TIENKAM 18
18
Corinth Ga
1Haibo sai, Paul niu Athen tu phutlujiu Corinth lam tadmide. 2Siga paniu Jehudi maipiu khat Pontus gasu manabo pazanniu Aquila kubo panao Priscilla tu maluang lujiu Italy gasu wangbotu adao-e, palamra wangdi Claudius niu Jehudi mai hina Rome tu phutmi rabo-e chiubo chamtan padle. Paul niu panaitu adaora tadle, 3sichiujiu panaitu maluang lungjiu tatien thiu aruang khaide, palamra panainiu kamkinbo kumjiu padi chafai lenbo ky thiujiu lungkinbo-e. 4Paniu Tabamnai machang maduiky gase menglu chalad apaijiu Jehudi maidung tudi Greek maidung tudi pikim khaira kamme.
5Silas nai Timothy niu Mecedonia gasu wangtangboga, Paul niu pagu pawan hina tacham hai dinronboga pikhaijiu Jehudi mai khuga, Jesu hai Messiah si-e chiubo masanjiu katikhaide. 6Paliuniu patu suini makjiu kasabo madam khaiboga, paniu pafaise kasungjiu paliu khuga din-e, “Naliu hai hamidi, naliu khenrang thiurabo-e! Ira wa kasa phungra ha-e. Tuhoi gasu Ira Nkengmai khulam tadmine.” 7Sichiujiu paniu paliutu phudlujiu Tingwang tu kahumbo Nkengmai piu pazanniu Titus Justus kubo kyga bamkhaira tadmide; sibo piu kyse maduiky mungnaga bambo-e. 8Maduiky gu jupao Crispus khatdi pakikhunmai mai mathiuse Rapiu tu malumde; khatdi Corinth ga bammai kakengkha tachamse chiulujiu malumde, khatdi tadui nphum karende.
9Nchun khat Paul niu madungao khat ngaojiu siga Rapiu niu pakhuga din-e, “Ping mane, manang makjiu phutmi makjiu dinjiu bamlo, 10palamra Iniu natu maluang khaine, sichiujiu mai khatniudi natu kam masa lakge, palamra haibo namdiga amaidung kengjiu bamme.” 11Sijengniu Paul niu siga takum khat paphan, maidungtu Tingwang cham katikhaijiu bam khaide.
12Gallio tu Achaia ga Rome gu dihthinpao pithiu khaiboga, Jehudi maidungse aruang lujiu Paul tu ladjankyga minwangde. 13Paliuniu din-e, “Haibo piu hainiu tacheng-tajainiu suimakbo npui gasu Tingwang tu kahumra hiampon kinbo-e!”
14Paul niu chalad dinra kamsu gapboga Gallio niu Jehudi maidung khuga din-e, “Haina siniu pagu nkhai-aliga kamaobo bamsai, naliu Jehudi maitu Iniu makhiamthiu machambo sui-e. 15Chiudi haise ladkeng nai tazan lamga-e sai khatdi naliugu tacheng-tajai lamga-e sai, naliu ronna kamlulo. Iniu haikumbo lamga ladjan thiusi lakge!” 16Sichiujiu paniu paliutu ladjanky gasu hathon mide. 17Paliuniu maduiky gu jupao Sosthenes tu minlujiu ladjanky kajeng gasu dapsude. Chiudi sisetu Gallio niu walengdi sikhai makge.
Antioch Ga Malanwangbo
18 #
Par 6.18. Paul niu Corinth gase malum maidung khuga pakak khat bamkhai lujiu Priscilla nai Aquila tu maluang aliam tuanglujiu Syria lam tadpad makhaga Cenchrea ga pagu ladriat thiukhaibo jengniu papee got mide. 19Paliuniu Ephesus ga wangtangboga, Paul niu Priscilla nai Aquila tu phutkhai mide. Paniu maduikyga tadlujiu Jehudi maidungtu chalad apaijiu katikhaide. 20Maidung siniu patu manai matheng khaira kheng-e chiudi paniu suikhai makge. 21Chiudi paniu paliutu ramnaboga paliu khuga haichiu din-e, “Tingwang chunsai, naliu khuga I wanglanne.” Sichiujiu paniu Ephesus gasu aliam tuanglujiu tadmide.
22Paniu Caesarea ga wangtangboga, Jerusalem ga tadlujiu phumling tu kanuikhai-e, sigasu Antioch lam tadmide. 23Siga pakak khat bamkhai lubo sai, paniu Galatia nai Phrygia luongriang tadronjiu malum maidung situ kam matip khaide.
Apollo Niu Ephesus Nai Corinth Ga
24Sibo wan gase Jehudi mai khangkhat Alexandria gasu manabo pazanniu Apollo kubo Ephesus ga wangde. Pahai chalad din kasibo khatdi Masanbo ariak simawibo piu-e. 25Patu hai Rapiu Npuiga katikhaijiu, pahai Jesu lamga pachun ngutjiu kati majikhaijiu bambo piu-e. Chiudi para John gu tadui nphumbo lamga ronna sibo-e. 26Paniu maduikygase hujiu dinsude. Paniu dinbo hai Priscilla nai Aquila niu chiuluboga, patu chaky lam maluangwang Tingwang Npui gase kati mawisan khai bide. 27Siga Apollo niu Achaia lam tadra chap mide, sijengniu Ephesus ga malum maidungniu Achaia ga bambo malum maidung khuga chamlen raokhaijiu patu lukhaira din khaide. Paniu siga mengtangboga Tingwang lungsiat penniu malum maileng pahai gengchang gengde. 28Palamra paniu mathiu aruangbo gasu Jehudi maidungtu chalad apaijiu katikhaibo khatdi Masanbo ariak gasu Jesu hai Messiah si-e, chiubo dinlen khaide.
Currently Selected:
TIENKAM 18: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
