LUK 3

Johon Baptis chong ri

(Mat. 3:1-12; Mrk. 1:1-8; Jhn. 1:19-28)

1Tiberiu ning reng chung nung a chang na kumsomlei ranga a tung pha lai tak, Pontias Pilat ning Judia ram ma reng a chang, Herod ning Galilija reng a chang, a naipangpa Philip ning Iturea le Trachontis hin reng a chang, Lysania ning Abilene hin reng alui chang, 2han Anna le kaijapha ngain thiampuilian an lui chang pha han Pathian tenna an phut chong alui hong Zakharia a pasalnai Johon jiang, 3Johon ning Jordan tui pui sirra a om rakip jiang Pathian chong alui ri a, nan lung thul taru, tuija baptais thoru, Pathian ning na siatna ngaiha a na ngaidam rang ke. 4Pathian tashanthei Isaia ning alui jiak; “Ramtong lian na mi khat ning aluikhek Puma rang lam ha luisin taru, Puma lon na lam ha man tunru. 5Akual ngaiha amantun rang ke, lampo le lamkur ngaiha man kan ang nati. 6Miring rakip ning Pathian san ring na ha an mu rang ke.”

7Baptais tho ranga a hong mitamngai jiang Johon ning a ti, “Rul vonchoingai nang ni hi” Pathian ning khodengthei na apekrang hin tantor kan ti tihi tu inatipemo? 8“Hiva jarra nan lungthul taru chuan sat thotaro, han kan pu Abraham a om tilaimaru, kein tikati hiva lung ngaihi Pathian ning Abraham a naingai amanchangtor. 9Atuntak hin nom thing kung rajunga reiha akanjep a om, hava jarra a ra om lui thing kung ngaiha antuk tanna meija anhallang ani.”

10Han mitam ning ama jiang an lui dingkel, “keini imo kan tho rang?”

11Johon ning alui sang, “Tu angmanin kuntai athua anni a nei mi han a nei lui jiang khat pek rase han chak rang a nei mi han nom ha ang han tho rase.”

12Hale khasana achommi aviar Johon jiang an honga chong an dingkel. “Oja, keini hi ija mo kan tho rang?”

13Johon ning anmani jiang a sang, “Nang ni ning a khel la luimaru.”

14Hava suale ralmi aviar an honga an lui dingkel, keini ija mo kan tho rang? A ma ning a sang; “Nang ni tu khat jiang om namrakpa tho a luimaru, hale ani lui a non tak pek maru, hale nan mu rang suak han khop na neiru.”

15Mitam ngai ning an lui ngaidonjui, Johon hi Mesaia Pathian naihamo ani tia an lui ri. 16han Johon ning a ti pe, Kei ning nang ni hi tuija baptais ka na man tho; tak-ha kanuk a hong rangpa hi ko kei nek a lian a rang khat ani, kei ning ama kekok arui orang tenna ka rahui chang mak. A ma ning Thavang Thiang le meija baptais namantho nati. 17Puma ning a chang vena tarang mun ha sinnata, hale gehu thunnata puma jangjap han japnata asi avai rakip ko a tor ti bui meilaia deng juan rang ani.

18Hingahin Pathian chong thiang le sanring na chong hi Johon ning alui ripe. 19Tak-ha Herod rengpa ning a naipangpa numei Herodia alui nei jarra Johon ning aluikok. 20Hiva ruihin Herod rengin Johon hi ren inn na a thunjui.

Jisu Baptais Thona

(Mat. 3:13-17; Mrk. 1:9-11)

21Hingahin a hong ni jui, mirakip tuija baptais an tho pha han Jisu om tuija baptais a lut jui. Pathian jiang an lam pha han vanram hi alui hong kan long. 22Thavang Thiang ning khunu anga a honga, Jisu chunga a om, han vanram tenna an phut chong khat a honga, “A ma hi kei ning ka lungsiat ka pasalnai ha ani, ama jiang ka lung a be ka lungdo a tung.”

Jisu Pu le Pangai

(Mat. 1:1-17)

23Jisu ning puma chuan a tho phat han a kum somthum a tung jui. Mi ning an ngaidon anga Jisu hi Josep a nai ani, Josep hi Heli a nai ani, 24Heli Mathathia a nai ani, Mathathia lam Levi nai ani, Levi Melchi a nai ani. Melchi Jan a nai ani. Jan Josep a nai ani, 25Josep hi Mathathia a nai ani, Mathathia hi Amos a nai, Amos lam Naum a nai, Naum lam Esli a nai, Esli hi Naggai a nai ani. 26Naggai lam Maath a nai ani, Maath hi, Mattthia a nai, Mattthia lam Semchin a nai, Semchin hi Josek a nai, Joshech lam Joda a nai, 27Joda hi Joanan a nai, Joanan lam Rehesa a nai, Hehesa lam Zerubbabel a nai, Zerubbabel hi Sualtial a nai, Shualtial hi Neri a nai ani. 28Nerihi Mechi a nai, Melchi lam addi a nai, Addi lam Kosam a nai, Kosam lam Elmadam a nai, Elmadam lam Er a nai, 29Er lam Joshua a nai, Joshua lam Elizier a nai, Elizier lam Levi a nai. 30Levi hi Semion a nai, Semion lam Juda a nai, Juda lam Josep a nai, Josep hi Jonam a nai, Jonam hi Eliakim a nai, 31Eliakim lam Melia a nai, Melia hi Menna a nai, Menna lam Mattatha a nai, Mattatha hi Nathan a nai, Nathan lam David a nai, 32David lam Jesse a nai, Jesse hi Obed a nai, Obed lam Boaz a nai, Boaz lam Salmon a nai, Salmon hi Nason a nai, 33Nason lam Amminabad a nai, Amminabad lam Admin a nai, Admin hi arni a nai, Arni lam Hezron a nai, Hezron lam Perez a nai, Perez hi Juda a nai, 34Juda lam Jakob a nai, Jakob hi Issak a nai; Issak hi Abraham a nai, Abraham lam Tera a nai, Tera hi Naor a nai ani. 35Naor lam Serug a nai, Serug hi Reu a nai, Reu lam Peleg a nai, Peleg hi Eber a nai ani. 36Shela hi Kainan a nai ani. Kainan hi Arphaxad a nai, Arphazad Shem a nai, Shem Noa a nai ani, Noa Lamech a nai ani, 37Lamech Methusela a nai, Methusela lam Enok a nai ani, Enok Jared a nai, Jared hi Mahalale-el a nai, Mahalale-el lam Kainan a nai ani, 38Kainan lam Enos a nai ani. Enos lam set a nai set lam Adam nai ani, Adam lam Pathian nai ani.

Currently Selected:

LUK 3: AIMOLBSI

Highlight

Copy