TIENKAM 15
15
Jerusalem Ga Maduibo
1 #
Lev 12.3. Judaea lamsu Antioch ga maidung khangsia wanglujiu malum maidungtu haichiujiu katikhai sude, “Mose gu Tacheng-tajai saisuijiu naliu hai chagirom maksai ranlubose daolakge.” 2Haibo lamga Paul nai Barnabas niu paliutu tanchang tanjiu ari sude, sichiujiu Antioch gasu Paul nai Barnabas; khatdi maidung khangsiara Jerusalem lam tadjiu haibo lamga pakhommaidungtu adao rabo-e chiujiu chapkhaide.
3Paliutu phumlingniu langkhaide; sichiujiu paliuniu Phoenicia khatdi Samaria ga tadkhaiboga, dechiujiu Nkeng maidung siniu Tingwang khulam mariwang lulo chiubo paliuniu paokhaide; haibo cham hainiu malum maidung hina khuga chunwibo dijiu phungwangde. 4Paliuniu Jerusalem ga mengtangboga, paliutu phumlingniu, pakhommaidungniu khatdi kating maidungniu lukhaide, siga Tingwang niu paliu khugasu tatien thiukhai bibose paliu khuga paokhaide. 5Chiudi malum maidung ruang gasu Pharisee maidung khangsia siniu chapkhang lujiu dinsude, “Nkeng maidungdi Mose gu Tacheng-tajaitu majaira dinkhai rabo-e.”
6Khommaidung nai kating maidungse haibo lamga makhiam thiura maduide. 7#Tk 10.1-43.Makhiamthiu mawilubo sai Peter niu chapkhang lujiu din-e, “Asingna maidung yo, Nkeng maidung khuga Kawicham dinronra, sichiujiu paliuniu sise chiulujiu malum lura, Tingwang niu nda naliu ruanggasu, atu kada khaibo naliuniu sijiu bambo-e. 8#Tk 10.44; Tk 2.4.Sichiujiu mathiu lungchun sibo, Tingwang niu Nkeng maidungtu suikhaibo hai, aliutu paniu pikhaibo kumjiu Masanbo Hiupuina paliu khugadi pikhaijiu lenkhai mide. 9Paliu nai aliu kakga paniu wa katambo pithiu khai makge; paliuniu malumbo jengniu paniu paliu nuan kuak khaibo-e. 10Sichiusai, dekamjiu aliu pao-peh mainiu maksai aliuniu phung ngamlakbo, bangrip haise malum maidung riga thonkhai ralo? 11Sichiu makge! Aliu kumjiu, paliudi malumme, sichiujiu Rapiu Jesu lungsiat pen gasu ranlubo ngaode.”
12Tingwang niu Barnabas nai Paul khugasu Nkeng maidung leng maisuang habo khatdi tasibodung kamkhai bibose paliu khuga paokhaibo ga paliu mathiuse maliuna bammide. 13Panai niu dinloi miboga, Jacob niu dinsude: “Asingna maidung yo, alad nking khailo! 14Dechiujiu Tingwang niu raiboga Nkeng maidungtu paliu ruanggasu pamai thiura phuikhai bilo chiubo Simon niu dinmide. 15Haise phaimiukakung maidung lad nai machamme. Palamra Masanbo ariak niu haichiu din-e,
16 #
Tk 10.44; Tk 2.4. ‘Haibo sai, Iniu malan wangne,
siga David wangdih situ kalankhai bine;
chiujiu Rapiu niu din-e.
Samibose Iniu katinlan bine,
khatdi kam matan khailan bine.
17Siga chamai jat hina Iniu aleng kada lubo,
Nkengmai hina akhuga wang rabo-e,
18Rapiu niu haise nda pisikhai mibo-e.’
19Jacob niu dinlan-e, “Haise amaning-e, chiubora Tingwang khuga mariwangbo Nkeng maidungtu aliuniu kam chariu makrabo-e. 20#Tad 34.15-17;Lev 18.6-23;Lev 17.10-16.Sibosung, tachengniu suimakbo charamengga kad khaibo tiutek tiumakra; npui-npiu lungmao makra; khatdi chakhao paronna nkhek shaibo jan tiumakra, maksai tazaise tiumakra, aliuniu paliu khuga chamlen khat raokhai rabo-e. 21Palamra Mose gu Tacheng-tajai hai nda gasu Tabamnai machang maduikyga kenjiu bambo-e, khatdi palad hai namdi machang dinronjiu bambo-e.”
Malumbo Nkeng maidung Khuga Chamlen Pikhaibo
22Sigasu pakhommaidung nai kating maidungniu phumlingmai hinatu puimadui lujiu Paul nai Barnabas saisui lujiu Antioch lam langkhaira chamaitu kada sude. Paliuniu malummai ruang gasu chakhuangthiu buimai khangsia, Barsabbas kubo Juda nai Silas tu kadalujiu, 23paliuniu pahangga raokhaibo chamlense paliu khuga langkhaide:
“Naliu singna, pakhommaidung, khatdi kating maidung, aliu mathiuniu Nkengmai thiujiu manabo Antioch ga, Syria ga khatdi Cilicia ga lungbambo aliu singnadung khuga kahum khai-e. 24Maidung khangsianiu aliu phom gasu tadpad lujiu, paliuniu aliu khugasu katikhaibo wadi daomak tadi aliuniu dinbo-e chiujiu naliutu kampad kamngutjiu kam chariu bamme chiubo aliu chiu-e. 25Sijengniu aliu mathiu aruang lujiu maidung khangsiatu kadalujiu naliu khuga langkhaira suikhaide. Paliu sira aliu ka kakung, Barnabas nai Paul saisui tadjiu, 26paliu ringting hai aliu Rapiu Jesu Khrista tienkamga khengkhaira mide. 27Sijengniu aliuniu, Juda nai Silas tu naliu khuga langkhaijiu aliuniu raokhaibose panai pumsiakniu naliu khuga dinkhai sune. 28Masanbo Hiupuina siniu khatdi aliuniu naliu riga ka-nkiubo wadi khaisanni makge: 29Sijengniu, charamengga kadkhaibo tatek tiumakra, tazaise tiumakra, charum shaibo wakhao jan tiumakra, khatdi npui-npiu lungmao makra naliuniu mari sirabo-e. Naliuniu haidungse kammakjiu bamsai naliu hai maji bambo-e. Wijiu bamra kanui khai-e.”
30Champao phungmaidung situ Antioch lam langkhaide, siga paliuniu malum maidung situ ku maduilujiu chamlense pikhaide. 31Haise maidung siniu kenluboga, lungtu cham pikhai bibo jengniu, paliu chun kawibo siniu phuimide. 32Sichiujiu Juda nai Silas se panai pumsiakniu phaimiukakung thiubo donniu lungtu cham khatdi matipkhaibo chamse thengjiu paliu khuga dinkhai bide. 33Siga pakak khat bamlubo sai, malum maidung siniu panaitu wijiu, khatdi agi-manaijiu langkhai mai khulam piwanglan mide. 34(Chiudi Silas ra siga bamra palung chapkhai mide).
35Paul nai Barnabas sira Antioch ga, maidung kakeng khatu maluang bamjiu Rapiu chamse katikhaide khatdi dinron khaide.
Paul Nai Barnabas Ramnabo
36Siga pakak khat bamkhai lubo sai Paul niu Barnabas khuga din-e, “Aliuniu Rapiu lad dinron tadkhai mibo bam hina malan wangjiu aliu singnadung ndechiu bamlo chiubo phuikhai mataikhe.” 37Siga Barnabas niu John Mark tu puitadra masenbo-e, 38#Tk 13.13.chiudi Paul niura patu puitadbo maji makge chiujiu maning-e, palamra pahai paliu ngamkam kaloibo tangna paliutu majangbam makjiu, Pamphylia gasu malanwang mibo-e. 39Sichiu chalad ari matan khangjiu panai ramna mide: Barnabas niu Mark tu maluang lujiu Cyprus lam aliam tuanglujiu tadmide, 40Paul niu Silas tu kadalujiu, malum maidungniu Rapiu khuga kakheng thiukhai lujiu tadmide. 41Sichiujiu paniu Syria nai Cilicia tadronjiu Phumlingdungtu kam matip khaide.
Currently Selected:
TIENKAM 15: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
