TIENKAM 14
14
Iconium Ga
1Iconium gadi sise kumjiu padde: Paul nai Barnabas niu maduiky lamse tadlujiu dinsuboga Jehudi maidung khatdi Nkengmaidung kakengkha malum mide. 2Chiudi malum makbo Jehudi maidung siniu malum maidung situ suimakjiu Nkengmai khangsiatu kam masu khaide. 3Ladlangtadmaidung siniu siga Rapiu gu champaose hujiu dinsuboga, tasibo khatdi maisuang habodung kamrabo pumtan paliutu pikhaijiu Rapiu lungsiat haira maji-e chiubo kamlen khaide. 4Sibo namdiga bammaidungse phom nia thiujiu khangsianiu Jehudi maidung lam, khangsianiu ladlangtadmai lam ponsude.
5Sigasu Nkeng maidung khangsia nai Jehudi maidung siniu paliugu jupaodungtu aruanglujiu ladlangtadmaidung situ kam masajiu tatu rotra kamsude. 6Haise ladlangtadmaidung siniu siluboga, Lycaonia ga bambo Lystra nai Derbe lam khatdi sibo luongriang lam pakkhai mide. 7Siga paliuniu kawicham hai dinron khaide.
Lystra Nai Derbe Ga
8Lystra gase papui managasu paphi sajiu tadngam lakbo maipiu khat bamme. 9Sibo piuse siga ntao lujiu Paul chamse nkingjiu bamme. Pahai malum mide khatdi wikhaibo suide chiubo Paul niu ngaolujiu, khatdi paniu patu phuimating lujiu pakhuan tanjiu din-e, 10“Chap mating khanglo!” Sibo piuse machak khangjiu tadmariu sude. 11Paul niu kambo hai maidung siniu ngaoluboga, paliu Lycaonia mai lad gasu haichiu senjiu dinsude, “Chara siniu chamai lun thiujiu aliu khuga wang bamme!” 12Sichiujiu paliuniu Barnabas tu Zeus chiu kude, khatdi Paul tu Hermes chiu kude, palamra pahai chalad kadinboga papee thiu-e. 13Namdi lenlam bambo Zeus rakygu singku siniudi matomchi nai charapen thinwangjiu ladlangtadmai khugase charathiu khaira kamsude.
14Paliuniu kamrabo khuanse Barnabas nai Paul niu chiuluboga, panainiu panai fai-ni phetjiu mathiu ruangga pakwangjiu haichiu sensude, 15#Tad 20.11; T.Lui 146.6.“Dekamjiu naliuniu haise kambam jiulo? Anaidi naliu kumbo chamaina-e! Naliuniu haikumbo pageng habo gasu, ting-kadih, duipui khatdi sibo lungga bambo pakhiangnatu dampao ringbambo Tingwang, khulam mariwang lura Kawibo champao haise dinkhaira anai haiga bambo-e. 16Karaigara mai hina siniu pachunning-ning saisuijiu tadra paniu suikhaibo-e. 17Chiudi paniu pawan machang kawibo ngam kamjiu bambo hai pisi khaijiu tinggen lamsu tingdui pikiu khai khatdi pawan saisuijiu miusydi pikhaibo-e; sichiujiu paniu naliutu katiu pikhaijiu naliu chun piwi khaijiu bambo-e.” 18Ladlangtadmaidung siniu haichiu dinjiu bamdi, paliutu charathiu khaira kambambo gasu nta-ngam lakjiu bamme. 19Siga Pisidia ga bambo Antioch nai Iconium lamsu wangbo Jehudi maidung siniu maidung situ hiamlujiu, Paul tu tatu rotjiu, shaimi bamne chiubo maningjiu kareng hanglam jutaliang khai mide. 20Chiudi malum maidung siniu pamungga wang maduiboga, paniu buangsu lujiu namdi lamse ngutlan mide. Sichiujiu pasaibo nai Barnabas panai khangniase Derbe lam tadmide.
Syria Gu Antioch Lam Malan Wangbo
21Paul nai Barnabas niu Kawicham dinronjiu khommai wajiukha khom lude. Sigasu panainiu Lystra lam, Iconium lam khatdi Pisidia gu Antioch lam tadde. 22Panainiu malum maidungtu pitan khaide khatdi malumbo gase matipjiu bamra lungtu cham dinkhaide. Panainiu haichiu katikhai-e, “Aliuniu Tingwang gu chawangdihga ngutlu raleng chariu magenthiubo wajiukha khengrabo-e.” 23Phumling hinaga panainiu katingmaileng kadakhai-e, khatdi kakheng thiubo nai kalumribo jaojiu malumbo gase bamlura panainiu Rapiu khuga paliutu pipad khaide.
24Pisidia ramluong pakhiangna tadron lubo sai paliuniu Pamphylia ga wangde. 25Siga panainiu Perga ga tachamse dinron lujiu Attalia lam tadlan mide. 26Sigasu panainiu Antioch lam Tingwang lungsiat tienkam pikhaibose kamloi mibo jengniu aliamse tuanglujiu wanglan mide.
27Panainiu Antioch ga wangtangboga, phumling maidungtu pui aruang lujiu Tingwang niu dechiujiu panaitu maluang tatien thiukhai bilo, khatdi Nkeng maidung leng dechiu malumbo npui lepad khai bilo chiubo paliu khuga dinkhaide. 28Sichiujiu siga panainiu malum maidungtu maluang lujiu pating kathengkha bamkhaide.
Currently Selected:
TIENKAM 14: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
