CHABANGCHAM 15
15
Abram Khuga Tingwang Niu Ladriat Thiubo
1Haibosai, Abram madungao khat ngaojiu, Rapiu niu pakhuga dinbo chiu-e, “Abram yo, pingtulo. Kapingbo gasu Iniu natu jukhaijiu chaphijeng kadibo naleng pikhai bine.”
2Chiudi Abram niu paokakjiu din-e, “Kuthubo Rapiu yo, Iniu anah hasai, nangniu pikhaibo phijengse aleng degu pageng bamralo? Alek lurabo sira Damascus maipiu Eliezer hai ronna-e. 3Aleng nangniu nahmai pikhai makbo jengniu avangmainiu agu kalek lumi rabo-e.”
4Siga Rapiu niu pakhuga dinlanbo pah chiu-e: “Haibo vang Eliezer siniu nalek lulakge; nanah siakniu nalek lurabo-e.” 5#Rom 4.18; Heb 11.12.Rapiu niu patu lenlam puipad lujiu din-e, “Tingpuk lam phuikhanglo, khatdi chagandung situ pariak chak matailo; sikum gapjiu nakai-kikdung lungrabo-e.”
6 #
Rom 4.3; Gal 3.6; Jas 2.23. Abram niu Rapiu tu malum-e, sijengniu Rapiu niu pamalum kumjiu patu lukhaide.
7Siga Rapiu niu pakhuga din-e, “I hai Rapiu si-e, Babylon ga bambo Ur gasu natu puipad lujiu haibo kadihse naleng pikhai bine.”
8Chiudi Abram niu maniu-e, “Kuthubo Rapiu yo, haise agurabo-e chiubo Iniu dechiu singamlu ralo?”
9Paniu paokakge, “Takum sum sum tangmibo matom khat, kami khat khatdi milychi khat sigasu makhao khat nai kaphina khat akhuga phungwanglo.” 10Abram niu khaoringdungse Tingwang khuga phungwangjiu paphan-phan rekhaide, sichiujiu paphan-phanse thom nia thiujiu thomkhaide, chiudi paniu thingnase rekhai makge. 11Wakhaodung rigase chamitiuleng#15.11: Chamitiuleng: haise khangsianiu Lawai maksai chararui chiujiu ku-e. lenwang taokhai-e, chiudi Abram niu paliutu hathon mide.
12 #
Job 4.13,14. Naimik kiusuboga, Abram jipting tad mide, siga kapingbo khatdi charenbo pakhuga wang-e. 13#Tad 1.1-14; Tk 7.6.Rapiu niu pakhuga din-e, “Nakai-kikdungse sangdiumai ramga pazu simakmai thiujiu lungne; siga paliu kavang thiujiu lungne, khatdi paliutu tingkum kai madai mathad khairabo-e. 14#Tad 12.40,41; Tk 7.7.Chiudi paliutu bangkhaibo jat-dung situ Iniu sajai pikhai rabo-e, sichiujiu paliuniu sibo sangdiumai dih phutpadboga, chakhiu-chalan kengjiu phungtad rabo-e. 15Nangra ring mathengne khatdi agi-manaijiu shaine, sichiujiu natu nphum mawi khaine. 16Haise nakai nakikdung siniu haiga malanwang makhaga chaken madai-ga padrabo-e, palamra Amor maidungniu wajiukha sajiu paliutu sajai pikhaitang makthen Iniu hathon lakge.”
17Naimik kiumiboga khatdi tamiu miboga mikha padbo chali khat nai tao-bansatbo kahiupuang khat ngao-e khatdi sise wakhaodung-jan kakga tadmariu sude. 18#Tk 7.5.Siga Rapiu niu Abram khuga ladriat thiu khaide. Paniu din-e, “Iniu nakai-nakikdung leng haibo Egypt lamrai gasu Euphrate Giuki tangbo dih hai pikhai bine, 19sironna makjiu Keni, Kenizz, Kadmoni, 20Hitt, Periz, Rephaim, 21Amor, Canaan, Girash, khatdi Jebus maidung kadih hai khaisan bine.”
Currently Selected:
CHABANGCHAM 15: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
