LUK 4
4
Jisu Amathemna
(Mat. 4:1-11; Mrk. 1:12-13)
1Jisu ning Jordan tenna an phut a hongkir phat han a chunga thaneithiang in a sip, han khonam ning ramtong na ama them ranga a hong tuang jui. 2Nikhua Som manli tak ama ning ram ma a om ma khonam ning ama jiang alui mathem, hava phat han ama ning i te khat chakmak, han a von a tam a chamjui.
3Khonam ning ati jui, “Nang in Pathian nai naninko Hiva lung hi bu man changro.”
4Jisu ning a sang, hingahin a kan jiak sake, “Bu jak in mingai ring na nimak.”
5Han khonam ning atuangret ramuol chunga a om rengram a hui rakip ha a man enjui, 6han ama jiang a ti pe Jisu jiang; “Hiva rakip a neipu chang ranga, hale lian na rakip hi nang jiang ka na pek rang ke, ajarko hiva rakip hi keikut chunga a om jui, 7han nang in kei hi chubei nabukro a renga ka na pek rang ke.”
8Hava han Jisu ning ama jiang alui sang, “Nang in na Puma jak ha chubei na buk rang a suak tia, hingahin a kan jiak sake.”
9Hava sua khonam ning Jisu ha Jerusalem Innthiang asangna tak mun na a tuanga, “Nang in Pathian nai naninko hiva innchung tenna an phut kanchomthakro; 10hingahin chong thianga a kan jiak sake, nang a na lui oak rang Pathian ning thaneithiang jiang chong a pek rang ke. 11Hale hingahin a kan jiak ret, na ke ngai lung in a tok mak na rang, anmani an kut a na lui pom nanti.”
12Jisu ning ama jiang hingahin alui sang, “Nang in na Puma napathianha ensin maro tia a kan jiak sa ani.”
13Han khonam ning Jisu ha alui mak jui, vei khat a pha amumak kar je.
Galili a Jisu Chuan A phut na
(Mat. 4:12-17; Mrk. 1:14-15)
14Hiva suale Jisu ning Galili alui hong kir pha han Thavang ranak in a chunga a hong sipjui. Hiva chong hi a mun rakip a an manthangjui. 15Jisu Sainagok innthianga a manchuhan mitam ning an lui manpak.
Nazaret Jisu An jot lui
(Mat. 13:53-58; Mrk. 6:1-6)
16Jisu ning ama khopui Nazaret hin a honga che na dan nuk jui a pong kan sak nikhuo hin Sainagok hin alui honga chong thiang tel ranga a hong ngirjui. 17Chong thiang lui ri Isaia a chong thiang ha Jisu ning a long a hingahin alui kan jiak a mu jui. 18“Puma Thavang ka chunga a om, ajarko a riang khodengtheingai jiang chongrina ranga, Kei hi a na thang jui, anluichur ngaiha ma sua na rang, a mit luidel ngaiha mu khir na ranga, a pong khodengthei ngai ma sua na rang ani. 19Hale Puma ajotpha kumha risuak na ranga kei a na hong tir ani jui.
20“Han Jisu ning chong thiang ha innthianga chuan tho khat jiang a pek suale a ong jui, han Sainagok inn thiang sunga a om mitam ning ama jiang an enjui. 21Jisu ning mingai jiang atipejui, Pathian chong thiang sunga an lui ti ha nanngai jarra a hong tung jui.”
22Han mitamin pumahi asat an lui bejui, hale puma amur sunga a hong suak chong han an renga pum ngak an lui ngak jui, han an kan biak; hivahi Josep a pasalnai ha mo nimak? an lui ti.
23Han Jisu ning anmani jiang alui ripe “Nangning hiva chong rakhenhi ma sial chil lui a kei jiang nan na dingkel rang ke, thiampu na tak ha man kan damro, Kapernahumma na tho chuan ngai ha kan jet, hiva nakhopui hin nom thodiro.” 24Jisu ning a sang, kein nang ni jiang a thiang ka na ri ani, Pathian chong ri mirakip hi an tak an tak khopui mingai ningko jotngai ma u.
25“Tak-ha kei ning nang ni jiang adik a kan ri ke ani, Elia phat lai kumthum le thakaruk chung van alui kan kharra, ramuol rakiphin bu aluitang phat han Israel hin meithaitam an lui om. 26Hale Elia ha tu khat ning om anmani karra luivatir ma u, tak-ha Sidomma a om Srepta mei thai nu jiang jak anluitirjui. 27Pathian chong lui ri Elisha phat han Israel la kusti atong a nat mitam an lui om, anmani karra tu khat jak om leidam ma u, tak-ha Sairia a om Namaan jak ha aluidam.”
28Han Sainagok sunga a om mingai ning chongaiha an jet karra an lung a tam luihuipe lai mak. 29han anmanin an thuia puma ha khopui tenna an phut annotsuak, tangbung asangna tak a hong deng juan ranga an tuang jui. 30Tak-ha Puma Jisu ning mitamngai karra a hong suak a a che jui.
Thavangsatlui Kanruai Pasal Khat
(Mrk. 1:21-28)
31Han Jisu ning Galili khopui Kapernahumma a hong lut, ama ning pong kan sak nikhuo han mingai alui man chu. 32Puma ning mingai ha a man chu karra, mingain a tam an ngak jui, ajarko Jisu ning chong lut a tam alui man chu. 33Hale inn thiang sunga bhut ning amanvet mi khat alui om, han ama ning a khek a om ma. 34“O Nazaret Jisu nang le keini imo kan suak? keini na manmang ranga mo na hong? Kein nang ha A thiang Pathian ha na ni.”
35Han Jisu ning ama ha akhap a a ti, “Omchianro,” han bhut ning mipaha anamlonna, i te khat man pong lui a a mak jui.
36Mingain a tam an lui ngak, khatlekhat an kanbiakjui. Hivahi ichongmo iri? Pathian ranak le rat na chong arile bhut ning asuakhiko? 37Jisu ning aluithona chuan ha an om na ramrakip a akantirjui.
Jisu ning Mitam A mandam
(Mat. 8:14-17; Mrk. 1:29-34)
38Jisu ning Sainagok a mak a Simon inn na a lut jui, Simon atarpiha a tam a nat a alui om anmani ning Jisu jiang an ri jui. 39Jisu ning anatnu jamunna a chea damtaro a ti pe, han anatnuha aluidamjui. Hale khangthui a thuia Jisu ha alui manpak jui.
40Hale ni alutsuahan anatrakip ngaiha Jisu jiang an hong tuang, ama ning a kut athem karra an lui damverjui. 41Hingahin bhut ngai ning om “Jisu ko Pathianke antia mitam kar tenna an phut a khek an lui suak jui.” Han Jisu ning om anmani ha leikhapmak, chong om leiman rimak, ajarko Puma ha Khrista Mesaia tihi an lui jet.
Sainagok Sunga Jisu Chong ri
(Mrk. 1:35-39)
42Jisu ning ni a hong suak pha han khopui a mak a hip adaina mun na a che jui, hale mingai ning Jisu ha an tok ti tirra an mu karra, anmani le om suam na ranga an lui ri jui. 43Tak-ha Puma ning anmani jiang a ti, “Kei ko Pathian rengram rang chongsat ha khopuirakip hin karirangke, ajarko hiva ranga kei hi Pathian ning a na hong tir ani.”
44Hingahin Jisu ning Sainagok innthiangmun rakip hin chong thiang ha alui ri jui.
Currently Selected:
LUK 4: AIMOLBSI
Highlight
Share
Copy
Want to have your highlights saved across all your devices? Sign up or sign in
Aimol (Re-edited) NT - Rabu Athar
Copyright © The Bible Society of India, 2016.
Used by permission. All rights reserved worldwide.
