JOHON 5

Tui khur sirra a nat imandam

1Hiva suale Jiwngai khengbuban an khat a lui om, Jisu Jerusalem ma alui che. 2Jerusalem ma han belram kotkunga tuikhur chumna lam ranga a kan long a om; hava ha Hebru chonga “Bethazatha” anti. 3Hava tuikhur chumna lam ngai han, a mitdel, akekiak, a tak sa sual, a nat mitam an lui jalla tui kan nok ha an ngak an lui om. 4Ajarko Puma chungvan na thaneithiang ankhat in hapkhat hapkhat tuikhur han a hong chumma tuiha sing a mansat; tui ha sing asat lai tak tuang mi ning man a chumma asit aninko, anat naha hava han an phut damna huina an lui nei. 5Hava mun han kumsom thum lei kariat tunga a taksa anat mikhat alui om. 6Jisun hiva miha a mu phat han, hava miha phasot tak a nat a jet ama jiang alui ti, “Nang nadam jotmo?” 7Anat mi han a sanga, “Oja, Tui hi sing sat phat han tui sunga lut na rang karra a na ruai rang tu khat om nei making; kei valutrong tia ka hong karra midang khat inman aleikaia ana lutde ani.” 8Han Jisun ama jiang a ti, “Thui innang, na jalna napher lui in lang chetaro.” 9Hava lai tak hava anatpa ha a dam ajalna pher a luia ache jui. Hava nikhuo ha sernikhuo alui ni. 10Hiva jarra Jiwngain mihajiang an lui ti, “Atun hiva sernikhuo hin nang in na jalna pher naluia adik lui dan chuan nitho ani.” 11A man a sanga, Kei anamandam mi han kei jiang a ti, “Najalna pher lui innang chetaro!” 12Anmanin an lui dingkel ret, “Nangin na jalna pher lui innang chetaro anati miha tumo ani?” 13Tak-ha a nat amandam miha ning Jisu ha tumo ani tia luijetma, ajarko hava mun na han mi antam jarra Jisu ha alui suak jui. 14Hava suale Jisun ama ha biakinna a mua ama jiang a ti, “Enro, na dam jui; natak chunga akhella asatlui ommak na rang siatna tho lai maro.” 15Hava phat han mipa han Jiwngai jiang alui chea Jisun imandam ha ahong manjet. 16Jisun hiva mi alui mandamhi sernikhuo aluini jarra Jiwngain ama tak chunga lung kan nokna an phut jui. 17Hiva jarra Jisun anmani jiang alui ti, “Ka pa ning anitin nachuan asin jarra kei ning om kasinrang asuak.” 18Hiva jarra hiva ruia, Jiwngai ama a khella an lui thatjot; Ajarko a man sernikhuo hin dan isetjak niluia, a man Pathian ha apa imanchang, Pathian le ama ikan angpui mo ani.

Jisun a pa ranak jarra chuan tho torna a nei

19Hiva jarra Jisun anmani jiang alui sang, “Kein adik tak ka ri ani, nai ha ning a binga i om thotormak. A man apa chuan tho ngaiha amujak ha ithotor ani. Apan a tho chuan ha a pasalnai han nom atho ani.” 20Ajarko pa ning a pasalnai a lungsiat an khat om atho chuan rakip ama jiang aman mu; a man hiva nek ithorang chuanliandet ina man muranghi nang nin ngak nanti. 21Ajarko apahan athi ngai ha aman ringkhirra amanthui, hava ang han nai han nom aman ringkhirjot, anmani jiang ringna a pek. 22Pahan tu jiang om chong tanmak, chongtan na rang i rakip a man naichunga ranak a pek jui ani. 23Hiva jarra mirakip in apa anjak anga anai ham an chit anjak rang, tu achang innom a pasalnai chit le jaklui miha, ajuangtirpu apa ham chitlejak nei lui anni jui. 24Kein adik tak ki na ri ani, “Tuachang innom ka chong ri ajet anahongtirpu tak a ngai miha ning kumsot ringna nei nati, ama ko thina an phut ringna a nei jui, hale chongtan na han kan chel lai noning. 25Kein nang ni jiang adik tak a ki na ri ani,” a thi mingain Pathian nai rasa an jet phat han, a thi ngai ringna rang pha ha a hong tung jui, a tun nom alani. 26A pa abinga ringna kung achang anghan, a pasalnai in num abinga ring na kung achang na rang aman a sin jui. 27An khat om nai ha Mi Pasalnai ani jarra chongtan na ranak achunga a man alui pek. 28Hivahi ngak maru, ajarko a thi rakip in than khurra an phut ama rasa an jet phat han; 29Anthan khurra an phut an hong suak na rang pha ilahongtung rang ke; chuansat atho ngaiha ringkhir ranga thui khir nanti, hale adik lui atho ngaiha chong tannaranga hong thui khir nanti.

Jisu chunga chong ngir.

30Kein kabing jak i om thotor making; Pathian ana manjet nuk juia chong ka tan, hava jarra kei ka chong tanko adik ani, ajarko kein kideiha tho rang tia kansiat making ngaidon making. Tak-ha kei ana hong tirpu ama adei jak ha kathoke ani. 31Kein ka binga kachongngir shakhi kakanpek aninko, ka shakhi chongngirha adik lui ani tia ka lui. 32Tak-ha midang an khat in kei ka ruia chong ngir a pek khat a om, a man kei ranga chong ngir a pek ha adik tia kein ka jet. 33Nang nin nan chong choi Johon jiang nantir, hale Johonin adik chong ngir alui pek ani. 34Hivahi mi ankhat chong ngir ranga ngirrong kitina nimak, nang ni na sanring na ranga ka ri ani. 35Johon thaimei mei var ankhat anga, ka suak kavar, nang nin ama varha pha bongkhat jak na man huipui. 36Tak-ha Johon chong ngir itho nek a alian det kachunga chong ngir ankhat kein ka nei; Kapan ki tho rang chuan a na pek ha kein ka tho, ka Pan ijuangtir ham chong ngirna a pek. 37An khat om, kei ana hong tirpu ka pa nom ka ruia chong a ri, nang nin ama rasa lui jet ma cheu. 38Hiva jarra a chong ha nan lung sunga om mak, ajarko ama ahongtirpuha nang nin takngai mak che u. 39Nang nin chong thiang rabu sunga kum sot ringna kan mu rang tia nan jet nan hong, hale hava ngai han ka chunga chong an ri. 40Atun tunga ringna muna ranga kei jiang hongjot mak che u. 41“Miringain an na manpak hi kein dei making. 42Tak-ha kein nang ni kanajet, nan lung sunga Pathian lungsiat na om mak tihi kein kanajet. 43Ka pa chong a nei ranak le kan ruaia kei ka hong jui, tak-ha nang in kei naleilui mak che u. Mi ankhat abinga inei ranak le kan ruaia ahong inko, nang nin ama nanlei lui rang ke. 44Nang nin ankhat le ankhat kandomsang rang nan dei, tak-ha Pathian ankhat jak jiang an phut ahong ha domsang rang ko dei mak che u; hiva jarra nang nin ija mo tak nanngaitor rang? 45Kein nangni ha ka pa jiang nanlalna ha a pek rangketia ngaidon maru. Mousi ning nang ni lalna ha ana pek ani. 46Adik tak nang nin Mousi ha tak nanngai aninko, kei tak nan na ngai rang ani; ajarko a man keichung chang a chong an lui jiak. 47Tak-ha nang nin ama alui jiak ha tak nanleingaimak jarra, ija mo kei chong tak ha nan ngaitor rang?”

Currently Selected:

JOHON 5: AIMOLBSI

Highlight

Copy