CHABANGCHAM 14
14
Abram niu Lot tu Ranpadbo
1Chawang khang madai Babylon mai wang Amraphel, Ellasar mai wang Arioch, Elam mai wang Chedorlaomer khatdi Goiim mai wang Tidal paliuniu, 2chawang khang mangiu, Sodom mai wang Bera, Gomorrah mai wang Birsha, Admah mai wang Shinah, Zeboiim mai wang Shemeber, khatdi Bela (maksai Zoar) mai wang paliutu chari thiusude. 3Chawang khang mangiu hainiu khat thiulujiu tuhoi Duipui Kashaibo chiu kubambo Siddim Ramjengga wang madui-e. 4Paliu hai Chedorlaomer hangga tingkum kariu-je-niakiu bamkhai mibo-e, chiudi kariu-je-sumkiubo kumga paliu patu atungsu mibo-e. 5Kariu-je-madaikiubo kumga Chedorlaomer niu pamaluangmai dungtu maluangwang Ashteroth Karnaim ga bambo Rephaim, Ham ga bambo Zuzim, Kiriathaim ajengningga bambo Emim, 6khatdi Edom luongga bambo Hor maitu paliuniu ngamlude, sichiujiu ramjing taiga bambo Elparan tangbo paliuniu hameng sude. 7Sigasu paliuniu Kadesh (sibo tingga Enmishpat chiu kubo) katang malan wangde. Paliuniu Amalek maidung kadih pakhiangna lulude, sichiujiu Hazazon Tamar ga bambo Amor maidung tudi ngam lude.
8Sigasu Sodom, Gomorrah, Admah, Zeboiim khatdi Bela wangdung khang mangiuniu paliu riphendungtu khomwang Siddim gu Ramjengga, 9Elam, Goiim, Babylon khatdi Ellasar wangdung khang madaitu, chari thiu subo-e. 10Sibo ramjengse chakhomky kengchang keng-e, siga Sodom nai Gomorrah wangpiuse pakkhaiboga, chakhomky gase nkhuang khai mide. Chiudi kakibo wangdung sumra maluonggen lam pak nbai mide. 11Chawang khang madai siniu Sodom nai Gomorrah ga bambo hina, katiu-kasakdi suttad kam mide. 12Abram chi-nah Lot se Sodom ga lungbam-e, siga paliuniu patudi pagu kabambo hinadi sutlu tad mide.
13Chiudi siga mai khangkhat marilujiu wang Amor mai, Mamre gu masanbo singbang mungga lungbambo Hebrew maipiu, Abram khuga chakhum paokhaide. Mamre khatdi pasingna kania Eshcol nai Aner hai Abram lam liangmai-e. 14Abram niu pachi nahpiutu minlude chiubo khuan chiuluboga, pagu rijiky gasu paniu chari thiura chamai 318 tu ku-madui lujiu chawang madai situ Dan tangbo hatad sude. 15Siga paniu pamaidungtu paphom-phomleng njan tamlujiu mikremaidung situ nchunniu chari thiujiu ngamlude. Paniu paliutu Damascus gu tingpilam Hobah katang hatadle. 16Sichiujiu lutadmibo hinase daolan kamlude. Paniu pachi-nahpiu Lot tudi, pagu mania hina khatdi maipui-maina nai kaki-kibo kavangdung tudi kalan lude.
Melchizedek Niu Abram Tu Thoikhaibo
17Abram niu Chedorlaomer khatdi kakibo wangdungtu chari ngamlujiu wangboga, Sodom gu wangpiuniu patu Shaveh Ramjeng (Chawang Ramjeng chiujiudi kubo) ga adaora padle. 18#Heb 7.1-10.Siga Salem gu chawang khatdi Kuthubo Rawang gu singkudi thiujiu bambo Melchizedek niu taruak nai jaw phungwangde, 19sichiujiu paniu patu thoikhaijiu din-e, “Ting-kadih dambo Kuthubo Rawang siniu Abram tu thoikhai bilo! 20Nagu mikremaidung riga chari ngamkhaibo Kuthubo Rawang situ thuonlo!” Sichiujiu chari gasu sutlubo hinagu dam-kariugu damse Melchizedek leng Abram niu pikhaide.
21Sodom gu chawang siniu Abram khuga din-e, “Sutlubo hinase naleng lululo, chiudi amai hinatu pikhai kalanlo.”
22Abram niu paokakge, “Tingkadih Dampao Kuthubo Rawang Rapiu masuangga Iniu siangjiu dinbo-e, 23chiubora Iniu nagu wakhatdi, chalangkeng maksai chaphitop-riang tangbo lulakge. Palamra nangniu wadaodi haichiu dinmakra leng-e, “Iniu Abram tu pi lungwi khaibo-e.” 24Aleng wakhatdi Iniu lulakge. Amaidungniu thinmibo situ ronna Iniu lukhaine. Chiudi alam liangmaidung Aner, Eshcol khatdi Mamre paliu damra pikhai bilo.”
Currently Selected:
CHABANGCHAM 14: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
