JOHANA 20

Ithlân khorong

(Mat.28:1-8; Mk.16:1-8; Lk.24:1-12)

1Pathiannî zîng takah, a la zîng lâiin, Mari Magdalini khah ithlânah a va fe a, ithlân kotbâia lung khah inlum paiin a va mu a. 2Khanchu, Simon Petera neh kôilôm dang Jisuan lung ai thlung ziangah khan a va tlân a, an ziangah, “Ithlâna rithokin Pumapa khah an lâk suak a, an siana lak reh mang e,” a ti a.

3Khanungchu, Petera neh kôilôm dang khah ithlânah an fe tâk a. 4An ruaikan an itlân a, kôilôm dang khan Petera a khêl a, ithlân kha a tlung masa a. 5Â khûn a, risompuan iomhei kha a mu a, a sungah khan chu lût mak a. 6Simon Petera khom â nungah a zuang tlung a, ithlân sungah khan a lût thal a; risompuan iomhei kha a mu a. 7Jisua lu tuam puan kha chu risompuan lâiah om loiin, rizuata a khâta omin a mu a. 8Khanungchu, kôilôm dang, ithlân tlung masa khom khah a lût sa tâk a, a mu a, a iam tâk a. 9Pathian Thubu-a mithi lâia rithokin la thoi nôk a ti, ai ti khah anni khan an lai riatthiam ngir ino a nit. 10Khanchu, kôilômhei khah inah an kîr nôk tâk a.

Mari Magdalini ziangah Jisua ân lâr

(Mat.28:9-10; Mk.16:9-11)

11Mari chu ithlân putiang iṭap pumin â ding a. Ṭap pumin â khûn a, ithlân sung kha a zuk vêng a. 12Vântirtôn inikah, a ngoia rivon Jisua ruak an inzâlna luthlun tiang khatkah, pheithluan tiang khatkah, iṭhungin a mu a.#Lk.24:4. 13Anni khan a ziangah, “Nupangnu, ithôm nî ṭap?” an ti a.

Ani khan a sâm a, “Ki Pumapa an lâk a, an siana ki riat khâi no sika a nit,” a ti a.

14Amakhah a ti zoiin chu a hang rihêl a, Jisua ding a mu a; nikhomsela, Jisua a nit iti reh mak a. 15Jisuan a ziangah, “Nupangnu, ithôm nî ṭap? Tûm nî zong?” a ti a.

Ani khan rikul ienkoltu a sôn a, a ziangah, “Epu, amah nî lâk suak a nitin chu ni siana ne ril roh; khanchu, fêng ki ta, ani khah ki va lâka rang,” a ti a.

16Jisuan a ziangah, “Mari,” a ti a.

Khanchu, a tiang a ngat a, Hebrai ṭongin, “Raboni,” a ti a. (Amakhah Minriseitu tina a nit.)

17Jisuan a ziangah, “Ne tuh khâi no roh, Pa ziangah la fe mang e. Nikhomsela, ki suapuihei ziangah fen la, ‘Ki Pa, an Pa, ki Pathian, an Pathian ziangah kî kîr nôk rang tâk a nit,’ iti va ril roh,” a ti a.

18Khanchu, Mari Magdalini khah a fe tâk a, Pumapa a mu tlia neh a irilhei khah kôilômhei a va sîr pêk tâk a.

A Kôilômhei ziangah ân lâr

(Mat.28:16-20; Mk.16:14-18; Lk.24:36-49)

19Kha nikhua, Pathiannî kholoiah khan, Juda thuneituhei an ṭi sikin kôilômhei khah insungah inkhâr rikalin an ribuk a. Khante, Jisua a hong a, an lâiah â ding a, “Nin chungah thlangamna om riseh,” a ti a. 20Amakhah a ti zoiin chu a kut neh a kâng ân en a. Pumapa kha an mun chu kôilômhei khah râifânin an sip a. 21Â thar vangin Jisuan an ziangah, “Nin chungah thlangamna om riseh,” a ti nôk a. “Pan a ne itir angkan kei khomin nangni kî tir a nit,” a ti a. 22Amakhah a ti zoiin chu an chungah arthuak a, an ziangah, “Rithla Rithiang nei rei.#Mat.16:19; 18:19. 23Tu sual khom nin îzâ chu izâ nîng a ta, nin îzâ no chu izâ ni no nih,” a ti a.

Jisua neh Thoma

24Kôilôm Sômleiinikahei lâia Thoma (Phîra an iti) khah, Jisua hong lâiah khan an lâiah lei omak a. 25Khasikin, kôilôm danghei khan a ziangah, “Pumapa khah kin mu tâk,” an ti pêk a.

Thoma khan an ziangah, “A kuta thîr kilna behei ki mu noa, kha thîr kilna behei khah ki kutṭimin ke khîk noa, a kânga sâbe khah ki tôn no zelin chu iam no ning e,” a ti a.

26Sûn iriatka nungah chu kôilômhei khah insungah an ribuk nôk a, Thoma khom an lâiah a om sa a. Inkhârhei khah arkal khap a nit a; khanniseh, Jisua a hong a, an lâiah a hong iding a, an ziangah, “Nin chungah thlangamna om riseh,” a ti a. 27Khanchu, Thoma ziangah, “Ni kutṭimin ikhin la, ki kuthei en roh; hang iban inla, ki kâng khom tôn roh. Iam loiin om non la, iam ta roh,” a ti pêk a.#Lk.24:40.

28Thoman a sâm a, “Ki Pumapa neh ki Pathian ni nit,” a ti a.

29Jisuan a ziangah, “Ni ne mu sikin ni ne iiam na? Mu loia iamhei chu mi hamṭha an nit,” a ti a.#1 Pet.1:8.

Hi Lekhabu thiltum

30A kôilômhei mu chungah sinrikhêl itam takka a tho a, khahei khah hi lekhabuah hin riziak ni mak e. 31Nikhomsela, Jisua hih Mesia, Pathian Naipa a nit iti nin iam theina rang neh amah nin iamna sika ringna nin nei theina ranga hihei hi chu riziak a nit.

Currently Selected:

JOHANA 20: BIATBSI

Highlight

Copy