LUK 5

Jisu ning Aphutnatak Thiamruoi Akui

(Mat. 4:18-22; Mrk. 1:16-20)

1Nikhat Jisu ning Genesaret pat kolla a om laitak mipuining ama jiang Pathian chong thiang ngai ranga an hong kankhomjui. 2Puman rokuang anni pat kolla a luimu, ngatokngain an rokuang an mak a len chenranga an lui che. 3Jisu rokuang anni sunga Simon a rokuang lam a jong a Simon jiang a ti, rokuang hi tang tiang aviar hong mansuakro, han rokuang hi tang tenna an phut aviar namlutro han Jisu ning ro kuang sunga a lut mitamngai ha a man chujui.

4Hale puman chong ri a tor le Simon jiang a tiret, “Rokuang hi tuithup natiang hongnamru, hale nanlenha vortaru a ti pe.”

5Simon ning a sang, “Puma kein in sun le jan na len kaluivor ngako khat jak om churmasing, tak-ha Puma na chong ri nuk jui a vorkati.” 6Anmani ning len an vor karra nga a tamtak an khum jui, an len chetrang a tho jui. 7Anmanin ansap rokuanga ngatok ngaiha an kut an jap man kan san rang an kui jui. Han rokuang anni anga han ansip reia rokuang ha tui sunga tum ranga a tho jui. 8Han ngangai an chur karra Simon Pitar ning Jisu jiang a bok jet a chubei a buk a a ti, “Puma kei jiang an phut chetaro, kei ko siat nei ka ni.”

9Ajarko anmanin pumngak an ngak jui, an-nga churna chung chang a. 10Hangahan Simon a sap ngai Jebedi a nai Jems le Johon nom an lui ngak, han Jisu ning Simonjiang alui ti, “Chitmaro a tun tenna ko nang ni michur na manchang rang ka ni jui.”

11Han anmani rokuang ngaiha tangtiang ansiak an phur rakip an mak a Puma nuk an lui jui.

Pasal khat Jisun A mandam

(Mat. 8:1-4; Mrk. 1:40-45)

12Hinghin Jisu ning khopui khat a om lai kusti nat pasal khat ning Jisu a mu karra, a khup a bok a Jisu jiang a ti, “O, puma, kei hi na lungsiatro, namandamro.”

13Han Jisu ning a kut athemma a ti, “Kein ka jot jui damtaro,” hava lai tak kusti tongpaha a dam jui. 14Jisu ning ama jiang a ti, “Tu khat jiang om risuak maro, hale che in lang Thiampuilian jiang han man muro, mirakip ning na dam jui ti jet rase u, Mousi ning alui ri nuk jui a nadam jarra nang nin phur kat taro.”

15Tak-ha Jisu ning amandam ruia mitam ning a khel a khel la a nat rakipngai ha damthei na ranga an lui hong jui. 16Han Puman ramchikna mun na a che Pathian chubei aluibukjui.

Apangthi Pasal Khat Jisun A mandam

(Mat. 9:1-8; Mrk. 2:1-12)

17Nikhat Jisu ning mingai alui man chu pha han Galili, Jerusalem, Judia khopui sunga a om pharisi, thiampungai an lui om. Hava phat lai tak han Pathian rat na ranak ha Jisu chunga a om. 18Mi aviar ning a pang her khat a thi khancham pumma an hong domma Jisu jiang an hong tuanga Jisu madonna siakrang an tho jui. 19Tak-ha mi antam reia hong tuangna a jot lui jarra, mi inn chunga an kalla, innchungha anvit a anatpaha Jisu madonna mitam karra an hong ma sul jui. 20Han anmani ning tak anngaiha Jisu ning ajetda alui ti, “O pasal na siatna ngaiha ka na ngaidam jui.”

21Han Pharisi ojangai ning an lunga jat jat an ngaidonjui, “Pathian amariam mi hi tu mo ani? Pathian jak inko mingai siatna angaidamtor an lui ti.”

22Jisu ning an lung sunga jat jat an ngaidon ha ajet a a ti, “Ijarra nang in na lung sunga hangan nan ngaidon? 23‘Nansiatna ka na ngaidam jui’ tile, ‘Thui nang chetaro,’ tihi homo a bai det?” 24Miring pasalnai han mingai siatna ngaidan torna ranak a nei tihi nang nin nan la jet rang ke, han a man a pang her khat a thi mijianghan a ti pe; “Nang in thui nang na jalna choi nang chetaro.”

25Han a man alui jal tenna an phut a thui a ajalna a choi a, Pathian anmanpakjui. 26Hingahin anmani pum ngak an ngak jui, han Pathian an lui manpak, kein in ve en ni a ngak pa chuan hi kan mu jui antia, hale a tam tak an chitjui.

Jisu ning Levi akuina

(Mat. 9:9-13; Mrk. 2:13-17)

27Hava suale Jisu ning aluihonghan khasana chom Levi antipahi a mu Jisu ning a ti, nang “Kanuk na juiro.” 28Han Levi ning phur rakip a mak a Jisu nuk a juia a che jui.

29Levi ning Puma a inn na bu nek kui na a var jui, hava karra khasana chom ngaile a dang mitam an om. 30Han pharisingai le adang chong jen ojangain Jisu a thiamruoingai jiang han anti, “Ijarra nang in hiva khasana chom siat nei le nan chak nan nek chun” an lui ti?

31Han Jisu ning anmani jiang a sang “Anat ngai ranga thiampu a ngai, tak-ha adamngai rang ko ngai mak.” 32Kei ning Pathian jet sa ngai ranga ka hong chang mak, tak-ha siatnei ngai lung manthul na rang ka hong ani.

Bungei Ruia Dingkel

(Mat. 9:14-17; Mrk. 2:18-22)

33Hinga hin anmanin “Puma jiang an lui ti, Puma, Johon thiamruoingain bu an ngeia lam na an nei, pharisingain hangan an tho, tak-ha na nuk jui keini ko chak le nek a jot.”

34Jisu ning a sang, ““Muipa a om karlim ijamo muiruoi ahong ngai ha bunek luija ancherang? 35Tak-ha hingahin Muipaha anmani tenna an la tuang rang phat a om, havatik han ko anmanin bu anlangei rang ke.”

36Puman anmani jet thei na rang tetanna khat alui ripe, “Tu khat ning om puan thar ha ekset bak a puanlui han suide ma u, an suide aninko puan thar ham achetde rangani, hale a thar ham alui le kan ang noning. 37Han tu khat innom darkha tui a thar ha savun puankok alui a thun ma u, hale an thun a chang innom savun puankok ha achet rang ani, buak na ta savun kokha imang rang ani. 38Darkha a thar ha savunkok a tharra an thun rang ani. 39Hale tu ang khat ning darkha tui alui ha an in suale, a thar ha tok ma u ajarko, anmanin darkha tui alui ju ha a tui det anti.”

Currently Selected:

LUK 5: AIMOLBSI

Highlight

Copy