TIRLON 7
7
Stephan Chongri
1Han thiampulian ning a ti, an ri chong hi adik mo?
2Stephan ning a hong shang ulenaingai le pa le pungai, na ngai peru, mahok lianpui na nei Pathian ha ning keini kan pa Abraham jiang tiko Haranna a che mak ma Mesapotamia a omlai han, 3ama jiang a hong ti, “Na u nanaingai le na ram ha mak inang kein nang jiang ki na man mu rang ram tenna hongro. 4Han a man Kaldian ram ha a mak Haranna ava om jui, hale ama a pa ning a thi suale ko nang nin a tun nan om na ram hin Pathian ning ama ha a hong man kan thon.” 5Tak-ha Pathian ning ama ha hiva mun hin ite lui man tumma tiko a ke sirna mun ten nom lui pekma, hale Pathian ning ama jiang nuk a rahut thul ranga nai le te a nei mak malai hiva neipu manchang ranga ka na pek rang ke tia chongsan a luinei. 6Han Pathian ning a ti, ama nai le tengai ning ram dang khat a khual mi anga va om nanti u, hale hava ram ma mingain suak manchang nan ta, kum riamanli khan na pong khodengthei na pe nanti u. 7Hale anmani ha suak a man chang a atet a neipu chang jatngai ha kein chong kitan rang ke, hava suale anmanin hong suak nan tau hiva mun hin kei chubei an na buk rang ke tia Pathian ning a ti. 8Pathian ning Abraham jiang vun tan chongtan na ha a pek, han a man Isak ning Jakob a nei, hale Jakob ning kan pa kan pungai somleiningai pa ani.
9Han kan pa kan pungai ning Josep ha an enlalla Ijip a an juor, tak-ha Pathian ning a maha alui om pui. 10A ma a pong khodengthei na rakip alui san na Ijip rengpa Pharo maikunga a maha manrit nale chingna theina alui pek, hale a man a maha Ijipngai le ama a inn sung mirakip chunga aneipu aman chang. 11Ijip le kanan ram pumpuia butang le pong khodengtheina a suak jui, han kan pa kan pungain chak rang nek rang luimu ma u. 12Tak-ha Jakob ning Ijip ram ma chak rang nek rang hi a om tihi a jet a masat tak kan pangai a luitir. 13Veini chang na han Josep ning a u, a naingai jiang a man kan jet hale a inn sung mi rakip om Pharo jiang manjetna a nei, 14han Josep ning a tirra a pa Jakob le a inn sung mi somsari le ranga ngaiha ama jiang a hong mankui. 15Jakob ning Ijip a om ma, han ama le kan ruaia kan pa kan pungai om hava mun han an thi. 16Hale anmani ha sekem ma an hong choia, Abraham ning sekem ma a om, Hamor a pasalnaingai jiang ruphai a pek a chok thanmun han anphum.
17Tak-ha Abraham le Pathian ning an kan jot na chongtan phat a hong nai pha han, Ijip mi ning an hong tam de det. 18Hivahi Josep jetlui reng chang thar Ijip vaihom rang a hong suak mak ma ani. 19Rengpa ning keini kanjat hi mu jot mak kan nai kan tengai hi a dengjuanna, hale kan pa kan pungai om esella alui tho. 20Hiva pha hin Mousi an neija, Pathian mit en na atam a luisat, hale a pa inna tha thum an lui jok. 21Han a mahi a hongpeija, Pharo a numeinai ning arut anaikhet a man changa alui jok, 22Mousi hi Ijip chingna theina rakip an manchu va, amahi chong ri le chuanna atam rat na alui nei.
23A man kum sommanli a hong tung han, a u a nai, Israel naingai ha a ngaidon na ahong en jot jui. 24Han anmani karra mi khat hi a masial na om luia esella itho ha a mua, a man amaha a hongsanna, a masial na buia esella itho Ijip mipa ha a that pe jui. 25A man ingaidon na ko Pathian ning keini hi a na sanjui tia an jet rang ke tia alui ngaidon, tak-ha anmanin ko lui jet ma u. 26Hiva nikhuo suale anmani masea an kan sual ha a man amua, anmani man kan cham na ranga a hong ti; a rengngai jo, nang ni ulenai nanni, ijarra mo nang ni khat le khat a samak nan kan tho? 27Tak-ha kansuol dorjong pa ning a sap ha aneng lon na a hong ti, nang hi tuning mo keini kan chunga vai hom rang le chongtan ranga anna man chang? 28Nang in Ijip mi khat mi jan nithat ang han kei om na that rang mo niti? 29Hiva chong hi a hong ti jarra Mousi ning a tan na Midian ram ma a hong om jui, hiva mun hin a man pasalnai anni a nei.
30Kum sommanli a hong tungpha han sinai tangbunga ramtong lianna, thaneithiang khat ning thingnabuk karra meichuan sunga a maha a man kan mu. 31Mousi ning hava a mu pha han, a mu phur jarra a tak angakjui, han a man asat ni anga en na ranga a hong dep han Puma rasha a hong suak jui. 32“Kei ko na pa na pungai Pathian, Abraham, Isak le Jakob Pathian ka ni,” han Mousi ning a kan niek thaonasat enlaimak. 33Han Puman ama jiang a ti, “Na ke kok ha nake tenna khekro, ajarko nang in nangirna mun ha a thiang munke, 34Ijip a om ka mingai pong khodengthei na ha kein arenga ka mujui, hale anmanin antai rasa om ka jet jui, kei ning anmani ha san na ranga ka hong chum ani, hiva jarra a tun hongro, kein nang hi Ijip hin natir kati.”
35“Tu ning mo nang hi vaihom rang le chongtan ranga annabe tia anmanin an lui jet lui Mousi hi, thingnabuk sunga ama jiang iman kan mu thaneithiang le kan ruaia vaihom le hong sanring ranga Pathian ning atirjui. 36A man Ijip tuisenonglian, ramtong lian na, kum sommanlia angakpa chuan le jetna tamtak a hong tho a anmani ha ahong kei ruaijui. 37Pathian ning Israelngai karra nang ni ranga kei ang chat Pathian tashanthei ankhat kimansuak rang ke, Israel naingai jiang i lui tipa hiva Mousi hike ani. 38Sinai tangbunga ama jiang chong luiri thaneithiang hale kan pa kan pungai le kan ruaia ramtong lian na kan chun na mun na alui om, ama ha hiva mihi ani, a man keini jiang na pe ranga ring na chong ha a mu jui a tum jui.
39Keini kan pa kan pungai ning ama a chong ha jui jot ma u amaha anmani tenna an lui notchei, an lung ha Ijip lam ha an lui ngaidon. 40Aron jiang an hong ti, keini kan madonna kan ma nasong peranga pathian na sinpero, ajarko keini hi Ijip tenna ana hong suakpui Mousi ama jiang imo a suak jui jet lai masing. 41Hava pha han anmanin Sarat mel khat an sin na, hava kut sin han phur ankhat ningsat na an lui nei. 42Tak-ha Pathian ning akanhei dea, anmanin chung van na a om rakip chubeibuk na rang amasua jui, Pathian tashanthei rabu ikan jiak anga ani; Israel inn sung ngai ramtong lian na kum sommanli nang nin sarat le phur pai nan nakat mo nimak? 43Hale Mollek puan duong le Rephan arshi Pathian nang nin chubeibuk na ranga nansin kutsin mel ha nandom shangjui, tak-ha kein nang ni ha ral ringa Babilon varal tenna ki na tir rang ke.”
44Kan pa kan pungai ramtong lian na puonduong ha shakhi a la om, hava alui mungai ning an ri nuk jui a sin rang suak ha Mousi le i kan biakpui ama ning a man chu anga ke. 45Kan pa kan pungai Pathian ning an madonna i notchai pe jatdangngai ram han anlutpha, anmanin Josua le an lui hong choi, hava David pha khan na alui om. 46David ning Pathian mit a en na manrit na amu a Jakob Pathian ranga om na mun a lamjui. 47Tak-ha Solomon lam ning ama om na ranga inn a sin jui.
48Aninnom a chung chuan na Pathian ning kut sin inn han om mak, Pathian tashanthei ning a ri anga ke, 49“Vanramko ka ong na ke, hale Simlei ko kake sirnake; Puman a ti, kei ranga i inn mo nan sin rang? Animakle kei pong kan sak na mun imo? 50Ka kut ning phur rakip hi ka sin mo nimak?”
51“Nang ni arieng ngar mingai, nan lunga le nan kuorra vun tan luingai, nang nin a phat rakip Thavang Thiang ha jotma che u, nan pa nan pungai ning an lui tho ang han, nang nin nom nan tho, 52Nan pa nan pungain Pathian tashanthei khat ha khodengthei na an luipek luimo a om? Hale dik na hong choi khat ruia an lui ri anmaningai ha an lui that jui, a tunko nang nin ama jot lui le a thatngai ha nan chang jui. 53Nang niko thaneithiang jarra an pek sanring na chongtan a mungai ha nan ni, tak-ha jui ma che u.”
Stephan Lunga Andeng
54Atun anmanin chongngai hi an jet pha an lung a nat, ama jiang an ha anrialla an om jui. 55Tak-ha a mako Thavang Thiang in a sip marra, chungvantiang a enchiak han, Pathian ma hok lian nale Jisu ning Pathian chang tiang han a ngir ha a mua, 56a hong ti, “Enru, van a kan long Mi Pasalnai ning Pathian chang tiang a ngir ha kein ka mu.”
57Tak-ha anmanin rasha ring tak an khek an kuarra jet mak na rang khan na, an lung khat jak an changa amatiang an hong depjui. 58Hale anmanin ama ha khosung tenna an phut khuo va ralla an man suak, amaha lunga an dengjui, han shakhi chang mingai ha ning apuon adiar ha a ming Saul anti reathar ankhat ke kunga an tet. 59Anmanin lungnga an deng lai han, Stephan nin lam na a neia a ti; “Puma Jisu ka thavang na lui pero.” 60Hale a man a khup a bilinga rasaring tak a khek a hong ti, “Puma anmani chunga siatna hi man nei maro,” hivahi a ti suale a thi jui.
Currently Selected:
TIRLON 7: AIMOLBSI
Highlight
Share
Copy
Want to have your highlights saved across all your devices? Sign up or sign in
Aimol (Re-edited) NT - Rabu Athar
Copyright © The Bible Society of India, 2016.
Used by permission. All rights reserved worldwide.
