CHABANGCHAM 30
30
1Chiudi Rachel niura Jacob leng nahmai khatdi lungmakge, sijengniu pah pachipuitu manma sude khatdi Jacob khuga din-e, “Aleng ngena pilo, maksai I shai mine.”
2Siga Jacob niu palung pomjiu din-e, “Iniu Tingwang sung malin silakge. Paniu natu ngena lungmakra kham mibo-e.”
3Paniu din-e, “Haiga avangpui Bilhah bam-e, patu maluangji khailo, chiusai paniu aleng ngena lungkhaibo sui-e. Sichiujiu papen gasu maipui khat I thiulu bui-e.” 4Sichiujiu paniu pavangpui Bilhah tu pakina leng pikhaijiu paniu patu maluang nphiuji khaide. 5Siga Bilhah pawon phungjiu Jacob leng piumai nah khat lungkhaide. 6Rachel niu din-e, “Tingwang niu alam liangjiu ladjan thiu khaide. Paniu arathoi chiukhaijiu aleng piumainah khat pikhai bide.” Sichiujiu paniu pazan leng Dan#30.6: Dan: Hebrew ladga “alam liangjiu ladzan thiubo” chiubo-e. kukhaide. 7Bilhah niu pawon phunglanjiu Jacob leng piumainah khat lungkhai lande. 8Siga Rachel niu din-e, “Iniu achitu alai khaijiu chari thiuboga Iniu ngamlude.” Siniu pazanse Naphtali#30.8: Naphtali: Hebrew ladga “chari thiubo” chiubo-e. chiu kukhaide.
9Leah niu pah ngena lungta mide chiubo siluboga, paniu pavangpui Zilpah tu Jacob naoleng pikhai-e. 10Siga Zilpah niu Jacob leng piumainah khat lungkhai-e. 11Leah niu din-e, “I hai asan wibo pui-e.” Sichiujiu paniu patu Gad#30.11: Gad: Hebrew ladga “sanwibo” chiubo-e. chiujiu kukhaide. 12Zilpah niu Jacob leng piumainah khat lungkhai lan-e. 13Siga Leah niu din-e, “I hai dejiukha chunwilo! Tuhoira maidungniu atu chunwiliu chiu kura mide.” Sichiujiu paniu pazan Asher#30.13: Asher: Hebrew ladga “chunwibo” chiubo-e. chiu kukhaide.
14Atiat tingga Reuben niu chalu mengboga chagaa#30.14: Chagaa: Haise “chalun kingrabo gaa maksai manguigaa” chiubo-e. daolujiu papui Leah khuga khoiwang-e. Rachel niu Leah khuga din-e, “Lungsajiu nanahgu chagaase aleng poinakha janno.”
15Leah niu paokakge, “Nangniu akinatu sutlubose naleng bui makha jiuma? Tuhoidi nangniu anahgu chagaa hai sutlanra kamjiu ma?”
Rachel niu din-e, “Nangniu nanahgu chagaase aleng pisai thaichun nang Jacob tu maluang jibo sui-e.”
16Jacob niu chalulam menglu chawan malan wangboga, Leah niu paddao lujiu din-e, “Thaichunra nang akhuga jirabo-e, palamra Iniu sibo manleng anahgu chagaase pimibo-e.” Sijengniu sibonai nchun paniu patu maluang nphiuji khaide.
17Tingwang niu Leah rathoi chiukhai bijiu, pawon phunglanjiu Jacob leng pamangiubo nah khat lung lande. 18Siga Leah niu din-e, “Tingwang niu aleng tathuon pikhaide, palamra Iniu akina leng avangpuitu pikhai-e.” Sichiujiu paniu pazanse Issachar#30.18: Issachar: Hebrew ladga “chamaitu chaphijeng pibo maksai tathuon pibo” chiubo-e. kukhaide. 19Leah niu pawon phunglanjiu Jacob leng piumainah khat lunglan-e. 20Siga paniu din-e, “Tingwang niu aleng kawibo kalen pikhai bide.” Tuhoira akinaniu atu lukhai mine, palamra Iniu paleng piumainah khang charuk lungkhai bide.” Sichiujiu paniu pazan Zebulun#30.20: Zebulun: Hebrew ladga “lukhaibo” khatdi “kalen” chiubo-e. kukhaide. 21Pasaidi paniu panah puimai khat lung-e, paniu pazan leng Dinah chiu mathak khaide.
22Sibosai Tingwang niu Rachel tu maningtao khai bide, paniu parathoi paokak khaijiu patu ngena lungra suikhai bide. 23Paniu pawon phungjiu piumainah khat lungde. Siga paniu din-e. “Tingwang niu agu mangam luthon khaijiu anah piumai khat pikhai bide. 24Tingwang niu kakibo nahdi pikhai sanbo thiulo.” Sichiujiu paniu pazanse Joseph#30.24: Joseph: Hebrew ladga “paniu pikhai sanbo” chiubo-e. chiu kukhaide.
Jacob Niu Laban Khuga Chali Thiubo
25Joseph tu manalubo sai, Jacob niu Laban khuga din-e, “Iniu akylam malan wangra atu suikhai sulo. 26Iniu naleng changam kamkhai mibo phijeng anao anahmaidungtu pikhai sulo, I tadmine. Iniu naleng tatien thiu mawikhai mibose nang sibamme.”
27Laban niu pakhuga din-e, “Haise Iniu dinkhaine, najeng gasu Rapiu niu atu thoikhaibide, chiubo Iniu taden mataibo gasu silude. 28Naphijeng riamsulo, Iniu pikhai bine.”
29Jacob niu paokakge, “Iniu naleng dejiukha kamkhailo, khatdi Iniu akhibo milydungse dejiukha kingpadlo chiubo nangniu sibam-e. 30I wangmakhabo tingga poinakha bamniubose, tuhoira kengchang keng mide, sichiujiu Iniu tadkhaibo bam hinaga#30.30: tadkhaibo bam hina: maksai ajeng ganiu chiubo-e. Rapiu niu thoikhai bide. Tuhoira aronna amaning kam mataine.”
31Laban niu maniu-e, “Iniu naleng degu pikhai ralo?”
Jacob niu paokakge, “I aphijeng wakhatdi lunimakge. Iniu kadinbo hai nang suisai, Iniu nagu milydungtu phuikhai lanne: 32Thainai Iniu nagu milydung ruangga tadronjiu mily katikbo#30.32: mily katikbo hina: khangsaira katikbo mily hina chiubo-e. hina khatdi katrukbo mi hina Iniu lune. Sise Iniu aphijeng thiujiu lunibo-e. 33Sichiujiu I hai nchang-e chiubo pasai nang silu sune. Nangniu aphijeng phuira wangbo tingga tarukbo mi maksai katikbo mily makbo bamniusai, sise Iniu agabo-e chiubo nang silubui-e.”
34Laban niu paokakge, “I sui-e, nangniu kadinbo kumjiu anai kamkhe.”
35Chiudi pasaibo nai Laban niu pachi katrikbo, daoru-rubo mi hina khatdi kaka daobo papui nai tarukbo hina kada lujiu lupad mide. Khatdi katikbo milydung hina jutam mide. Sichiujiu sibo hinase paniu panahdungtu phuira pikhai mide. 36Sichiujiu paniu Jacob khugasu ngamdiuthen jengsum lungga sibo milydungtu halujiu chabin tadmide. Laban gu kamalibo milydung situ Jacob niu khuanbam-e.
37Jacob niu muksing-ke, kamiusing-ke khatdi nkuangsing-ke tamlujiu paliu gi gaolujiu kamtrik khai sude. 38Paniu sibo kedungse thinlujiu milydung nai kamidungniu tadui sakbo kuangdung suangga khai-e. Paniu siga khaibo sira, paliuniu tadui sakra wangbo tingga chakhaodungse wan-wan-e. 39Sichiujiu kamidungse singkedung suangga piangbo tingga papoidungse daoru-rubo, katrikbo khatdi daoru-rubo piangpad sude.
40Jacob niu milydung situ kamidung khugasu khaitam lujiu katrikbo leng maksai katikbo lengse papao Laban gu khaoruidung khugasu paleng genglura haichiu kam-e.
41Papum kawibo khatdi pamai wibo khaodung siniu tadui sakra wangbo tingga khatdi wonbo tingga paniu singkedungse paliu suanggase ponkhai bide, sichiujiu paliuniu piangbo tingga trikbose piangde. 42Chiudi pamai sabo maksai papum kasabo khaodung suanggara paniu singkedungse khai makge. Sichiujiu, wathengkha makjiu Laban khaodungse kasa-kason maliang mide, chiudi Jacob gura kawi maliang mide. 43Haichiujiu Jacob lungwichang lungwi mide. Pagu kamidung, milydung, kavangdung, qontraodung khatdi qonniamdung hai kingpadjiu keng mide.
Currently Selected:
CHABANGCHAM 30: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
