TIENKAM 7
7
Stephen Niu Tacham Dinbo
1Dibo Singku siniu Stephen khuga maniu-e, “Haise kachangbo ma?”
2 #
Chab 12.1. Stephen niu paokakge, “Singnamai khatdi apiumai yo, alad nking khailo! Aliu pao Abraham niu Haran lam lungra tadmakbo suangga, paken dibo Tingwang niu patu Mesopotamia gasu ngaolen khaijiu pakhuga din-e, 3‘Nakikhun khatdi nagu kadihtu phutlujiu Iniu natu lenkhai rabo kadih lamse tadlulo.’ 4#Chab 11.31;Chab 12.4.Sijengniu paniu pagu kadihtu phutlujiu Haran lam lungra tadde. Abraham piu shaimibo saiga, Tingwang niu patu tuhoi naliuniu lungbambo kadih haiga piwang lung khaibi-e. 5#Chab 12.7; 13.15; 15.18; 17.8.Tingwang niu Abraham leng chiujiu kadih poi chakhet phandi pikhai makge, chiudi Tingwang niu sise paleng pikhai bine khatdi pagu hinase pakai-kik leng pikhai bine chiu ladriat thiukhai bide. Tingwang niu ladriat thiukhaibo wan gase Abraham panah hakha-e. 6#Chab 15.13,14.Tingwang niu haichiujiu pakhuga dinkhai-e: ‘Nakai-kikdung siniu maidihlam lungtadjiu kavang thiune, siga paliutu takum kai madai kamre khaine. 7#Tad 3.12.Chiudi Iniu paliutu kavang pithiu khai mai riga ladjan thiu khaine, sichiujiu paliuniu sibo dih gasu padlubo sai haibo bamga paliuniu atu kahum rabo-e.’ 8#Chab 17.10-14;Chab 21.2-4;Chab 25.26;Chab 29.31; 35.18.Sigasu ladriatgu madan thiujiu Tingwang niu Abraham tu chagi rombo hai tenkhai bide. Sijengniu Abraham niu Isaac tu lunglubo sai jeng tachadbo naise pagi romme, Isaac niu panah Jacob tu pagi romme; khatdi Jacob niu panah khang kariu-je-niakiu aliu jatgu kadibo paodungtu paliu gi romme.
9 #
Chab 37.11;
Chab 37.28;
Chab 39.2,21. “Jacob nahdungse paliu singna Joseph tu manmabo jengniu patuse Egypt dihga kavangleng jonkhai mide. Chiudi Tingwang niu patu majang khaibijiu pagu chariubo hina gasu juken khai bide. 10#Chab 41.39-41.Joseph niu Egypt gu chawang suangga wangboga, Tingwang niu patu lungsabo lunlung nai ningting pikhai bide, sijengniu chawangniu Joseph tu chawang kilungga khatdi Egypt pakhiangnagu dihthinpao pithiu khaibide. 11#Chab 42.1,2.Sigasu Egypt khatdi Canaan dih pakhiangna charakhum kadibo wangjiu pi chariukhai bide. Siga aliu pao-peh maidung katiu wakhatdi daota mide, 12sichiujiu Egypt dihga miusy kengbamme chiubo Jacob niu chiuboga paniu panahdung, aliu pao-peh maidung situ siga langkhai-e, haise paliu phiken karaibo si-e. 13#Chab 45.1;Chab 45.16.Niabo phiken gase Joseph niu pasingnamaidung khuga patu pisilen khai bide, khatdi Egypt maigu chawangniu Joseph kykhun maitu silude. 14#Chab 45.9,10,17,18;Chab 46.27.Sichiujiu Joseph niu papiu Jacob khatdi pakikhunmai mathiu, pakhiangna khang riakchinnia-je-mangiukiu haitu Egypt dihga wangra tacham pikhaide. 15#Chab 46.1-7;Chab 49.33.Sigasu Jacob niu Egypt dihga tadde, siga pah khatdi panahmaidung shaikhai mide. 16#Chab 23.3-16; 33.19; 50.7-13; Jos 24.32.Paliu phawdungse Shechem ga, nda Abraham niu Hamor mai khugasu liukhai bambo raw gase phungmeng nphum khaide.
17 #
Tad 1.7,8. “Tingwang niu Abraham khuga ladriat thiukhaibose pating nawang suboga aliu Hebrew maidungse Egypt ga pariak kengkhang mide. 18Kanamboga Joseph tu simakbo chawang khatniu Egypt dihga mawangde. 19#Tad 1.10,11;Tad 1.22.Paniu aliu pao-peh maidung situ tasiam kamjiu, paliu nah npamnadungtu lenlam thon khaijiu pishai mira kam sude. 20#Tad 2.2.Haibo tinggase palun kawibo ngena Mose tu manade. 21#Tad 2.3-10.Patuse chaky gasu thonpadbo gasu chawang nahpui siniu panah kumjiu makuat khangsude. 22Patuse Egypt maigu tasi-ningting hina katikhai bijiu pase pagu lad-liuga khatdi pagu tienkamga kendibo mai thiukhangde.
23 #
Tad 2.11-15. “Mose niu takum atai khangmiboga, pamai Israel maidungtu dechiubo thak thiubamlo chiubo phuini mide. 24Egypt mai khangkhatniu paliu mai khangkhattu kam masa bamniubo paniu ngaolujiu sibo khum ruijiu Egypt maipiu situ kamshat mide. 25(Sichiujiu patu hai Tingwang niu thinlujiu paliutu khenrang thiujiu phutkhai raleng kambo-e, chiudi sise paliura sitanglu makge). 26Pasaibo naise Israel mai khangnia n-gi bamniubo paniu ngaolujiu mata khaide. Paniu din-e, ‘Phuilo nanai haira Israel mai kamna-e; dekamjiu nanai haichiu n-gi bamjiulo?’ 27Chiudi kam masa bambopiu siniu Mose tu tunthon mide khatdi paniu din-e, “Saoniu natu aliu riga mawangra khatdi ladjan thiura pikhai jiulo? 28Danai nangniu Egypt maipiu khattu kamshat mibo kumjiu atudi kamshat mine chiujiu ma?’ 29#Tad 18.3,4.Haise Mose niu chiuboga, Egypt dih gasu paktad mide khatdi Midian kadih lam lungmide. Siga panah piumai khangnia lungde.
30 #
Tad 3.1-10. “Sichiujiu takum atai saiga maza khatniu Sinai Luong mungga chaphejiuga chamipuang khat gasu Mose khuga madulen khaide. 31Sise Mose niu ngaoboga pasuang hamide, khatdi sise degulo chiubo phui mawira paniu chaphejiu mung gase tadwang manade. Siga paniu Rapiu khuanse chiude: 32‘I hai napao-napehmai Rawang-e; Abraham, Isaac khatdi Jacob paliu Rawang-e.’ Siga Mose pingboniu masandi-di mide khatdi degulo chiubo phuihu tamide. 33Rapiu niu pakhuga din-e, ‘Naphitopse lupad milo, palamra nangniu chapbambo hai masanbo bamsi-e. 34Amaidungniu Egypt dihga chariu magenthiu bambose Iniu ngaode. Paliuniu kap-kiamjiu bambose Iniu chiulujiu paliutu khenrang pithiu khaira wangbo-e. Wanglo, tuhoi natu Iniu Egypt dihga langkhai rabo-e.’
35 #
Tad 2.14. “Mose haise Israel maidungniu suikhai makbo khatle. Paliuniu din-e, ‘Saoniu natu mawangra khatdi aliu riga ladjan thiura pikhai jiulo?’ Pahai Tingwang maidung riga mawangra khatdi patu chaphe taobambo ganiu ngaolen khaibo mazagu nkha siniu paliutu khenrang pithiu khairabo si-e. 36#Tad 7.3;Tad 14.21;Par 14.33.Paniu maidungtu Egypt dih gasu maluang padjiu tasibo khatdi maisuang habo hai Egypt dihga khatdi Hengbo Duipui ga khatdi ramjingga takum atai kamkhai mibo-e. 37#Taj 18.15,18.Israel mai khuga dinbose Mose niu-e, ‘Atu langkhaibo kumjiu, Tingwang niu phaimiukakung khat langwangne, khatdi pase naliu ruang gasu rabo-e.’ 38#Tad 19.1—20.17; Taj 5.1-33.Pahai ramjingga aliu pao-pehmai dungtu majang lujiu, Sinai Luongga mazaniu patu npaokhai mibo si-e, sichiujiu Tingwang gu karingbo chamse aliuleng dinkhai bibo-e.
39“Chiudi paniu dinbose aliu paopehmai siniu piuni makge; paliuniu patu tunpad lujiu, Egypt dihlam paliu malan mira maning-e. 40#Tad 32.1.Sijengniu Aaron khuga paliuniu din-e, ‘Aliutu majang khaira chara khat damkhailo. Egypt dih gasu aliutu majang padbo piu Mose khuga degu padmilo chiubo sita mide.’ 41#Tad 32.2-6.Sichiujiu paliuniu matomchi meng khat kamlujiu, siga charathiu sude, khatdi paliuniu kamlubo gase chakhuang thiubo thiujiu changi sude. 42#Amo 5.25-27.Sijengniu paliu khugasu Tingwang niu mari mide khatdi tinggen gu chagandungtu kahumra pikhaide, haise phaimiukakung ariakkhuangga raokhai mibo kumbo-e:
‘Israel mai yo! Naliuniu ramjingga,
khaoring gikhaijiiu charathiu khai mibo takum ataise akhuga makge.’
43Naliuniu ponkhai mibo mathenky se Molech gu-e,
khatdi Rephan se naliugu chagan rameng-e;
sise naliuniu kahumra damlubo rameng-e.
Sijengniu Iniu naliutu Babylon hugenlam kavang thiura langkhai mine.’
44 #
Tad 25.9,40. “Aliu pao-pehmai khuga Tingwang nai bam chambo Tingwang gu Mathenky se ramjingga bamniu-e. Haise Tingwang niu Mose khuga lenkhaibo lun kumgapjiu kamra Mose tu dinkhaibo-e. 45#Jos 3.14-17.Pasai kanalam aliu paopehmai siniu paliu piudung khugasu daobo kumjiu sibo mathenkyse paliuniu Joshua saisui tadboga pontadle khatdi paliu masuangga Tingwang niu hathon khaibo kadih lamse pontadle. Sise David ken katangbo bamniu-e. 46#2 Sa 7.1-16; 1 Char 17.1-14.Paniu Tingwang masuangga lungsabo daolujiu Jacob Rawang tu pibam khairabo bam khengjiu daolude. 47#1 Chaw 6.1-38; 2 Char 3.1-17.Chiudi paleng chaky thiukhaibo sira Solomon niu-e.
48“Chiudi Kukachangbo Rawang sira chamainiu thiubo kyga lungmakge; haise phaimiukakungniu dinmibo kumbo-e,
49 #
Isa 66.1,2. ‘Tinggense awangbamme,
khatdi kadih haise aphipan-e, chiujiu Rapiu niu din-e.
Dekumbo ky naliuniu aleng thiuralo?
Dekumbo bamga I lungralo?
50Pakhiangna haise Iniu dambo makma?’
51 #
Isa 63.10. Stephen niu haichiu dinkiu-e, “Dejiukha naliu hai chaqon tan mailo! Dejiukha naliu lung hai tanlo! Tingwang chamga kuontidjiu bamra ma! Naliudi naliu pao-pehmai kumgap-e. Naliudi Masanbo Hiupuina situ khamjiu bamme! 52Naliu pao-peh mainiu kam mathad khaimakbo phaimiukakung bamma? Pagu tacheng matipbo Vangpiu wangrabo lamga dinkhaibo Tingwang gu ladlangtadmaidung situ paliuniu kamshat mibo-e. Sichiujiu tuhoi naliuniu sibo Vangpiu situ jonkhai lubo saiga kamshat mibo-e. 53Naliuniu Tingwang gu tacheng-tajai haise maza khugasu daolubo-e chiudi naliuniu sise majai makge!”
Stephen Tu Tatu Rotbo
54Apaimaidung siniu Stephen ladse chiuluboga paliu lung pom matan sude sichiujiu paliu hiu chagi karen sude. 55Chiudi Stephen se Masanbo Hiupuina niu phuilujiu tinggen lam ngangphui khangboga Tingwang kendibo nai Jesu se Tingwang ben jatlam chapbambo ngaode. 56Sichiujiu paniu din-e, “Phuilo, Tinggen akhamse lepadbo khatdi Chamai Nahpiuse Tingwang ben jatlam chapbambo Iniu ngao-e.” 57Apaimaidung siniu paliu kuon makad lujiu paliu khuan tanjiu sensude. Siga maidungse paliu khuga pakwang karen sude. 58Sichiujiu paliuniu patu namdi lenlam jupad lujiu tatuniu rotsude. Siga jengdin maidung siniu paliu fai-nise akhangmai pazan Saul kubo khuga thonkhai diakge. 59Paliuniu Stephen tu tatu rotjiu bamme siga paniu Rapiu tu ku-e, “Rapiu Jesu yo, ahiupuinatu lukhailo!” 60Paniu khudungkiu lujiu pakhuan tanjiu din-e, “Rapiu yo, paliu nuan hai paliu riga pikhai tulo!” Haichiu dinkhai lujiu pah shaimide.
Currently Selected:
TIENKAM 7: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
