TIENKAM 11
11
Peter Niu Jerusalem Phumlingga Paowangbo
1Khommaidung khatdi malum maidung hinaniu Nkeng maidungdi Tingwang chamse lutao lude chiubo hai Judea ramlungga chiukam mide. 2Peter niu Jerusalem ga wangbo tingga, pagirombo Nkengmai don ponbo jengniu, patu khanjiu pakhuga haichiu din-e, 3“Pagirom makmai kyga nangra riukhai-e sironna makjiu paliutu maluang katiu tiu-e!” 4Sijengniu paphibang gasu degu padmilo chiubo Peter niu paliu khuga dinsude:
5“Joppa namdiga Iniu kakhengthiu bamboga madungao khat Iniu ngao-e. Tinggen lamsu warek kadibo khat kumjiu pake madai gasu khinlujiu amungnaga majukiu khaibo Iniu ngao-e. 6Iniu sibo lungga bambo situ phui mawijiu phuiboga, chaky khaodi, nkan khaodi, paganiu buangbo wakhaodung khatdi nkan thingnadungdi ngao-e. 7Sigasu chakhuan khatniu akhuga dinbo Iniu chiu-e, ‘Peter yo, sulo, kamshat lujiu tiusulo!’ 8Chiudi Iniu din-e, ‘Makge, Rapiu yo! Tacheng saisuijiu masan makbo, maksai taniabo tiutekse Iniu wadaodi amun-ga khai matai makge.’ 9Chakhuan siniu tinggen lamsu dinlan-e, ‘Tingwang niu masan-e chiujiu dinmadu mibo situ masan makge chiujiu maning tulo.’ 10Haise padlon summe, kanamboga pakhiangnase tinggen lam lukhang lan mide. 11Sibo wansiak gase Caesarea lamsu langwangbo mai khang sumniu I bambo kygase mengkin niude. 12Wadi manangbo khatdi makhinbo thiumakjiu paliutu majang tadra Hiupuina siniu akhuga dinkhai-e. Siga Joppa gasu malum maidung khang charuk hainiu Caesarea tangbo asai suilu tadle, sichiujiu aliu mathiu Cornelius kygase ngutle. 13Paniu paky lungga maza khatniu chapbam niujiu ngaolubo lamga aliu khu paokhai-e, paniu pakhuga haichiu dinkhai-e, ‘Joppa lam maidung khangsiatu langkhaijiu Simon Peter kubo piutu kura dinkhailo. 14Paniu natu khatdi nakykhunmai mathiutu ranlurabo chamse dinkhai bine.’ 15Sichiujiu Iniu paliu khuga dinsu gapboga, paphibangga aliu khuga kumgapjiu paliu rigadi Masanbo Hiupuinase kiukhai bide. 16#Tk 1.5.Siga Rapiu niu dinkhai mibose Iniu maning taode: ‘John niura taduiniu nphum khai-e, chiudi naliura Masanbo Hiupuina gasu nphum rabo-e.’ 17Aliuniu Rapiu, Jesu Khrista tu malumboga, paniu aliuleng pikhaibo kalense kumgapjiu Tingwang niu Nkeng maidung khugadi pikhai bibo-e; sichiusai dechiujiu Iniu Tingwang tu khamlu ralo!” 18Paliuniu haise chiuboga paliuniu ari-arajiu bambose mathak mide, khatdi Tingwang tu thuonjiu din-e, “Sichiusai Tingwang niu Nkeng maidungtu pijiu lungli lura khatdi ringlura pawan pikhai bide!”
Antioch gu Phumling
19 #
Tk 8.1-4. Stephen tu kamshatjiu mathad subo ting gasu tadmara mibo malum maidung khangsianiu Jehudi maidung khuga ronna tacham dinjiu Phoenicia, Sypra khatdi Antioch katang tadmide. 20Chiudi Sypra nai Cyrene gasu malum maidung khangsianiu Antioch lam tadlujiu Nkeng maidung khugadi Rapiu Jesu lamga Kawibo chamse dinron khaide. 21Rapiu gu pumtanniu paliutu maluang khaibo jengniu maidung kakeng khaniu Rapiu tu malum mide.
22Haibo chamse Jerusalem gu phumlingga chiulubo jengniu, paliuniu Barnabas tu Antioch lam langkhaide. 23Paniu siga mengtangboga, Tingwang niu dechiujiu maidungtu thoidam pikhai bilo chiubo ngaoluboga pachun wide khatdi paliu lungchun pakhiangna Rapiu tu malumjiu bamra paniu katin khaide. 24Barnabas hai kawibo mai, Masanbo Hiupuina niu phuijiu bambo khatdi malumbo jengniu maidung kakengkhatu Rapiu khuga puiwang lude.
25Sigasu Barnabas niu Saul tu phiura Tarsus lam tadde. 26Paniu patu daolujiu, Antioch lam majang wangde, khatdi panai khangniase siga aruang lujiu sibo phumlingga bammai kakeng khatu takum khatling katikhai bide. Antioch ga bammai malum maidungtu Khristian maidung chiujiu kurai thubo-e.
27Sibo tingga phaimiukakung khangsianiu Jerusalem gasu Antioch lam tadde. 28#Tk 21.10.Paliu ruanggasu khang khat, pazanniu Agabus kubo piuniu Hiupuina pumtan pen gasu chapkhang lujiu kadihpiri pakhiangna charakhum kadibo khat wangne chiujiu dinkhaide. (Haise Claudius niu mawang bambo tingga padde). 29Khommaidung siniu Judea ga lungbam mai malum maidung leng paliuniu ngamlubui thenna pikhaine chiujiu chaplude. 30Haise paliuniu Barnabas nai Saul tu phumlingga langkhaijiu katingmai khuga rangkangse pikhaide.
Currently Selected:
TIENKAM 11: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
