LUK 1
1
1Aphut na tak anmipa anluimungai hale, chong lui ringai anmani ning, keini jiang an na lui ripe nuk jui a, 2keini karra ahongsuakthei nuk jui a mitam ning rochi anga an hong jiak na ruia. 3O Theophilas a lian tak nang naluiri adik chong ha jetthei na ranga, 4kei om a phut na tenna akip hiamma an lui ri nuk jui a, hongsiak kati.
Johon Baptis Naichang Ruia chong lam
5Judia reng Herod mirual lai Zakharia anti thiampu khat alui om ama a numei ming Elizabeth anti, a mahi Aaron phung sunga numei alui ni. 6Anmanihi Pathian chitlejak a nei mi an lui ni, mirakip madonna Pathian chuan hi adik tak an lui tho. 7Anmanihi naibui an lui ni, hale a tam an lui tarjui.
8Hingahin Zakharia ning Pathian chuan innthianga chuan a tho lai tak han. 9A ma ning a rim hui dhup aluihal. 10Hava phat lai tak han mitam ning tualla an lui om ma Pathian chubei an lui buk lai tak han thourimhui an lui hal.
11Biakinn sunga chang tiang han Thaneithiang a ngir ha alui mu.
12Han Zakharia ning a mu karra a tam alui chitjui. 13Thaneithiang in ama jiang a tipe, “Chitmaro Zakharia, nang nin nalamha Pathian ning a na jet pe, nanumei Elizabeth ning pasalnai an khat nei nati, a ming ko Johon nati rang ke. 14Nangrang a tam ningsat na rang ani, han ama a hong kanjirhi miring rakip ranga ningsat na ninati. 15Ajarko ama hi Pathian mit en na a tam liannati, hale Ju om innoning, ama hi a hong kan jir tenna an phut Thavang a thiang le a hong kan ruai ani. 16Hale ama ning Israel naingaihi Pathian jiang hong tuang nati. 17A ma hi Pathian madonna a rat tak Elija rat nale ranak ha nei nati. Anpa ngai ning an naingai jiang ngaidon na, Pathian chongla jet thei na rang, ama ning Pathian mingai ha lui man kan ning nati.”
18Zakharia ning thaneithiang jiang alui ti, “Hiva ngaihi ija mo kei chunga anitor rang? kei hi katarjui hale kanumei om atarjui.”
19Kei thaneithiang Gabrial ha ka ni, “Kei hi nang jiang hiva chong hi ri rang Pathian ning a na hong tir ani. 20Tak-ha nang in ka chong ri hi tak na ngai mak innom ni khat ko a la hong suak rang ke, ka chong ri a hong suak mak kar je nang in chong ri thei noni che, nang in ka chong ri hi tak na ngai mak jarra ani.”
21Zakharia ning in thiang sunga phat sot tak a om ha mitam tualla an lui ngak, ijarra mo hivak han asothi antia, 22ama ning a hong suak karra mingai ha leibiak theilaimak, mingain om an lui ti, ama ning in thiang sunga imo khat lui mu nati tia an ngaidon, a chong suak lui jarra a kut a jet na alui tho.
23Hinghin ama ning Pathian chuan ha a tor suale inna a hong kir jui. 24Aphat sotlui a a numei Elizabeth chungrik a hong om jui, han ama hi tha ranga alui kanthup ama chungrik om ha tha ranga alui thup, ama ning a ti, a tun ko Pathian ning kei hi a na sanjui. 25“Hale minuiso ka tung rang rakip puman analuisuak pe jui.”
Jisu Naichang Ruia Anri
26Tha karuk suale Pathian ning Galili ram Nazaret Gabrial thaneithiang ha alui tir. 27Thaneithiang ning David phunga a om Josep anti pajiang a numei chang ranga chong an kan torsa numei thiang Meri jiang a honga, 28ama ning Meri jiang a ti, “Lunghipha nangnjiang om rase, ravan satnu; Pathian in nang ha a na ruai chak.”
29Thannei thiang chong ri ha Meri a tam a ning a dong jui, ichongmo ani tia a ngaidon. 30Thanei thiang in Meri jiang a ti ret, chit maro, pathian in phual anapekdo. 31Nang nin pasalnai khat vonnata nala kan jir rang ke, a ming ko Jisu tinanti. 32A ma hi lianpui na reng la ni nati, asangtak Pathian nai nan la tirangke, Pathian ong na mun ha ama jiang pek nanti, a pa David anga, 33ama ning Jakob phung sunga reng la hong chang nati; a reng ramhi a tor ti om noning.
34Han amani ning thaneithiang jiang a ti, “Ija mo hiva chuan hi ilani rang? Kei kalompa la om mak.”
35Thaneithiang ning a hong sang, “Pathian in na chunga thavangthiangha a hong tir rang ke, hiva jarra naitepa Pathian nai ke anti rang ani. 36Enro na inkuo naphung sunga Elizabeth om alui ti, tak-ha a tun ko nai avonjui. Chungrik a om ma. Tha ka ruk ani jui. 37Ajarko Pathian nin itorlui i om om mak.”
38Han Meri ning thaneithiang jiang a ti, “Enro, Puma suaknujiang, nang chong pek nuk jui a kei jiang a suak ha ni rase;” hale thaneithiang ha Meri a mak a a che jui.
Merining Elizabet A hong Phak
39Meri ning a thuia, tangbung tiang a che jui, Judia ram khopui han a tung jui. 40Han ama ning Zakharia inn sunga a che, Elizabeth ha chubei aluibukjui, 41Meri ning chubei a hong pek ha a jet karra, Elizabeth a von sunga a om nai ha alui kanchomjui, Elizabeth om a thiang thavang ning aluiruai. 42Han Elizabeth ning rasa suak a hong khek a ti, “Nanghi numei karra ravan satnu nani, ajarko nang in nai nalavon rang ke. 43Hiva khan ravansat kanihi kapumanu nang in kei jiang nahonga hongkhanna rasisatmo ani. 44Nachonghui ka jet an phut ka von sunga a om nai hi om ningsat le kan ruai a a hong kan chom, 45Pathian chong ri ha tak a ngai mi han i duk ravansat numei mo i ni rang?”
Meri Ning sat na La
46Meri ning a ti, “Kalungsunga puma ka manpak. 47Hale ka thavang ning a na san ringpu Puma ham ningsat tak a achoilom,
48“Puma ning a suaknu kei hi a na ngaidonthei jarra enru a tun tenna an phut mirakip ning ravan satnu na tirang an ni jui. 49Ajarko pathian hi ka chunga a na sanjui, puma ama a ming ko a thiang ani.
50“Puma jiang chitlejak a nei mirakip ko Pathian ning a san theng pet.
51“Hale a man kan lian mingai ha ko puman a kut ranak han a kei thak an bing anbinga athechai.
52“Puma ning a reng ong na mun tenna a tor pu ngaiha anongthak, hale a sin ngaiha a kei thui.
53“Puma ning avoncham a pong ngai ham chaksat avai, hale a neingai ham kut ronga ama sua.
54“Pathian in kan pu kan pangai jiang chong sam na alui nei ha, a nai Israelngai san ring ranga a hong jui.
55“Puma ning kan pu Abraham ha alui ngaidon anga atu a tengai hi om phat rakip a a ngaidon.”
56Meri ning Elizabeth le tha thum an om suale a nuk akanlejui.
Johon Baptis Naichangna
57Hale Elizabet kanjirrang a pha a hong tung han, a man pasalnai an khat a nei jui, 58hava chong ha ainkua ngai ning an jet karra ningsat tak a ama hi an lui ma hok, mingai ning anti; i duk asat pathianmo ani hiva numei nu chunga a lungsiat na inadopehi.
59Naitehan nikariat a hong tung karra anmanin vun tan ranga an lui hong, hale anmani ning a ming a pa ming anga Zakharia tirang an lui ti, 60tak-ha Elizabet ning jot mak a “A ma minghi Johon kan ti rang ke.”
61Han anmanin an hong ti, hiva minghi naphung sunga tu khat om la kan phua ma u. 62Hava suale anmanin imingmo kanphuarang tia ankandingkel,
63Zakharia ning jiakthei na rang Selep khat a lam ma a man Johon ani tia ati jui. Mingai ning a tam an ngak jui. 64Hiva phat laitakhin Zakharia veikhat chong a hong ritheiretjui, Pathian a manpak. 65Hingahin a innsir, a inn tanga a om mingai ning an jet karra anluichitjui, hiva chong hi Judia khopuia a om rakip jiang akantirjui: 66Mipui ning an ngaidon hiva naipanghi “Ija mo ihongni rang?” Tiko Pathian ratnahi ama chunga a om.
Zakharia Tashan Chong
67Johon a pa Zakhariahi Thavang Thiang ning aruaija Pathian chong alui risuak; 68“Pathian ha manpak tarei, Israelngai Puma ha a hong jui, a mingai pong khodengthei san ranga! 69David phung sunga San ringpa aratpa khat keini jiang a na pek jui. 70Kum ijat madonna Thiampungai rakip jiang chong alui phuangsuak anga; 71keini rakip anamatir le a na enda tenna an phut ama ning na san rang ani; 72Kan pu kan pangai jiang ka na manrit rang ke alui ripe ngaiha ama chong thiang ngaidon na ranga ani. 73Kan pu Abraham jiang alui ri nuk jui a, 74Puma ning khodengthei na tenna a na sanringa, chit ti om lui a a chuan a na manthojui. 75Hiva jarra puma ning keini hi ringkhuova siatna tenna a na mandikjui, a na man thiang jui. 76“Hale nai, nang ni hi a sang tak Pathian amachong sem nan ni jui kan ti rang ke; ajarko Pathian jui na lam kan ning ranga puma madonna ni che rang ani. 77Mirakip jiang tiperu Puma ko San ringpa ani, hale an siatna rakip ham a ngaidam pe jui. 78Puma Pathian in ama manrit na hi jing dai kho var anga kan chunga a na hong manvar pe jui; 79avarhi ajinga alui omngai ranga ani, lunghip ning kei hi a na manruai chak jui.”
80Hingahin nai pang ha thavang le tak sa ahongrat suam jui, han Israelngai jiang andomak kar je lampuia ramlai a alui om.
Currently Selected:
LUK 1: AIMOLBSI
Highlight
Share
Copy
Want to have your highlights saved across all your devices? Sign up or sign in
Aimol (Re-edited) NT - Rabu Athar
Copyright © The Bible Society of India, 2016.
Used by permission. All rights reserved worldwide.
