TADPADBO 18
18
Jethro Niu Mose Tu Meng Phuibo
1Mose niu Israel maitu Egypt dih gasu maluang padboga Tingwang niu paliuleng kamkhaibo hina lamga Midian maigu phaimiu, papao Jethro niu chiulude. 2#Tad 2.21,22.Siniu sailam khaidiak mibo, Mose nao Zipporah tu maluang lujiu paniu Mose khuga meng-e, 3#Tk 7.29.khatdi panah kania Gershom nai Eliezer tudi maluang meng-e. (Mose niu dinkhaibo bamme, “Ira sangmai dihga lungbo sangdiumai-e,” sichiujiu paniu panah khangkhatbo zanse Gershom#18.3: Gershom: Hebrew ladga “Sangdiumai chiubo-e.” chiujiu kukhai-e. 4Paniu dinlan-e, “Egypt mai wangniu atu kamshat mirabo gasu, apiu Rawang niu atu nkha khai bi-e,” sichiujiu paniu panah khangkhat zanse Eliezer#18.4: Eliezer: Hebrew ladga “Tingwang niu atu nkha khaibo” chiubo-e. chiujiu kukhai-e). 5Mose niu masanbo luongga riji thiu bambolon, Jethro niu Mose nao nai panah kaniatu maluang lujiu ramjing gase meng-e. 6Paliu mengkinne chiubo paniu Mose khuga champao langmeng-e. 7Siga Mose niu tadpad lujiu, pamasuangga makhumkiu-e khatdi patu biang hiu khai-e. Paliuniu khat-khat khuga dechiu lungkinlo chiubo maniu karen lujiu, Mose niu bambo mathenky lungga ngut mide. 8Israel maitu rankhaira jengniu Rapiu niu Egypt maidung khatdi chawang khuga kamkhaibo hinase Mose niu papao khuga dinkhaide. Rapiu niu paliutu gukhaiboga paliudi dejiukha magenthiubo daolo chiubodi paniu dinkhaide. 9Jethro niu pakhiangna lamga chiuluboga pachunwi mide. 10Sichiujiu paniu din-e, “Egypt maidung khatdi chawang khugasu naliutu gukhai bibo Rapiu tu thuonlo! Kavang thiujiu bambo gasu pamaidungtu gukhaibo Rapiu tu thuonlo! 11Tuhoira Rapiu hai kakibo radung suang tan-e chiubo Iniu silude, palamra Egypt mainiu Israel maitu haijiukha kam chariujiu bambo gasu paniu haichiu kamkhai bibo-e.” 12Sichiujiu maring rukhaira khatdi Tingwang khuga wa kadkhaira katam-tambo rathak maniadi Jethro niu phungwang-e, sichiujiu Aaron nai Israel maigu jupaodungniu patu maluang lujiu masanbo tatek tiura tadle sise kahumbo dam lubo kumbo-e.
Ladjanpaodung Kadabo
(Taj 1.9-18)
13Pasaibo naise paliu ruangga tathu-chara padbose Mose niu nsuan gasu chawan tangbo ladjan thiujiu pujing-e. 14Mose niu kambambo hinase Jethro niu ngaoboga, paniu din-e, “Maidung leng nangniu kambambo hai degulo? Nangniu nsuan gasu chawan tangbo haiga chaplujiu dekamjiu naronna haichiu kambam jiulo?”
15Mose niu paokakge, “Iniu haise kamsiak rabo-e, palamra maidungniu Tingwang maningse katira akhuga wangjiu bambo-e. 16Mai khangnia n-giboga panaise saoniu majilo chiu maniura akhuga wang-e, siga Iniu panai ruangga saose majilo chiubo dinkhai-e, siga Iniu Tingwang gu chamtan nai tacheng-tajaise paliu khuga katikhai-e.”
17Siga Jethro niu din-e, “Nangniu haichiu kambambose maji makge. 18Nang nsang-nrang mine, khatdi maidungdi magenthiujiu chiami rabo-e. Haichiu naronna kambo sira kungju-e. 19Iniu natu ladpi khaine, sichiujiu Tingwang niu natu majang bambo thiulo. Nangniu maidung mathiu sung thiujiu Tingwang suangga paliugu tathu-chara pakhuga phungwangbo hai maji-e. 20Tingwang gu chamtanse nangniu paliutu katikhaijiu paliuniu dechiu lungralo chiubo katikhai rabo-e. 21Chiudi sibo riga kabuibo maidung khangsiatu kadakhai lujiu maidunggu jupao pithiu khailo, khangsianiu sanggu, khangsianiu kaigu, khangsianiu ringiugu, khatdi khangsianiu kariugu jupao pithiu khai rabo-e. Paliu hai Tingwang tu pingbo mai, malum suibo khatdi tanim tiumak mai thiurabo-e. 22Pijiu paliutu tingthengjiu maidunggu ladjanpao pithiu khai rabo-e. Paliuniu kakungbose nakhuga phungwangjiu, kasiam-siambo hina sira paliu ronna ladjan thiu lubui-e. Sichiujiu paliuniu nabangrit kasia phungkhai sai, naleng njiubi rabo-e. 23Nangniu haichiu kamsai, Tingwang niu chamtan pikhaibo kumjiu nangdi chialakge, maidungdi paliugu tathu-charase loilujiu paliu ky lam wanglu bui-e.”
24Mose niu Jethro gu ladpibose lukhaide. 25Sichiujiu Israel mai ruanggasu kabuibo maidungtu kada sude. Paniu paliu khangsiatu sanggu, khangsiatu kaigu, khangsiatu ringiugu khatdi khangsiatu kariugu ladjanpao leng kadakhai sude. 26Paliuniu tingthengjiu maidunggu ladjanpao thiujiu, kakungbo ronna Mose khuga phungwangjiu, kasiam-siambo hinara paliu ronna ladjan thiu khaide.
27Sichiujiu Mose niu Jethro tu kanui khailujiu, Jethro pakylam wanglan mide.
Currently Selected:
TADPADBO 18: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
