MARK 12
12
Darkha Rahuan Salpa Tetan na
1Puma ning anmani jiang tetan na chong khat a ripejui. Mi ankhat in darkha thei rahuan na, darkha a linga, theirui sornarang khur ankhat achuia, hale inchung a sang angakrang an khat a sin na, hava suale rahuan a thongai jiang a man sala a in a mak-a khuolram alaktak a che jui. 2Ara luakpha ahongtungpha, a man a suak an khat darkha rahuan asalngai jiang asalman lui rang atirjui. 3Rahuan asalngai han suak ha anchura, an vea, i jum peklui a an tir jui. 4Hava suale a man suak dang an khat a tirret, rahuan asalngai han a lu anvekhuipe, jak na anluipekjui. 5Han a man suak a dang an khat a tirret, anmanin a maha an lui that jui, hale a dang a tam tak ngain hangan anmanin an ve le an that le an lui tho jui. 6A man atirrang an khat jak omlaimau, hava ha a nai lungsiat tak-ha ani, a man atir, “Ka nai hi ko anmanin chit jak na an luinei rang ke”, tia a torna tak anmani jiang atirjui. 7Tak-ha rahuan asalngai han an khat le an khat jiang an kan siamma, a mahi lal le thum aluirangpaha ani, hongru, thatrei, aluiranghi kein in tumrei anti. 8Hiva jarra anmanin an churra, an that-a, ama ha nom tiang an deng juanjui.
9Ha a chang inko rahuan neipupa han imo a tho tarang? “A ma hong na ta rahuan asalpu ngaiha that rang ani, hale rahuan ha midang jiang imansaal rang ani jui.”
10“Inn a sinngai ning an ineimanlui lung ha a ki chopuitak ha anmanchangjui.
11“Jisu ning a ti Hiva hi Puman a tho ani, keini mitmua i duk a ngakpa nimak mo! tia chong thianga ani ha nang nin jet ngai mak che u mo?”
12Jiw ulianngai han Puman hava tetan na a ri ha anmani enda na, lung thak na arike, ti an jet, anmanin Jisu ha churranga an ngaidon; tak-ha mitamngai ha an chit jarra an mak a an che jui.
Khasana Pek Ruia Dingkel
13Puma Jisu chong ri an jet anmanin churna ranga, Pharisi her khat le Herod naingai her khat ama jiang chong dingkel anluitir. 14Anmani an honga, “Oja, nang adik mi ke na ni, hale chit jak neimak che, ti kein in kan jet, ajarko tute mai en lui, Pathian lam adik tak ha nang in na man chu ani. Hava jarra Kaisar jiang a khasana pekranghi dan mo ani hale nimak mo?” 15Khasana kan pek rang mo, kan pek lui rang mo? Namanjetro, anti. Tak-ha Jisun anmani sat ankanrolha a jet, anmani jiang, “Irangamo nan na en sin peisa an khat hongluiru enrong,” a ti.
16Anmanin peisa ha an khat an hong choia, a man a dingkel la, “Tu ramil le tu mingmo a kan jiak hi?” Kaisarta ani tia anmanin an sang.
17Jisu ning amani jiang a sang, “Kaisarta a chang phur ha Kaisar jiang peru, hale Pathian ta ha Pathian jiang peru,” a ti pe. Hale anmanin ama chunga anjakjui.
A thi Ringkhir Ruia Dingkel
18Sadusi her khat Jisu jiang an lui hong. (Anmani ngaihi thina tenna an phut thui khiret om mak a ti ngaiha anni).
19Anmanin Jisu jiang anti, “Oja, Mousi in hiva dan hi keini ranga alui jiak ani, mi an khat in numei anei a nainei lui-a athia a mak aninko, a-unai han numeinu hale a u athipa rang nai a nei na rang numeinu ha om pui rase u, a ti. 20Pha khat ulenai ucha sari an lui om; ulian tak pa numei a nei jui, hale nai neiluia ama a thi jui. 21Hava suale anni chang na han a numei ha a-ompuija, naineiluia athide a a mak jui; hale an thum changna pa ham hangan athidejui; 22hale an pasal sari ha a don a don na an renga numeinu ha an om pui vera nai neiluia an thi ver jui. Hava suale a torna tak numeinu ham a thi jui. 23Thui khir nikhuo han mingai anthuipha le ama nu ha tu numeihamo ichang rang ani jui? Ajarko ansari an lui ompuipet ani,” anti.
24Jisu ning a sang; “Nang nin Pathian ranak rat nale chong thiang ha nan jet mak jarra ani lui tiang nan ngaidon nimak mo? 25Ajarko a thi ngai ha thina an hong thui khir pha, anmani vanram ma thanei thiangai anga an ni jui, numei pasal mui tu ang, mui kan pek om lai noning. 26A thingai thuikhir ret rang chung changa, Mousi chongthiang rabu han thingna karra mei a chuanga chong a ri hale Pathian in Mousi jiang, ‘Kei Abraham Pathian, Isak Pathian Jakob Pathian ka ni; a ti ha nang nin tel ngai mak che u mo?’ 27A ma a thingai, Pathian ha nimak, aringai Pathian ha ani, atinaha ani. Nang nin a tam tak nanlajui,” a ti pe.
Chong pek Liantak
(Mat. 22:24-40; Luk. 10:25-28)
28Dan a thei pasal an khat a honga, anmani khat le khat ankankher anga, Jisun Sadusingai asat ni anga a sang ha a man a mu pha, ama jiang, “Chong pek karra ho ha mo a lian tak ani?” Tia alui dingkel.
29Jisu ning a sang, “Israelngai; Puma kan Pathian an khat jak ha Puma ani. 30Puma na Pathian ha na lung ril pumpui na thavang renga na ranak rakip, nangaidonna rakip, lungsiatro, 31hale anni chang na ha ko, nang na thei jak na kan lungsiat anga nakhuo nasir napang lungsiatro. Hiva ngai khela chong pek a lian a dang om mak,” a ti.
32Dan ojapa han Jisu jiang a ti; “Oja, nang nadikjui; nang in Pathian an khat jak ha Puma ani, natihi adik. A ma ni lui a dang om mak. 33Lungril rakip, ngaidon rakip hale ranak rakip lungsiat rang ani, a tak a thei jak ikanlungsiat anga akhua a sir a pang lungsiat rang hi sakhat romanvamma Pathian jiang kat nek a khel ani.”
34A man a ching tak asaha Jisun a mu pha han, ama jiang a ti, “Nang Pathian rengram tenna an phut kanlak laima che; hava suale Jisu jiang tu ten thouna sat a chong dingkel torlai ma u.”
Khrista Ruia Dingkel
(Mat. 22:41-46; Luk. 20:41-44)
35Jisu ning biakinn sunga amanchu lai chong a dingkel la, “Dan ojangain Khrista David a nai ani tia ija mo antithei? 36David ha thavang thiang in aphuk amansanna, amanri suak; ‘Pumahan ka Puma jiang a ti, a na-endangai ha na ke thuaia kasiakmak kar je, ka chang tiang hin ongro.’ 37David khetin ama ha Puma a tia chang inko ija mo Khrista a nai ichangthei rang?” Mitamtak innom Jisu manchuha ningsat an luingai.
Jisun Dan Oja Ngai Ruia A ri
(Mat. 23:1-36; Luk. 20:45-47)
38Jisu ning anmani amanchua anmani jiang a ti, “Dan oja kuntaichual puma alonjot kaithial mun na chit jak na chubei tho rang a dei ngai, 39hale kan chun na inna le ut mun na ong na asat tak a tokngai, 40mei thai ngai in le an nei sumle-sial anchaksuo, mi en ranga a sot tak lam na anneingai tenna kan ching theiru. Anmanin siatna a lian tak an tum rang ke.”
Meithainu Pek na
(Luk. 21:14)
41Jisuning biakinn na peisa siakna ma don tak a honga, mitamngai ning peisa anpekha alui en. Kan chong mingain peisa tam tak an lui pek. 42Ariang khodengthei meithai an khat a honga, peisa anni ahongthun. 43Jisu ning thiamruoingai a kui khomma, anmani jiang a ti, “Kein adik tak kinati ani, hiva a riang khodengthei meithainu ning peisa bukna mun na anpekngai karra a man a tam tak a pek jui, 44Ajarko a dangngai rakip ning a tam tak an nei an phut ankhuisena an pek ani, tak-ha amanu ko ariangnom aneisalep ha a pek ani.”
Currently Selected:
MARK 12: AIMOLBSI
Highlight
Share
Copy
Want to have your highlights saved across all your devices? Sign up or sign in
Aimol (Re-edited) NT - Rabu Athar
Copyright © The Bible Society of India, 2016.
Used by permission. All rights reserved worldwide.
