MARK 13
13
Biakinn Mangranga Jisun Aluiti
(Mat. 24:1-2; Luk. 21:5-6)
1Biakin na anphut an hong suak pha han, thiamruoi an khat in ama jiang a ti, “Oja, enro, lungngai le inn an sin ngaihi i duk a ngak pa mo ani!”
2Jisu ning a sang, “Innpui a lian ansinhi nan mu mo? Lungngai hi an khat chunga an khat jak om maklui-a mankui makrang an khat jak om ommak.”
Khodeng Theile Pongna
(Mat. 24:3-14; Luk. 21:7-19)
3Jisu ning Olib tangbung chunga a ong pha han, Pitar, Johon Jems hale Andrew ning anbinga an honga andingkella, 4“Hava i tik rang mo, hale hiva rakip hi i tik mo a suak rang, imo jet na kan mu rang? keini na man jetro,” anluiti.
5Jisu ning anmani jiang a ti, “Tuten lam le tiang an na tu-ang mak na rang kan ning theiru. 6Mi atamtakin, ‘Keihi amaha ka ni!’ tia ka ming choi an hong rang ke, anmanin mi a tam tak lam le tiang tuang nanti. 7Ral kan nok rasale, ralchong nanjetpha chit maru; hava a hong suak chiak rang ke, tak-ha a torna laninoning. 8Ajarko jat an khat in jat an khat, hale rengram an khat ning rengram an khat chunga ral kan tho rang anni; mun a tam tak ning nu kannik rang ani, bu hong lutrang ani, hava ngaiha nai an nei rang tiang nai ha an dui anga a phutna pongna ha ni nati.
9“Nang ni nantak nanthei jak kan ning theiru; ajarko anmanin ulianrupngai jiang napeklut rang anni, hale Sainagokhin naverang anni, kei jarra nang ni ramvaihomngai le rengngai mai kung a shakhi ngirang nan ni. 10Chongsat hi a rapatak mirakip jiang an la ri chiak rang ke. 11Anmanin nang ni annachura nan chongtan rang an na peklut pha, imo kanrirang tia a masat tak nan ning man dong maru; a phat a hong tung han nang ni nanrirang chong ha Thavang Thiang in irirang ani. 12Mi ning a u a nai a peklut rang, hale a pan a nai a peklut rang, hale an naingain an pa an nu an kan enda puia anla that rang ke; 13kei jarra mirakip ning nang ni na-enjot noni u. Tak-ha a torna tunga a khang rat han kan san ring na imu rang ke.
A satlui Aphat
(Mat. 24:15-28; Luk. 21:20-24)
14“Mipong khodengthei manmang rang ma tir a-om tak, a ngir mak na rang mun na a hong ngirsuak nan mu rang ke, apasuak han itinamo jet theiru, hava pha han Judia ram ma a omngai ha tangbung tiang tan rase u; 15In chunga a om mi han in sunga aphur lui ranga lutlai ma rase; 16Hale lui a a om mi han a puan lui ranga insung lutlai ma rase. 17O, hava nikhuo chungrik-om, ranua anaivai ngai ranga khodengthei ke! 18Hava pha phabilai asuakmak na rang lamru, 19Ajarko hava nikhuo pha sung han a pong khodengthei na a lian tak, Pathian kut sin lai tenna tuntunga ilasuak chilui pong khodengthei na ha i hong tung rang ani. 20Hava nikhuo pha ngaiha Puman amanbongmak inko, miring tute kansan ring tor noni u, tak-ha a man athang suakngai rang ko hava nikhuo kamanbong a ti. 21Hiva jarra tu a chang innom mi an khat in, ‘Enru, Khrista ha hin a om’, animakle, ‘son a om’, anti aninom takngai maru. 22Khrista ni lui le tashanthei niluingai hong suaknanta jet nale chuan a ngak pa anthorangke a jot inko athang suakngai ten nom aletiang na tuang na rang tho nanti. 23Tak-ha aphama kein nang ni jiang kinalui man chu ani, kan ning theiru,” a ti.
Mi Pasalnai Ning A hong rang
(Mat. 24:29-31; Luk. 21:25-28)
24“Khodengthei na pha nikhuo a tor suale, khuo jingrang ani, tha varlainoning, 25hale arsingai vanram tenna hongchulrang anni, hale thangvan sum phai kongkarra ranak rat na ngaiha kannokrang ani jui. 26Hava pha Mi Pasalnai ha ama lianpui nale a ranak le kan ruaia sumphai chunga i hong kando rang ani. 27Hava suale athang suaksa ngaiha khomchun ranga thaneithiangngai ramuol le chungvan na aki manli a torna kolmong an khat tenna an phut an khat tungkhan hongtirang ani”, a ti.
Theichangkung Tenna Jetna
(Mat. 24:32-35; Luk. 21:29-33)
28“Theichangkung a an phut kan churu. Theichangngai a don a na acher inko, kholum pha a nai jui ti nang nin nan jet. 29Hava anga hiva ngai rakip a hong suak nan mu pha han, a man inn khar kung a hong phakjui, a phat a nai jui tijetru. 30Adik tak kinatipe ani, hiva rakip asuakmak kar je a tunna miruol hi latornoning. 31vanram le ramuolko i lam ang rang ke, tak-ha kei chong ko mang chil noning.”
Nikhuo Le A pha Tukhatning Jetmau
(Mat. 24:36-44)
32“Hava nikhuo le aphahako a Pa ni luia, vanram thaneithiangngai le a nai Pasal ha nom tu ten jet ma u. 33Kan ning chakru, ajarko a pha i tik mo i hong tung rang nang nin jet mak che u. 34Mi an khat in khuolla a che tiang, asuakngai en chuan sin ranga chong abea hale inkharngak jiang om a kan ning chak na rang chong a pek anga ani. 35Hiva jarra kan ning chakru, ajarko in neipupa ha nitak a chang a, janchim a chang a, jingtiang a chang i tik phamo a hong rang nang in jet mak che u. 36Jetlui thai luia ama a hong tunginko na lui jalla na lui ommak na ranga, 37Kan ning chakru, katihi mirakip jiang kati ani.”
Currently Selected:
MARK 13: AIMOLBSI
Highlight
Share
Copy
Want to have your highlights saved across all your devices? Sign up or sign in
Aimol (Re-edited) NT - Rabu Athar
Copyright © The Bible Society of India, 2016.
Used by permission. All rights reserved worldwide.
