TIENKAM 17
17
Thessaloni Ga
1Paul nai Silas niu Amphipolis khatdi Apollonia lam tadron lujiu maduiky khat bambo Thessaloni ga wangde. 2Palun-jai kumjiu Paul niu maduikygase tadde. Siga paniu Tabamnai kak sum lunggase maidungtu chalad apai-e, 3siga Masanbo ariak gasu khoipad lujiu katikhaijiu khatdi Messiah hai dechiu chariu khengralo khatdi kashaibo gasu dechiu ringsulan ralo chiubo dinlen khaide. Paul niu haichiujiu din-e, “Iniu naliu khuga dinbambo Jesu hai Messiah situ-e.” 4Paliu khangsiara paliu lung kimjiu Paul nai Silas saisui mide, sichiujiu wasibo maipuidung kakengkha nai Tingwang tu kahumbo Greek mai kakengdi jaomide.
5Chiudi Jehudi maidungse manma sujiu npui-nchengga tadmariu kinmaitu khom madui sude. Paliuniu namdi pakhiangna kam kabuak khai lujiu Paul nai Silas tu maidung ruangga juwangra Jason ky se kom sude. 6Chiudi paliuniu panaitu phiudao lulakboga Jason nai malum maidung khangsiatu paliuniu pumtan thinpaodung suangga jupad lujiu sensude, “Haibo maidung siniu pabam hina kam kabuak bambo-e! Tuhoira paliu hai aliugu namdiga wangbamde, 7khatdi Jason niu pakyga paliutu khai nbambo-e. Paliuniu Wangdipiu gu tacheng-tajai hina kampang lujiu katambo chawang, pazanniu Jesu kubo bamme chiujiu dinkin-e.” 8Haibo cham hainiu paliuniu maidung situ khatdi namdigu pumtan thinpaodungtu pijiu lungthiu khaide. 9Pumtan thinpaodung siniu Jason khatdi khangsiamai situ rangkang pijiu majonkhai lujiu phut mide.
Berea Ga
10Nchun kiugapboga, malum maidung siniu Paul nai Silas tu Berea lam langkhai mide. Panainiu siga wangtangboga, maduiky lamse tadde. 11Siga bammaidungse Thessaloni maidung suang paliu lung di-e. Paliuniu tachengse paliu chun ngutjiu nking-e khatdi Paul niu dinbambose pachang palingma chiubo phuijiu paliuniu Masanbo ariakse naimachangna kenjiu bamme. 12Maidung kakengkha malum mide, khatdi wasibo Greek maipuidungdi maipiudungdi malum mide. 13Chiudi Thessaloni ga bambo Jehudi maidung siniu Paul niu Berea gadi Tingwang chamse dinron bamme chiubo chiuluboga, siga menglujiu maidung situ kam karung khaijiu kam kabuaklan sude. 14Siga malum maidung siniu Paul situ duipui hugenlam langkhai mide, chiudi Silas nai Timothy sira Berea ga bammide. 15Paul tu maluang tadmai siniu Athen tangbo tadkhaide. Sichiujiu Berea ga malanwang Silas nai Timothy tu daodiu then kalangjiu pakhuga wangra Paul niu dinkhai bide.
Athen Ga
16Paul niu Silas nai Timothy tu khuanjiu Athen ga bamboga, namdi gase charamengniu phuibambose ngaolujiu pachun samide. 17Sijengniu paniu maduikyga Jehudi maidung nai Tingwang tu kahumbo Nkeng maidung situ khatdi senkiga tadmariu kinmaitu naimachangna puilujiu makhiam thiu aruangde. 18Siga Epicurean maidung khangsia nai Stoic gu katipaodung sidi wangjiu patu makhiam machamde. Paliu khangsianiu haichiu din-e, “Wadi simakbo piu, hainiu degu dinkin jiulo?”
Chiudi paliu khangsianiu paokakge, “Pahai sangdiumai ratu dinkin kumme.” Paliuniu haichiu dinbo rambara, Paul niu Jesu ringsulan mibo lamga dinron kinbo jengniu-e. 19Sijengniu paliuniu Paul tu Areopagus gu Apaikyga maluang wangjiu maniu-e, “Nangniu katikhai kinbo lamga aliu sikhaini-e. 20Palamra nangniu dinkinbo kasiara tamsin-e, sise aliuniu paramba sini-e.” 21(Palamra Athen ga lungbam maidungse wa kasanbo cham dinra, maksai nkingra masen kamme).
22Siga Paul niu namdigu Apaiky masuang gase chapsu lujiu dinsude, “Naliu Athen maidung hai wahinaga tacheng matip-e chiubo Iniu ngao-e. 23Palamra naliu namdiga Iniu haichiu tadron wangboga, khatdi naliugu kahumbo bam hinaga haichiu naliuniu raokhai bambo Iniu ngao-e, ‘Simakbo Rawang.’ Naliuniu kahum bambo chiudi naliuniu simakbo lamga tuhoi Iniu naliu khuga dinbo-e. 24#1 Chaw 8.27; Isa 42.5; Tk 7.48.Kadihpiritu khatdi sibo lungga bambo mania hinatu damkhaibo Tingwang se tinggen khatdi kadih Rapiu-e, khatdi para chamainiu thiubo rakyga lungmakge. 25Paleng machang kamakbo wakhatdi aliuniu pikhai silakge, palamra paniu mai hinagu ringting khatdi mai hina siu thira pikhaijiu bambo-e. 26Paniu chamai khang khattu damkhai lujiu sigasu kadihpiri pakhiangnaga lungra jat hina pikhaibo-e. Pa paronna wahinagu pawan khatdi pamalan hina raijiu pikhai lujiu, paliuniu lungrabo bamdung kadenkhai mibo-e. 27Paniu haichiu kamkhaibo sira, paliuniu patu phiura, khatdi paliuniu patu daolura leng-e. Chiudi Tingwang sira aliu mai khat khuga niudi diumi makge; 28haise mai khatniu dinmibo kumbo-e,
‘Pakhuga aliu ringjiu, malaijiu khatdi lungjiu bambo-e.’
Haise naliugu chalui karaomainiu dinmibo kumbo-e;
‘Aliudi panahmaidung-e.’
29Sichiujiu aliu hai Tingwang nahdung thiubo saisuijiu Tingwang hai chamaina bensiamniu kamlubo kachia, rangkang, maksai tatu kumbo-e chiujiu maningbo suimakge. 30Maidungniu simakbo wan haitu Tingwang niu phuitom khai lujiu, tuhoira mai hinatu paliugu kasabo npui gasu lunglira paniu chamtan pikhai mibo-e. 31Palamra kadihpiri pakhiangnatu majibo siniu ladjan thiura paniu tingmik khat riatkhai lujiu paniu mai khattu kadakhai mibo-e. Sichiujiu paniu mai hina khuga sibo piu situ kashaibo gasu pi ringsu khai lanjiu lenkhai mibo-e!”
32Kashaibo gasu ringsulanbo lamga Paul niu dinbo paliuniu chiuboga, khangsianiu patu nuimen-e, chiudi khangsianiu din-e, “Haibo lamga dinlanra aliuniu masenne.” 33Sichiujiu Paul niu madui gasu tadpad mide. 34Khangsianiu malumjiu paruangga jaomide, simai ruang gasu khang khatra apaimai Dionysius hai-e, siga maipui khat pazanniu Damaris sidi jao-e, khatdi maidung khangsia maidi bamme.
Currently Selected:
TIENKAM 17: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
