JOHON 15

Jisu Darkha Kung ha A ni

1“Kei darkha kung ha Kani, han ka pa ning rahuan tho pa ani. 2Ara om lui kung rakip ha a tan hale ara om rakip ha a khella ara det na ranga achenpe. 3Kein nang ni jiang kinaluiri jarra nanthiangsuajui. 4Nang nin ka kolla omchak ru, darkha rui ha akunga ajam mak inko ratormak hi ang hin nang ninom ka kolla nan om chakmak inko nanra om noning.” 5“Darkha kung ha kei ka ni hale a chang ha nang ni nan ni, kei jiang a om miha, Kein nom ama jiang ka om; ha aratam a om ajarko kei kan chel luia nang nin i om tho tor mak che u.” 6Tuangkhat in kei jiang a om chaklui, a maha, a thei jak avuaia acharjui, han anmani ning ankhomma meikhur anthunna an hal kangjui. 7Nang nin kei jiang nan omchak a ka chongngai hi nan ompui chak inko, nang nin imo nandeiha nalamru ha nang ni jiang i hong ni rang ke. 8Nang nin a ra tam tak ha nan ni jarra ka pa mahok lianpui na ha ava kando ang han, nang nin kathiamruoi ni rang nan ni. 9Ka pa ning kei a na lungsiat anga kein nom ka lung a na siat, nang nin ka lungsiat na han om chakru. 10Kachongpekhi nang nin nan jui inko, Ka lungsiat na ha nan chunga om rang ani. Kei om ka pa chongngai hi ka luia a lungsiat na ha ka chunga a om. 11Kaningsatna nang ni jiang om na rang le lungdo a tung na rang, kein nang ni jiang ka na ri. 12Kachongpekko hi ani; Kein nang ni ka na lungsiat anga, nang ni nom khat le khat kan lungsiatru. 13Tu ang khat in a sap ngai ranga a lungsiat athi torhi, hiva khel la a lian i om om mak. 14Kachongpek rakip nang nin nan jui a chang inko, nang ni ka sap hake nan ni. 15Kein nang niha suak natinoning, ajarko, suak an khat in apuma ning, i tho ha jet mak; ajarko kei ka pa tenna ka jet rakip ha nang ni jiang ka na ri. 16Nang ni kei nan na thang nimak tak-ha kein nang ni ha ka na thang ani, han nang nin. Ara om thei na rang, che unlang nang ni kei ka minga, puma jiang nan lam nan lam ha a man nang ni ha na pe nati, 17‘Nang ni khat le khat kan lungsiatru’ tihi kei chong pek ani.

Ramuol in Anmatir

18“Ramuol ning nang ni ha an na matir inko, nang ni an na matir nimak kei hi an na matirke tihi ngaidon ru. 19Nang ni vannoi ramuol ta nan chang inko, ramuol in anta a na man chang jarra, na lungsiat nati, tak-ha Kein nang ni ha ramuol tenna phut ki na hong khal ani jarra, ramuol in nang niha an na ma tir ani. 20Suak ning apuma nek a alian det nimak kiti hi nang nin ngaidon ru, mi ning keihi a na nok aninko nang ni om an na nok ani, hale ka chong ri an jui aninko nang ni om annajui ani. 21Kei kami nan chang jarra, anmanin i rakip hi tho nanti ajarko, kei a na hong tir pu ha anmanin jet ma u. 22Kei kaluihongmak a chang inko anmani siatna maral om noning, tak-ha a tunko an siatna ha ngaidam naite om noning. 23Tu anga kei a na matir ama ha ka pa ham a matir ani. 24Midang khat in ilatho chuan ha ka lui tho mak a chang inko, anmani siatna lui om noning, tak-ha a tun ko anmanin kei le ka pa om an na mu jui, an na matir om annama tir jui. 25Kei hi anmani ning arui a jar buia na ma tir nanti tihi dan rabua i kan jiak sake ani.” 26A pa tena a nasan rang ha adik thavang a hong karra puma ama ning kei ranga shakhi chong ngir na nei nati. 27Nang ni om chong ngir nanti, ajarko a phut na khan na kei le nang ni kan hong kan ruai suam.

Currently Selected:

JOHON 15: AIMOLBSI

Highlight

Copy