro khatkah chu Luda khuaa Pathian mihei a zu thlo a. 33Amakhan ipa khatkah arming Ainia, a zeng sika kum iriatka sar zâlmun ata thoi thei khâi ino a mu a. 34Petera khan a ziangah, “Aini, Jisua Kristan nang an dam tâk. Thoi inlan, ni puantha izuat roh,” a ti a. Khanchu, Ainia khah a thoi zel tâk a. 35Luda neh Saron phâia om murdihei khan Ainia khah an mu a, Pumapa tiang mâi an ngat tâk a.
Dorki kâiithoi thu
36Khante, Joppa khuaah khan iamtu nupang khatkah arming Tabitha a om a. (A Grik riming chu Dorki a nit.) Kha nupang khan a zoro nei murdi sin iṭha sinna neh inrianghei isannan a lei imang ngai a nit. 37Kha zoroah khan dam mak a, a thi tâk a. Tui an inrisil a, chuanchung chontanah an inzâl a. 38Khante, Luda khua khah Joppa kho kôl zela om a nit a. Luda khuaah Petera a om iti iamtuhei khan an riatin chu, “Ngaihoi takkan ne hong pêk zel roh,” itia ngên rangin a ziangah mi inikah an tir a. 39Khanchu, Petera khah arsiam a, an lômah khan a fe zel tâk a. A va tlungin chu chuanchung chontanah an ṭhui a; numei murdi kha a kôlah an ribuk a, Dorkin a dam lâia a zakua ṭhui pêkhei neh a puan iṭhui pêkhei khah an inmu a, an ṭap a. 40Nikhomsela, Petera khan an rêngkan â sua riai a, arkhûk a dil a, a ṭongṭai a; khanungchu, ruak tiang a ngat a, “Tabitha, thoi roh,” a ti a. Khanchu, Tabitha kha a mit a hang meng a, Petera khah a mu a, â ṭhung tâk a. 41Petera khan â tûk a, a kâiithoi tâk a. Khanchu, iamtuhei neh numeihei khah a koi a, â ringin an ziangah a ṭhui tâk a. 42Kha thu khah Joppa kho pumpuiin an riat a, mi tam takkan Pumapa an iam tâk a. 43Petera khah sûn itam takkah Joppah khan a châm a, savun isiam ngaitu Simona inah a om a.#TS.10:6.
Currently Selected:
TIRTÔNHEI SINTHO 9: BIATBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More
