TIENKAM 8
8
1Sichiujiu Saul niu patu kamshatbo suikhai-e
Saul Niu Phumlingtu Kam Mathadbo
Sibonai gasu Jerusalem ga bambo phumling situ kengchangkha kam mathad sude. Khommaidung makjiu malum maidung hinase Judaea nai Samaria ramlung pabam hinaga maratad mide. 2Malum maidung khangsianiu Stephen situ baikhaide khatdi kengchangkha chunsa-jengsajiu kap khaide.
3 #
Tk 22.4,5; 26.9-11. Chiudi Saul siniu phumlingtu kam mahara matanjiu chaky hang machang ngutjiu, paniu malum maidung maipui tudi maipiu tudi jupad lujiu kavangkyga bangkhai sude.
Kawichamse Samaria Ga Dinronbo
4Malum maidung pak mara mibo maidung siniu pabam machangna tadlujiu tachamse dinron sude. 5Philip niu Samaria ga para kathiubo namdi khatga tadlujiu maidung khuga Messiah lamga dinron khaide. 6Philip niu kadinbose maidungniu paliu chun ngutjiu nking khai-e, khatdi paniu tasibo ngam kamkhaibose paliuniu ngaode. 7Maidung kakeng khugasu kasabo hiunadung marajiu npad mide, khatdi paphi paben kashaimai khatdi katangmai kakeng khatu piwi khaide. 8Sijengniu sibo namdi gase chunwi ringajiu bamme.
9Siga Simon kubo piuniu Samaria maitu pagu chamik thao kadadbo tienkam siniu kam kadak khaijiu bamme. Pase paronna patu maning madijiu bambo-e, 10sichiujiu namdiga bammai hinaniu paliu chun ngutjiu bamme. Paliuniu din-e, “Pahai Tingwang gu pumtan maksai, kadibo pumtan si-e.” 11Paniu pating kathengkha pagu chamik thao kadadbo tienkam siniu paliu suang kam maha khaijiu bambo jengniu, paliuniu patu malumjiu bambo-e. 12Chiudi Philip niu Tingwang gu chawangdih lamga dinbo khatdi Jesu Khrista lamga dinbo kawibo champao situ malum lujiu maipui maipiu pakhiangna tadui nphum sude. 13Simon papumsiakdi malum mide, sichiujiu tadui nphum lubo saiga Philip khuga manajiu bamme khatdi tasibo nai maisuang habo kamkhaibo gase pasuang hajiu bamme.
14Jerusalem ga bambo pakhommaidung siniu Samaria maidungse Tingwang chamkeng lutao lude chiubo chiulujiu, paliuniu Peter nai John tu paliu khulam langkhaide. 15Sichiujiu panainiu mengtangboga, malum maidung siniu Masanbo Hiupuina daolura kakheng thiukhaide. 16Palamra paliu mai khat nakha rigadi Masanbo Hiupuina se kiukhai makha-e; paliura Rapiu Jesu zan gasu tadui nphumbo ronna-e. 17Sichiujiu Peter nai John niu paliu riga chaben kabakhaiboga, paliuniu Masanbo Hiupuina daolude.
18Khommaidung siniu paliu riga kabakhaiboga malum maidung khuga Hiupuina pikiu khaibose Simon niu ngaode. Sijengniu paniu Peter nai John khuga rangkang kadkhaijiu din-e, 19“Sichiujiu Iniudi mai khat riga aben kabakhai dasai Masanbo Hiupuinase daolura atudi haibo pumtan pikhailo!”
20Chiudi Peter niu patu paokakge, “Nagu tasen-chalan nai nang hai charuidihlam tadmi sulo, palamra Tingwang gu kalen haitu nangniu rangkang khoilujiu lungam lune chiubo maning-e! 21Aliugu tienkamga naleng wadi ha-e, palamra nalungchun hai Tingwang masuangga maji makge. 22Sijengniu haikumbo lungchun gasu, lungli lulo, khatdi paniu nagu maning haitu kuak khaibira Rapiu khuga kheng lulo. 23Palamra nakhuga manmabo lungchun siniu phui bamme sichiujiu natu nuan ga bangkhai bamme chiubo Iniu ngao-e.”
24Simon niu Peter nai John khuga din-e, “Chalungsajiu Rapiu khuga aleng kheng khailo, sichiujiu nanainiu dinbo hinase ariga pipadkhai tulo.”
25Paliuniu paliugu jengdin thiukhai lubo saiga khatdi Rapiu chamse dinlubo saiga, Peter nai John se Jerusalem lam malanwang mide. Panai npui tadga Kawibo Champaose Samaria mai kiluong kakengga panainiu dinron khaide.
Philip Nai Ethiopia Mai Chakampao
26Rapiu gu maza khatniu Philip khuga din-e, “Sulo, Jerusalem gasu Gaza lam tadbo npui n-hanglamse tadsulo (Haise thaidaora tadta mide). 27Sijengniu Philip niu sulujiu tad sude. Siga Ethiopia wangpuigu chakampao ruangga parathiubo chakhiu makhuanpao Ethiopiamai papum kamshat mibo piu khatniu pakylam wangra tadwang kinbo-e. Pahai Jerusalem lam Tingwang tu kahumra tadlujiu tuhoi paqon-kari tuanglujiu paky lam malanwang kinbo-e. 28Paniu sichiu tadbambo gase, phaimiukakung Isaiah ariakkhuang kenjiu tadkinbo-e. 29Masanbo Hiupuina siniu Philip khuga din-e, “Paqon-kari gase buangkhang ntao sulo.” 30Philip niu pakwangboga paniu phaimiukakung Isaiah gu ariakkhuang gasu kenkinbo chiude. Paniu pakhuga maniu-e, “Nangniu kenbambose nang sima?”
31Chakampao siniu paokakge. “Mai khatniu atu katikhai maksai dechiujiu Iniu silu ralo?” Siga paniu Philip tu paqon-kariga buangkhang patu maluang ntaora kude. 32#Isa 53.7,8.Masanbo ariakkhuang paniu kenbamniubo bamsira hai-e:
“Milypoitu kamshatra jutadbo kumjiu,
milypoi situ pagiu kakip bamdi wadi dinmakge.
33Patuse kam mangam khaide,
khatdi majibose patu suikhai makge.
Pavang-pavi lamga mai khatniudi din ngam lakge,
palamra kadihpiriga pagu ringtingse hamide.”
34Chakampao siniu Philip khuga maniu-e. “Phaimiukakung siniu haise sao lamga dinjiulo chiubo akhuga dinkhailo? Palam gama maksai maikhat lam galo?” 35Siga Philip niu haibo Masanbo ariakkhuang bam gasu sujiu Jesu gu Kawibo Champaose pakhuga katikhai bide. 36Sichiujiu panainiu tadkiuboga tadui bambo bam khatga wangtangde, siga chakampao siniu din-e, “Haiga tadui tamnakha bamme. Tadui nphum rabo gasu saoniu atu khamralo?”
37Philip niu pakhuga din-e, “Nangniu nalung chun pakhiangnaniu malumsai tadui nphumbo sui-e,”
Paniu paokakge, “Yo, Jesu Khrista hai Tingwang Nahpiu-e chiubo Iniu malumme.”
38Chakampao siniu chaqon-kari situ kham lujiu, panai khangniase tadui bambo lamse tadkiude, sichiujiu Philip niu patu tadui nphum khai bide. 39Panainiu tadui gasu npad gapboga, Rapiu gu Hiupuina siniu Philip tu puitad mide. Chakampao siniu Philip tu ngaolan tamide chiudi chunwiboniu phuijiu pagu npuilam tadmide. 40Philip se Ashdod ga bamniu-e; sichiujiu paniu Caesarea lamse tadjiu Kawibo Champaose nam hinaga dinron khaide.
Currently Selected:
TIENKAM 8: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
