TIENKAM 12
12
Nkiubo Mathad
1Haibo tingga Chawang Herod niu phumling maidung khangsiatu kam mathad sude. 2Paniu John singnapiu Jacob tu chahengniu dangshat mibo-e. 3Haise Jehudi mai chunwibo-e chiubo paniu ngaoboga, paniu Peter tu minra kamsude. (Haise Chakhi jaomakbo Taruak Ngee tingga padle). 4#Tad 12.1-27.Sichiujiu Peter tu minlujiu, kavangkyga khaijiu charimai khang madai-madainiu khuanbo phom madaitu pi khuanjiu bamme. Herod niu patu Kenpadbo Ngee sainiu mathiu masuang gasu ladjan thiura chiujiu maningbo-e. 5Sichiujiu Peter tu kavangkyga khai mide, chiudi phumling maidungniu paleng Tingwang khuga kakheng thiuchang thiujiu bamme.
Peter Tu Kavangky Gasu Phutkhaibo
6Herod niu Peter tu mathiu suangga jupad rabo nchun suang gase, charimai khangnia kakga Peter se jibamme. Patuse chagiriangniu khinman bamme, khatdi kavangky rengmun gase akhe maidung bamme. 7Kavangky lunggase Rapiu gu maza khat simakdak wangjiu pabiu thaoben khaide. maza siniu Peter khuga wangjiu, pamakhuak tun kalungjiu din-e, “Kalanglo! Sulo!” chiujiu makiang sude. Siga Peter ben gasu chagiriangse ntiakiunuang mide. 8Siga maza siniu Peter khuga din-e, “Nakhen katin lujiu naphisop khaisulo.” Peter niu sichiujiu kam sude, siga maza siniu din-e, “Nafai benlulo khatdi asaisui lujiu padlo.” 9Peter niu sichiu suipadde, para haise madungao-e chiu maningbo-e, chiudi haise madungao makjiu maza siniu pachangsiakjiu kambambo-e. 10Sichiujiu panai siniu raithubo akhebo bam, sibosai niabo, sibosai kanamthubo chagi rengmun, namdilam tadngutbo rengmun chiujiu kenpad sude. Sichiujiu rengmunse paronna lepad khaijiu panainiu tadpadbo-e. Panainiu sichiu tadjiu bambo gasu, simak dakjiu maza siniu Peter tu saokhai diakge.
11Siga Peter niu pakhuga degu padmijiulo chiubo silujiu din-e, “Tuhoira haise pachang siakge chiubo Iniu silude: Rapiu niu pagu maza langkhaijiu Herod pumtan gasu khatdi Jehudi maidungniu padsune chiujiu maningbambo hina gasu atu gukhai bide.”
12Dechiu padmilo chiubo paniu silujiu John Mark pui, Mary kyga maidung kengkha wang madui lujiu kakheng thiubamboga wangde. 13Peter niu kamun lenlamse magande, siga kavangpui pazanniu Rhoda kubo pui siniu npaora padde. 14Paniu Peter khuanse silujiu pachun wiju mijiu akhamse lekhai makjiu Peter wang chap bamme chiubo ngut paokhaide. 15“Nang chara masa mide,” chiujiu paliuniu patu din-e. Chiudi sise majisiakge chiubo paniu dinjiu bamme. Sijengniu paliuniu paokakge, “Haise pagu maza-e.”
16Sichiu bamboga Peter niu akhamse maganjiu bamme. Sichiujiu paliuniu akhamse lekhaiboga, khatdi paliuniu patu ngaoluboga paliu suang hamide. 17Maliuna bamra paniu pabenniu kamlen lujiu, patu dechiu kavangky gasu Rapiu niu puipad bilo chiubo paliu khuga dinkhaide. “Haise Jacob khuga khatdi malum maidung khuga dinkhai bilo,” chiujiu paniu din-e; sibosai paniu siboky gasu pabam khatlam tadmide.
18Nsuanse padboga, khuanbam maidungse paliu suang hachang hamide, “Peter khuga degu padmi jiulo?” chiu chakhuan kario sude. 19Sichiujiu patu phiura Herod niu chamtan pikhaide, chiudi paliuniu patu phiudao makge. Sijengniu paniu khuanbam mai situ maniu-e khatdi paliutu kamshat mira chamtan pikhaide. Haibo saiga, Herod niu Judea phutlujiu Caesarea ga pakak khat lung mide.
Herod Shaibo
20Herod niu Tyre maidung nai Sidon maidungtu palung pomchang pomme, siga paliuniu paphom khat thiulujiu patu adaora tadde raiboga paliuniu paliutu nkha khaira chawangkining khuan bambo Blasta tu hiamlude. Sigasu paliuniu Herod khuga tadlujiu agi-manaijiu lungra kheng-e, palamra paniu paliu kadihleng katiu-kasak hai chawang kadih gasu daobo-e.
21Sichiujiu chaplubo tingmik gase Herod niu chawang pon piulujiu, pawangbamga ntaolujiu, maidung khuga tacham din bamme. 22Siga paliuniu haichiu din-e, “Haise chamaina khuan makge, haise chara khuan-e!” 23Siga Rapiu gu maza siniu Herod tu kakhiushat nuang mide, palamra paniu Tingwang tu chakhuang thiu makge. Patuse masanpui tiujiu shai mide.
24Sichiujiu Tingwang chamse chiupad sude khatdi dikhang sude.
25Barnabas nai Saul niudi panai ngamse Jerusalem ga loikhai lujiu John Mark tu puilujiu tad mide.
Currently Selected:
TIENKAM 12: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
