TADPADBO 19
19
Israel Mai Sinai Luongga Bambo
1-2Israel mainiu Egypt dih phutlubo sai, pasumbo hiugu raithubo naise Rephidim phutlujiu, Sinai ramjingga wangde. Siga paliuniu Sinai Luong phiga rijiky thiu khaide. 3Sichiujiu Mose niu Tingwang tu adaora maluang lamse khangde.
Rapiu niu patu maluang lamsu kulujiu, Jacob kaikikdung, Israel maidung khuga dinkhaira haichiu dinkhai-e: 4“Egypt mai khuga Rapiu, Iniu kamkhai mibo khatdi lengrengniu papoinatu pakanniu phungbo kumjiu, dechiujiu Iniu naliutu haiga, akhuga puiwanglo chiubo naliu ngaolude. 5#1 Pe 2.9. #Taj 4.20; 7.6; 14.2; 26.18; Tit 2.14.Tuhoira, naliuniu agu ladriat majaijiu alad piusai, naliu hai amaisiak thiu rabo-e. Kadihpiri pakhiangna agu-e, chiudi naliu haira Iniu kadalu mai thiu rabo-e. 6#Mad 1.6; 5.10.Akhuga kadkhaibo mai khatdi agu singku thiujiu lung rabo-e.” 7Sichiujiu Mose niu Israel maigu jupaodungtu kumadui lujiu Rapiu niu pakhuga dinkhaibo hina paliu khuga dinkhai bide. 8Siga maidung siniu chakhuan khat thiujiu paokakge, “Rapiu niu dinbo hinase aliuniu kamrabo-e.” Haise Mose niu Rapiu khuga paokhai-e.
9 Rapiu niu Mose khuga din-e, “Iniu kamuangjiu gasu nakhuga kiune, sichiujiu Iniu natu npaobo khuanse maidungtu pichiu khaine, sichiusai paliuniu natu malummi rabo-e.”
Maidungniu paokakbose Mose niu Rapiu khuga dinkhaide, 10siga Rapiu niu pakhuga din-e, “Maidung khuga tadlujiu thainai khatdi sonnai hai kahum raleng, paliu ronna kam masan bamra dinkhai bilo. Paliuniu paliugu fai-nidung katha masan lujiu, nanaileng kaden rabo-e. 11Sibo naise mai hinaniu atu ngaolura Iniu Sinai Luongga kiurabo-e. 12#Heb 12.18-20.Maidungniu kenpad makra retmagui milo, sichiujiu mai khat niudi maluong lamse khangmakra khatdi wangmana makra dinbilo. Mai khat kumboniu siga paphi kakhaisai patu kamshat mirabo-e. 13Patuse mai khat niudi dinmakjiu tatuniu rotshat maksai tavaipiniu ketshat rabo-e. Haise chakhaodi, chamaidi sonmakge, paliutu kamshat mirabo-e. Chiudi makese mudkhaisai, maidungse maluang lamse khangrabo-e.”
14Sichiujiu Mose niu maluang lamsu kiulujiu kahum raleng maidung khuga dinkhai bide. Siga maidung siniu paliu fai-nidungse katha lude, 15Siga Mose niu paliu khuga din-e, “kaden sulo, sichiujiu haibo lungga mai khatdi nphiujibo suimakge.”
16 #
Mad 4.5. #Taj 4.11,12.Pasumbo nai nsuanse tingsim sude khatdi hengri kalik sude, sichiujiu maluang rigase kamuang ken tamiu sude khatdi make khuan kadibo mudbo chiusude. Rijiga bambo mai hina pingboniu kaphik-rai-rai mide. 17#Taj 4.11,12.Tingwang tu adaora Mose niu maidungtu rijiky gasu maluang phiga maluangpad sude. 18Sinai Luong pakhiangna mikhutniu phuiting mide, palamra chamijiu gasu Rapiu wang-e. Mikhutse n-mang kadibo khat gasu khapadbo kumme, sichiujiu mai hinase pingboniu kaphik-rai-rai mide. 19Make khuanse tanbi-bikhang sude. Mose niu npao sude, khatdi Tingwang niu tingsim gasu paokakge. 20Rapiu niu Sinai Luongga kiulujiu Mose tu maluong ton-gase kukhang mide. 21Mose niu khangboga Rapiu niu pakhuga din-e, “Kiulujiu maidungniu retkhaibo arai gasu kenpad makra khatdi atu phui makra rukhai bilo; paliuniu suimaksai, paliu kengkha shai rabo-e. 22Akhuga wangmanabo singkumai tangbo paliu ronna kam masan rabo-e, chiumaksai Iniu paliu tudi sajai pirabo-e.”
23Mose niu Rapiu khuga din-e, “Maidungse khang ngam lakge, palamra nangniu arai retkhai mira khatdi masanbo maluang-e chiujiu chamtan pikhai mibo-e.”
24 Rapiu niu paokakge, “Kiulujiu Aaron tu puilujiu khanglo. Chiudi singku maidung nai maidung sira arai retkhaibo lenlam kenpadbo suimakge, sichiu maksai Iniu paliutu sajai pirabo-e.” 25Siga Mose niu kiulujiu Rapiu niu dinbose maidung khuga dinkhaide.
Currently Selected:
TADPADBO 19: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
