TIRLON 5
5
Anania Le Saphira
1Anania anti pasal le a numei Saphira ning an ram her khat an juorjui. 2Anmanin a man a renga hong choiluija aher khat ha an thup bak a erkhat ha thiamruaingai ke kunga an hongtet. 3Han Pitar ning a hong ti, “Anania, nang in thavang thiang jiang leisei rinarang le ram na juor a man ha herkhat thup na ranga, ijarra mo seitan ha na lunga nimanship?” 4Na juor mak mako nata mo lui nimak, na juor suale na lungdo nuk juia neiman mo jot mak? Nang in na tho chuan hi na lunga nilui ngaidon hi ijamo ani? Nang in miringngai jiang ni hong nimak, Pathian jiang ke. 5Hiva chong hi Anania ning a ngai phat han a kan lum ma a thi jui, hale hava angai rakipngai ha a tam tak an chitjui. 6Han na a om reatharngai ning an thuia ama ha puonna an chun na an suakpuija an vaphumjui. 7Han pha dan anthum suale ama a numei ning isuok chuan ha jet lui a ahong lut, 8Pitar ning numeinu jiang a ti, “Ram man ha hiva lim jak amo nan juor, na ri pero,” han a man a ti, “ove, hava lim jak ke ani.”
9Tak-ha Pitar ning ama jiang a ti, “iruija mo Puma thavang ha en sin na ranga nan kan ruol hi?” Enro, na lompa ruok a hong rengai ke ha kotkunga a om, hale anmanin nang om na suak pui nanti. 10Hava lai tak han ama om Pitar a ke kunga a kan lum ma a thi jui, reatharngain an hong lut ama om athi ha an mu jui, anmanin ama ha an suakpuija a lompa an phumna sirra an vaphumjui. 11Hiva i suak hi a jet ngai lim le biakrup pumpuia an renga a tam tak an lui chit.
Tirlonngai ning Anat Anmandam
12Atun tirlonngain an kut da angakpa chuan le jet na alianta tak hi mingai karra an tho va, hale Solomon atual manga anmanin an lui kan chun. 13Anmani karra kan chel lui mi ning anmani jiang thounasat alui kan top ma u, tak-ha mingain anmani ha chitlejak an lui nei. 14Mitamngain takngai nai an hong neia, numei pasalla Puma jiang an hong ha an hong tam det jui. 15Hiva jarra Pitar ning a hong karra ani lim ha tok na rang tia, anatngai ha lam sirra an hong choia an jalna Pher le khancham chunga an lui manjal. 16Hale Jerusalem sirra a om khua rakip mitamngain anatngai le thavang thiang lui ning a tho rakipngai ha an hong choia, an renga an lui mandam.
Pitar Le Johon Ulianrup Jiang Antuang
17Tak-ha thiampulian le ama le sadusingai lungdojui anmanin an enlalla an rangjui. 18Anmanin tirlonngai ha an churra ren inna an tet jui. 19Han Puma thaneithiang in jan na renin na an tet jui. 20“Cheru, nang nin biakrup sunga ngir unlang, hiva ringna chong hi mingai jiang riru,” 21Anmanin hiva chong hi an jet karra, khua ahong var siaihan biakrup sunga an lut an man chu, han thiampulian le a om suamngai ning an honga, ulianrupngai le Israelngai karra ulianrup lim ha ankuia ren inna omngai ha hongtuong ranga an tir jui. 22Tak-ha lamkei ulianngai ning anmani ha renin na mu lai maua, an hong kirra chong an hong manjet anti, 23ren inn ha asatnianga an kharra, hale lanchingpangai ning om inn kot sirra an ngirra an om, tak-ha, ren inn ha kan longa kan lut pha han tu khat om om lai ma u. 24Han lanchingpa le thiampulianngai ning chong ha an jet karra, anmani jiang imo isuakjui tia an lung atam alui kan nok. 25Han mi khat ning a honga anmani jiang a hong ti; “Nang nin nantok ren inna om mingai ha ning biakrup sunga an ngirra mirakipngai ha an manchua an om.” 26Hiva chong an jet le lanchingpa le lamkei ulianngain ancheja anmani ha rangnok tho luia an hong tuang jui, ajarko mitamngai ning keini hi lunga na deng nanti tia an lui ngaidon.
27Hale anmani ha an hong tuanga ulianrupngai madonna an man ngirjui, han thiampulian ning anmani ha chong dingkelna a neia a ti; 28“keinin nang nihi hiva ming ruia manchu maru ti a chong ngartak ka na pek, tak-ha nang nin nan manchuva Jerusalem ma an jet ver jui, hiva jarra hiva mi thisen hi keini jiang nang nin nan man chuljotjui.”
29Tak-ha Pitar le a tirlonngai ning an hong shang, “Miring chongngai nekinko Pathian chong lam ha kan jui rang ke. 30Nang nin thing chunga nankhaia nan that Jisu ha kan pangai Pathian ning a man ringkhir jui, 31Israelngai jiang lim kan sir nale siat thiang na pek na ranga Pathian ning ama hi lamkei le san ringpa aman changa, aman a kut chang tiang han a dom sang jui. 32Hiva jarra kein in shakhi kan ni, hale Pathian ning ama achongrijui ngai jiang a pek Thavang Thiang ning om shakhi anni.”
33Anmanin chong ha an ngai karra an lung a nat anmani ha an lui thatjot. 34Tak-ha Pharisi ulianrupngai karra Gamaliel anti, mirakip in chitlejak an nei dan oja khat ning a ngirra (mingai ha) a pha bongkhat tualla om na ranga chong a pek. 35A man anmani jiang a hong ti, “Israel mingai nang ni hiva mingai jiang imo nan tho rang ha kan ning theiru. 36Ajarko alui thengsa nikhuo han atak in a thei jak mi khat kani tia a kan ngaidon Thiodas antipa khat alui om, miring riamanli duk in ama ha an lui jui, hale ama ha anthatpe suale ko a chong lui jui mingai ha an thei an changa an kan khuisen na, iom tor lai ma u. 37Hiva mipa suale mimasing tel pha han Galili a Juda a hong suakret, ama nuk jui rang om mi a lek an hong suak, a mahi jom a mang jui, hale a nuk lui jui mingai ham an kan khuisen ver jui. 38Hiva jarra a tun kei ning nang ni jiang kati, hiva mitamngai man kan khuisen in lang masuaru, ajarko an ngaidon na hiva chuan hi mingai tenna aninko i lamang rang ke. 39Tak-ha Pathian tenna aninko nang nin anmani ha manbang tor noni che u, Pathian jot lui lam ke tia nang ni ha na hong jet a jot.” 40Han anmanin ama chong pek ha an ngaija anmanin tirlonngai ha ankuia an vea, Jisu minga rimak na ranga chong angartak an pek a an masua jui. 41Han anmanin hiva ming jarra pong nale jak na kan mu hi rahui suak ani tia an ning an mansat ulianrupngai tenna an suak jui. 42Hale a nitin biakrup sunga le in inna anmanin Jisu ko Khrista ani tia an manchu ha lui bang ma u.
Currently Selected:
TIRLON 5: AIMOLBSI
Highlight
Share
Copy
Want to have your highlights saved across all your devices? Sign up or sign in
Aimol (Re-edited) NT - Rabu Athar
Copyright © The Bible Society of India, 2016.
Used by permission. All rights reserved worldwide.
