JOHANA 19

1Khanchu, Pilatan Jisua a ṭhui a, ân zêp a. 2Sipaihei khan riling lukhum an siam a, a lu-ah an inkhum a; khanchu, zakorfual senduk an inhâk a, 3a ziangah an hong a, “Chibai, Judahei Rêng,” an ti a; a mâiah an ibên a.

4Pilata khah a va suak nôk a, mipuihei ziangah, “En ta u, thiamno inchang rangin îte a sualna bi mu mang iti riatna rangin nin ziangah ki la hong iṭhui a nit hih,” a ti a.#Lk.23:4; Joh.18:38. 5Khanchu, riling lukhum khah ikhum a, zakorfual senduk ihâkin Jisua kha a hong suak a. Pilatan an ziangah, “En ta u, Miriama hih,” a ti a.

6Thiampu lalhei neh Tempil vêngtuhein amah an mu kaneh chu an ikhêk a, “Krosah hêmde roh, krosah hêmde roh,” an ti a.

Pilatan an ziangah, “Nangmanin ṭhui unla, krosah hêmde rei. Keiman chu thiamno inchang rangin îte a sualna bi mu mang e,” a ti a.

7Judahei khan an sâm a, “Dân kin nei a, kha dânah khan chu Pathian Naipan arbe sikin a thi rang a nit,” an ti a.#Lev.24:16; Mk.14:61-64; Joh.5:18; 10:33.

8Pilatan kha thu khah a riatin chu a ṭi nôk ual tâk a. 9Insungah a lût nôk a, Jisua ziangah, “Taka rithoka mîm nî nit hi?” itin ardon a.

Khannisela, Jisuan sâm mak e. 10Khanungchu, Pilatan a ziangah, “Ni ne isâm ino rang mani? Nang inzôk thei ki nit a, krosa nang ihêmde thei khom ki nit iti nî riat ino mani?” a ti a.

11Jisuan a sâm a, “Chungtianga rithoka ipe ni nit non chu ki chungah thuneina rêng rêng nei no tin e; khasikin, ni kuta ne lantu khan sual inrik ai pêl ual a nit,” a ti a.#Rom.13:11.

12Khante, Pilatan kha thu khah a riatin chu Jisua ân zôkna rang lampui a zong tâk a; nikhomsela, Judahei an ikhêk a, “Hi mi hih nen zôkin chu Kaisara mal nî nit ino a nit. Tukhom rênga ribe chu Kaisara doia rihel an nit,” an ti a.#Lk.23:2.

13Khante, Pilatan kha an ṭong khah a riat kaneh chu Jisua kha tualah a ṭhui a, roirêlna ṭhungmun “Lungdâp,” Hebrai ṭong a “Gabatha,” an iti-ah khan â ṭhung a. 14Kha nikhua khah Kalkan Kût inrinnî a nit a, sûnlâi tak vêl a nit. Pilatan Judahei ziangah khan, “En ta u, nin Rêng hi,” a ti a.

15Anni khah an ikhêk nôk a, “That roh, That roh; Krosah hêmde roh,” an ti a.

Khanchu, Pilatan an ziangah, “Nin rêng hi krosah kî hêmde rang na?” a ti a.

Thiampu lalhein an sâm a, “Kaisara banah chu rêng dang nei mang ung e,” an ti a.

16Khanungchu, Pilatan Jisua khah krosa hêmde rangin an kutah a bâng tâk a.

Jisua hêmde thu

(Mat.27:32-44; Mk.15:21-32; Lk.23:26-43)

Khanchu, Jisua khah an ṭhui tâk a. 17Jisua kha mahni kros riputin, “Luru Mun,” Hebrai ṭong a, “Golgotha,” an iti mun idênin a fe tâk a. 18Kha munah khan krosah an hêmde a, mi dang inikah an hêmde sa a, a sîr seng sengah khat khatkan, ân lâinah Jisua. 19Pilata khan inriatna arziak a, kros lêrah a târ a. “Nazaret Jisua, Judahei Rêng,” iti riziak a nit. 20Jisua an hêmdena mun khah khopui kôl a nit sikin inriatna khah mi itam takkan an tep a. Inriatna khah Hebrai ṭong, Latin ṭong, Grik ṭong heia riziak a nit. 21Khante, thiampu lalhei khan Pilata ziangah, “Judahei Rêng,” itin riziak no roh, aman kêng “Judahei Rêng ki nit ai ti,” an ti a.

22Pilatan a sâm a, “Ki irziak khah riziak a nit tâk,” a ti a.

23Sipaihein Jisua krosah an hêmde zoiin chu a silbom an lâk pêk a, rangtum ilikan an ṭhen a, an risem a, sipai khatkan rangtum khatkah chit an dong a. A zakorfual khom an lâk a, amakhah ṭhuiloi zakua, rilangka không a nit. 24Sipaihei khan, “Amahih chu iṭhet no min u, tûm â dong rang thlasân ei ti u,” an riti a. Pathian Thubûn

“Ki silbomhei an risem a,

Ki zakorfual rangin thla an sân a,”

ai ti khah a hong tlung idikna rangin amakhah sipaihein an itho a nit. #Fes.28:32; Lap.22:18.

25Jisua kros kôla dinghei chu, a nu hei, a nu inzirpuinu hei, Mari, Klopa nupui hei neh Mari Magdalini hei an nit. 26Khante, Jisuan a nu neh a kôla ding kôilôm lung ai thlung khah a mu a, a nu ziangah, “En ta, ni naipa kha,” a ti a.

27Khante, kôilôm ziang khomah khan, “En ta, ni nu kha,” a ti a. Kha zoroa rithokin chu kôilôm khan a ina om rangin ani khah a ṭhui tâk a.

Jisua thi thu

(Mat.27:45-56; Mk.15:33-41; Lk.23:44-49)

28Kha rizoiah khan Jisuan thil tinrêng a tlung rikip tâk iti a riat a; Pathian Thubu tlung idikna rangin, “Ki tui arhâl e,” a ti a.#Lap.69:21; 22:15. 29Kha munah khan bêl, uain thûra sip a om a; khanchu, sponj khah uain thûrah an ichia a, husop irolin #19:29 Mss ṭhenkatah ‘Ifei môrah’ iti a nit. an târ a, a mûr an hang ithlun a. 30Khante, Jisuan uain thûr khah a in zoiin chu, “Arzoi tâk e!” a ti a.

Khanungchu, a lu â khûn a, a rang a chat tâk a.

Jisua kângah an sun

31Judahei inrinnî a nit a, sabatnî-a kros lêra ruak iom mai kha nuam mak a, kha sabatnî khah nikhua roinpui bîk a nit a. Khasikin, Judahei khan Pilata ziangah mi an îkhâihei ke ikhiak a, an ruak kha kros ata iṭhum a, mun danga khâi rangin an ngên a. #Dn nik.21:23; Fes.12:16. 32Khanchu, sipaihei khah an hong a, Jisua lôma an ihêmdehei, tongtîra an îkhâipu neh mi dang kehei khah an ikhiak a. 33Khannisela, Jisua kôlah an hongin chu a thi tâk iti an riat a. Khasikin, a kehei kha ikhiak pêk mak a. 34Sipai khatkan Jisua kângah â feiin a hang sun a, khanzel thisen neh tui a zuang luang suak tâk a. #1 Joh.5:6-8.

35Mit ngêia hi thil imutu hin nangni khom nin iamna rangin a îsîr a nit. A thu sîr hih â dik a, thutak a îsîr a nit iti khom a riat. 36Pathian Thubûn, “A ru khatkah khom ikhiak ni no nih,” ai ti khah a hong tlung idikna rangin amakhah a hong iom a nit.#Fes.12:46; Rit.9:12; Lap.34:20. 37Pathian Thubu ngirin, “An isunah khah la en an ti,” a ti sa a.#Zak.12:10; Thup.1:7.

Jisua iphûmin a om

(Mat.27:57-61; Mk.15:42-47; Lk.23:50-56)

38Kha zoiin chu, Arimathaia kho mi Josefa khan Pilata ziangah Jisua ruak ilah rangin a ngên a. Josefa khah Juda thuneituhei ṭi sika inrûkka Jisua zuitu a nit. Pilatan ruak ilah rangin a phal pêk a; khanchu, Jisua ruak khah a va lâk tâk a. 39Nikodema, matona zâna Jisua zianga hongpu khan namhoi murra neh aloe ripol #19:39 Mss ṭhenkatah ‘lûm,’ ‘fûn’ itihei a nit. her sômithumkah ilikah vêl ichôiin Josefa a fepui sa a.#Joh.3:1; 7:50. 40Khante, an ruaikan Jisua ruak khah an chôi a, Judahei riphûm ngai dânin namhoi neh khan risompuanin an tuam a. 41Jisua an thatna munah khan rikul khatkah a om a, kha rikul sungah khan tute an la phûmna ngaino thlân ithar khatkah a om a. 42Sabatnî rang inrinnî a nit tâk sikin neh ithlân khom khah inâi tenga om a nit sikin, amakhan Jisua khah an inzâl tâk a.

Currently Selected:

JOHANA 19: BIATBSI

Highlight

Copy