JOHON 16

1Nang nin nan kiakmak na rang “Kein nang ni jiang ka na ri ani, 2anmanin nang ni ha, Sainagok kan chun na munna nanot cheinanti, han nang nin mi that miha a chuan tho ha Pathian chuanthoke ti a nan ngaidon na pha ila om rang ke.” 3Anmanin kei om ka pa om an na jet mak jarra hiva chuan hi an tho ani. 4Tak-ha Kein Nang ni jiang ka na ri, a na ri rang a pha a hong le nan na ngaidon na ranga ka na ri ani.

Thavang Thiang Chuan Tho

Aphut na lai han Kein hivachonghi naluiripe making kei nang ni le kan om chak jarra ani. 5Tak-ha, atun kei anahongtirpu ka pa jiang che rang kani, tu innom kei jiang hon mo che rang tia nala dingkel ma che u. 6Kein nang ni jiang ki na ri jarra a tun nan lung hi huiluinaning a sip jui. 7Tak-ha, kein nang ni jiang adik tak ka na ri ani, kei ka che rang hi nang ni ranga asat ani; ajarko kei kachemak a chang inko anasanrangpa nang ni jiang hongnoning; tak-ha kei ka chea chang inko ama ha kein nang ni rang ki na hong tirpe rang ke. 8Han ama a hong karra, ramuol chunga mi ning ngaisiatnale adik, dik lui jet chung changa Pathian chong jenna om nati. 9Siat an nei jarra, nang nin kei tak na ngai ma che u. 10Adikna jarra kei Ka pa jiang che rang ka ni anmanin veikhat namuret lai noni u. 11Chongtanna chung changako, ramuol la vaihompa ning chong a tan jui ani. 12“Kein kinari rang chongtam a la om, tak-ha, nang nin a tun jet noni che u.” 13Tak-ha, Puma ning adik thavang le kanruoia a hong karra a man keini lam Na kei nati, a man a thei jak a chong ri noning, tak-ha i suak i suak rang chong a jet rakip ha na manjet nati. 14A man mahok lianpui na ha kei jiang na pek nati, ajarko kei ka ri rang ha nang ni jiang a na manjet. 15Ka pa ning inei rakip ha keita ani, hava jarra Kein thavang ka na pek rang rakip ha nang ni anaripe.

Ning Dongnale Ningsat Na

16“A pha bongkhat suale ko, nang nin kei namulai noni che u, hapkhat suale na mukhir nanti, 17a thiamruoingai karra aviar in an hong kan ri, hap khat suale ko kei hi, nang nin namulai noni che u, veikhat hapkhat suale na mu khir nanti, ajarko kei ka pa jiang che rang ka ni a ti, hivahi imo itina ani tia an kan dingkel. 18Hiva jarra hap khat suale ati Puma itihi imo ani? keinin jetmasing!” 19anmanin an jet jot ha jisu nin a jet pe jarra anmani jiang a ti pha bongkhat suale namulai noni u, hale pha bongkhat suale na mu nanti katihi nang ni nan thei nan theijamo nan kan dingkel? 20Kein nang ni jiang a thianga ki na ri ani, nang ni chajangsiar nanta chapnanti, tak-ha ramuol inko an ningsat nati. Nang nin pong khodengthei nanti tak-ha nan pong na ha ningsat na tiang hong kir khir nati. 21Numei ning nai ankanjir tiang ko an pong ajarko ama a phat ha a tung jarra; tak-ha nai an khat ramuol la nai a hong chang a ti jarra a ning a satjui: pong khodengthei ha ite ngaidon khirlaima. 22Ha ang han nang ni om a tun hin nan ning a donga nan pong, tak-ha kei hi nang ni le veikhat kan mu kheir kan ti, han nan lung a nan ningsat nati hale nan ningsat nahi tu innon naluikhir peno ni u. 23“Hava nikhuo a ahong tung karra, nang nin ite na dingkel lai noni che u. Kein adik tak ki na ri ani. Kei ka minga imo khat ka pa jiang nan lam inko nang ni jiang na pek nati.” 24Atun tunga nang nin kei ka minga ite nalalam ma che u, hava jarra nan ningsat na ha lungdo a tung na rang lamru mu nanti. 25Hiva chongaihi tetan na anga nang ni jiang kanarijui, veikhat nang nin ka pa chung changa chong a thianga tetan na ni luia ka na lari pe rang ke. 26Hava nikhuo a hong tung karra nang nin kei ka ming na lam nanti. 27Ajarko, Pathian ka pa khet ha, nang ni ana lungsiat, nang nin ama ha nan lungsiat, a man nang ni ha a lung ana siat, ijarra mo kantinko, kei ka pa tenna kihongke tihi nang nin tak nanngai. 28Kei ka pa tenna ka hong suak a ramuol chunga ka hong jui, hale a tun ko. Kei ramuol mak kata ka pa kol la che rang ka ni. 29Jisu a thiamruoingain a hong ri, “Enru a tun ko tetan na kan chel luia a thianga narijui. 30Atunko Puman i rakip najetver tu khat innom nang jiang chong dingkel rang om lai noning, nang Pathian tenna na hong tihi kan jet.” 31Jisu ning anmani jiang a hong sang,” a tunko tak mo nan ngaijui? 32“Enru a tun nang ni nan thei nan changa kansen nan ta, kei kabing jak nan na mak na rang pha a hong tung rang ani, ha ani nom kei ko kabingjak ni making ajarko, ka pa ning kei ana om pui. 33Nang nin ka pa tenna lunghip lungdai nan mu na rang, kei nang ni jiang kanarijui; ramuol la pong khodeng nan thei tak-ha nan ning sattaru! kein ramuol hin ral ka tor jui.”

Currently Selected:

JOHON 16: AIMOLBSI

Highlight

Copy