JOHON 6

Jisun mi lising ranga avai

(Mat. 14:13-21; Mrk. 6:30-44; Luk. 9:10-17)

1Hava suale Jisun Galili anti pat Tiberea tiang akanna alui che. 2Mitam tak in ama nuk an lui jui, ajarko Jisun mi anatngai a man dam ma chuan a dang a tho ngai ham anmanin an lui mu. 3Jisu tangbunga alui kalla atirlon ngaile an lui ong suam. 4Jiwngai kheng bu ban ranga a phat aluinaijui. 5Hava chong ha Philip jiang man kan sin na ilui tike; Adik tak ko, a man atho rang ha alui jet. 6Jisun philip jiang alui ti a man a tho rang rakip ha ko aluingaidonjui. 7han Philip in alui sang, “Ruphai Dinnar reania tal anchok aninnum mi rakip hi aviar aviar an chak aninnum khopno niu. 8Thiamruoingai karra a dang khat Simon, Pitar a naipangpa Andrew ning alui ti,” 9“Nekthei, chak thei tal ranga le nga anni a nei reathar nai pang ankhat hin a om. Tak-ha mitam hi jat ranga hiva jak hin na ija mo ihunrang?” 10Jisun a ti, “Mi ngaiha man ongru.” Hava mun ha thingthui tam om na aluini hiva jarra an renga lising ranga angduk an lui ong. 11Jisun tallom ha a luia Pathian amanpak hale a ong mingai jiang han an lui sem pe. Nga ham a kan ang rip an luia anmanin an dei nuk juia an lui chang. 12Anmanin an renga ankhopsua phat han, Jisun a tirlonngai jiang a ti, “Anchak bang a nek anoingai mang ma rase, khom chunru” a ti. 13Hiva jarra anmanin a renga anrutsuan, tal a pek ranga le nga anni ha mirakip in anchaksua aliambang anek anoiha luk somleini sip khan anluirut ani. 14Mingain atho chuanlian a ngak pa ha an mu karra an luiti, “Suai luia amahi ramuol la chong phuangrang ihongha ani.” 15Jisu ha a jot jot mak reng manchang ranga, anmanin churranga, an hong ha Jisun a jet tangbung chunga a binga akantiarra ache jui.

Jisu Tui chunga a lon

(Mat. 14:22-33; Mrk. 6:45-52)

16Nitak a hong tung phat han, thiamruoingai ha pat tiang an hong suak. 17Rokuanga han an chuanga Kapernam pat an khat tiang an lui kanlejui. Jan a hong chim phat han, Jisu ko anmani jiang luihongmak. 18Semthi a tam a hong ranga tui alui kan nok. 19Thiamruoi ngain mail an thum manli ang han anhongphahan anmanin Jisu tui chunga alui hong lon na anrokuang tiang ahong ha an mu karra anmani an lui chitjui. 20Jisun anmani jiang a ti, “Chitmaru, kei ke ka ni.” 21Anmanin rokuang chunga ningsat tak an man chuanga, a rak tak an tung jot na mun na han antungjui.

Mingain Jisu an tok

22Jankhuo a hong varphahan, pat a dang khat tiang a om mingain rokuang ankhat jak a om ha an lui mu. Thiamruoi ngain Jisu kan chel luia anmakha mingain an jet. 23Tak a chang innom Tiberia an phut rokuang a hong ngaiha Puman manpak na alui pek suale mitamngain tal anchakna mun han an lui hong tung. 24Mitamngain Jisu le a thiamruoingai ha om lai mau tihi anjetphahan, anmanin rokuang sunga an lut, Jisu muna ranga Kapernam tiang an che jui.

Ring na Bulom

25Mingai ning Jisu ha pat ankhat tiang han anmuphahan an lui ti, “Oja, hiva mun hin itiklai na luihong?” 26Jisun a sang, “Kein adik tak ki na ri ani; Chuanlian angakpa nan mu jarra nan hong nimak, bulom nan chak, nankhop jarra nang nin nan hong ani. 27Amangrang bu jarra chuan sinmaru; hava rahut kumsot ringna rang bu jarra chuan ranak sinru, ajarko hava bu ha Mi Pasalnai ha ning ana pek rang ke, ajarko Pathian ning ama chunga chong ngirna ana pek jui.” 28Hava han anmanin an lui ti, “Keinin Pathian chuan kan sin na ranga imo kan tho rang?” 29Jisun a sang, Pathian in nang ni ina man tho jot chuan ha hi ani, “A man ahongtir miha takngairu.” 30Anmanin anti, “Keini kannamu phat han nang tak kan na ngai na rang chuan imo ni tho rang?” 31Chong thiang in ari; “A man an nek rang bulom chung van na an phut a hong pek anga kanpukanpa ngai om ramtongnava manna an lui pek ani.” 32Han Jisun a ti, “Kein adik tak ki na ri ani; Mousi ning analei pek bulom ha chungvan na anphut nimak; Chungvanna an phut adik tak bulom ha ka Pan anphut anahongpek ani. 33Pathian ina pek bulom ha ko chung van na anphut a hong ama ha ani, a man ramuolla ringna a na pek.” 34Anmanin ama jiang an luiti, “Oja, hava bulom ha amunle pha rakip keini jiang napekro.” 35Jisun anmani jiang aluiti, “Kei ringna bulom ha kei kani, kei jiang a hong miha itik anin nom voncham tiha om lai noning; kei tak ana ngai miha i tik aninnum a tui rallainoning. 36Tunko kein nang ni kana manjet ani; ‘Nanmujui, tak-ha, tak nangai mache u;’ 37ka Pan ina pek rakip kei jiang hongnanti, kei jiang a hong miha kein luinotchai noning. 38Ajarko kei anahongtirpa lungdo kathonaranga chungvan na an phut kei ka hong ani, kei lungdo thona ranga ka hong chang mak. 39Anajuang tirpupa ina man thojot ha hi ani; Aman kei jiang ina pek irakip manmang luia a torna nikhuo han arenga manring kata kimanthuirang ani. 40Ajarko Mi Pasalnai amua tak angai rakip in kumsot ringna anneinarang, hale a torna nikhuo han kikeituirang anmani ngaihi ka pa lungdo ha ani. 41Jisun a ti, “Chungvanna anphut ahong bulom ha kei kani;” Jisu han hava chong a ri jarra Jiwngai lunghuiluina an nei jui. 42Anmanin anti, “Josep a nai Jisu ha ama hi nimak mo? Keinin a nu le a pa kan jet; ha aninko, a man ijamo chungvan na anphut ka hong ati?” 43han Jisun a sang, “Nan binga nang ni nan kan biak sitsit ha bangru.” 44Ka pa, ana hong tirpuning kei anahong ruaimak aninko, tukhat in num kei jiang hongtor mau. Hale ahong miha atorna nikhua han kikei thuirang ani. 45Chong phuang ngain hingahin an lui jiak, “Pathian in mirakip iman jet luininati, tu achang innom ka pa jiang anphut chong a jet, ankhat om akan chu miha kei jiang a hong ani.” 46Tu angin ka pa ha amu jui tiha nimak; Pathian tenna an phut a hong ama niluia tukhat in num ka pa ha lamu ma u. 47Kein adik tak ki na ri ani, “Atak ngai miha ning kumsot ringna anei jui ani.” 48Keitak hi ringna bulom ha kani. 49Nanpu nan pa ngain ramtong na ram hang mun na manna ha an lui nek, tak-ha anmani an luithi. 50“Tak-ha chungvan na anphut a hong bulom hiko tu a chang innom a nek rakip thinoniu. 51Kei chung vanna anphut ahong ringna bulom ha kani. Tu a chang innom hiva bulom a nek miha kumsot ring nati. Hale kein ama jiang ki pek ranga bulom ha ka taksa ani, hivahi ramuolngai ring na rang ka pek ani.” 52Hava phat han Jiwngai tiko anmani masia sunga lung kan nokna an luiphutjui; “Ija mo hiva mihin nek ranga ana pek tor rang?” Tia an lui dingkel. 53Jisun anmani jiang a luiti, “Adik tak kein ki na ri ani, nang nin Mi Pasalnai a tak sa nanchakmak, a thisen nan inmak inko, nanbi binga ringna neinonicheu. 54Tu a chang innom ka taksa achak hale ka thisen ain mihan kumsot ringna an nei jui, hale a torna nikhua han anmani ring pumma kiman thuirang ani. 55Ajarko ka taksa thiang hi butak ha ani. Kathisen hi a thiang tak ani. 56Tu achang innom ka taksa thiang a chak, hale ka thisen a in mi ha kei jiang a om hale kei ning om ama jiang ka om. 57A ring chak ka Pan kei inahongtir, hale kein ama jarra ka ring. Hava ang han tu achang innom kei anachak miha kei jarra ring nati. 58Hiva jarra hiva bulomhi chungvan na anphut ahong ani. Nanpu nanpangain anleichak an thi, hava bulom anga nimak. Hiva bulom a chak miha athitibui a ring nati.” 59Hiva chong hi Kapernam biakinna Jisun manjetna anga iluiti ani.

Kum sot ringna chong

60A thiamruoi atam lam ning hiva aringaihi an jet phat han an luiti, “Hiva anamanchuhi a tam a tat, tumo hiva ajettor rang?” 61Tak-ha Jisun a thiamruoingain hava chong an ri a a jet anmani jiang aluiti, “Hiva hin na nang ni khodengthei na nan neimo?” 62Ha aninko, mi pasalnai ha alui om na tiang akan le khir nanmu karra, nang nin imo nanti rang? 63Ringna kana pek ha thavang ani, taksa ko iom a nemna om mak, kein nangni jiangkarisa chong ha thavang le ringna ani. 64Nan karra takngai lui a lek nan om, ajarko, takngai lui miha tutumo nan ni, hale ama ha tu ning mo mikut chunga ipekrang tiha Jisun amasat a jet jui. 65Hale a man a ti, “Hiva jarra hin kein kinalui ripesa ani, ka Pa ning ilui jotsa animak inko tukhat in nom kei jiang hongtor noni che u.” 66Hiva jarra han a nuk jui mitam lamin jui jot lai mau, an nuk an kanlejui. 67Hava phat han Jisun a thiamruoi somleini ngai jiang a ti, “Nang ni om nannamak jotmo?”

68Simon. Pitar nin a sang, “Puma tu jiang mo kan che rang?” Nang jiang ko kumsot ringna chong ha a om. 69Hale a tun nang Pathian jiang an phut a thiang ha nani tihi keinin tak kanngaijui, hale kannajet.” 70Jisun alui sang, “Kein nang ni somleini hi kinathang suaksa nimak mo? Aninnom, nan karra mi ankhat ko seitan ani.” 71Simon anai Juda Iskariot a man inapeklut rang ke tia arina chong ani.

Currently Selected:

JOHON 6: AIMOLBSI

Highlight

Copy