CHABANGCHAM 31
31
Jacob Niu Laban Khugasu Pakmibo
1Laban nahdungniu haichiu dinbo Jacob niu chiulude, “Aliu piugu bambo hina Jacob niu lulude. Pagu chakhiu-chalan hinase aliu piu khugasu paniu daolubo-e.” 2Laban tadi karaiga kumjiu majang atuk tamide chiubo pah ngao-e. 3Siga Rapiu niu pakhuga din-e, “Napao-napeh kadih khatdi nasingnamai khulam malanwang sulo. Iniu natu maluang khai bine.”
4Sijengniu, pagu khaoruidungtu khuanbambo gasu Rachel nai Leah niu patu luzamga adaora Jacob niu chalad din kalen khaide. 5Paniu panai khuga din-e, “Nanai piuniu karaiga kumjiu atu atuk mawi tamide, chiudi apiu Rawang niu atu maluang bamme. 6Iniu alai khaijiu apaoleng maran khai mibose nanainiu sibamme, 7Chiudi paniu atu sontiujiu, aphijeng kalilon kariu mide. Chiudi atu kam masa raleng Tingwang niu patu suikhai makge. 8Laban niu katrikbo mi hina naphijeng-e chiuboga, kami hinase katrikbo maliang piangpadle. Paniu daoru-rubo mi hina naphijeng-e chiuboga sikumbo maliang piangpadle. 9Tingwang niu khaoruidungse napiu khugasu lupad lujiu aleng pikhaibi-e.
10“Kapiangbo ken-gase kawonbo michidungse katrikbo, daoru-rubo khatdi trukphukbo maliang siniu wonbo amang lamsu ngao-e. 11Amang lamsu Tingwang gu mazaniu atu kujiu akhuga din-e, “Jacob.” Siga Iniu paokakjiu din-e, “Yo, haiga I bamme.” 12Paniu din-e, “Phuilo, kawonbo michidungse katrikbo, daoru-rubo khatdi trukphukbo maliang-e, haise Iniu kambo lamra Laban niu nakhuga kambambose Iniu ngaobo jengniu-e. 13I hai natu Bethel ga ngaolen khaimibo Rawang si-e, siga nangniu maningtaobo tusom somkhaijiu takysa liangkhaijiu akhuga ladriat thiukhai mibo-e. Tuhoira natu mana khaibo kadihlam malanwangra kaden sulo.”
14Rachel nai Leah niu Jacob tu paokakge, “Anai piu khugasu anainiu daora wakhatdi ha-e. 15Paniu anaitu sangmai kumjiu lukhai-e. Paniu anaitu jon mibo-e, sichiujiu patu pimibo rangkangse tuhoira pah thinloi mide. 16Tingwang niu apiu khugasu luthon mibo senlan hina haira aliugu-e, khatdi anahmai gu-e. Tingwang niu nakhuga kadinbo saisuijiu kamsulo.”
17-18Sijengniu papiu kadih Canaan lamse tadra Jacob niu kaden mide. Paniu panaodung, panahmaidungtu qontrao pi tongkhai khai lujiu, pagu khaorui hinatu halujiu khatdi paniu Mesopotamia ga daolubo hina phunglujiu tadsude. 19Laban ra sibo tingga pagu mily giu kakipra tadmibo-e, siga Rachel niu papiu ky ramengse agalude. 20Jacob niu pah tadmide chiubo dinkhai makjiu Laban tu sonlujiu tadmide. 21Paniu pagu kabambo hina phunglujiu kalangjiu tadsude. Paniu Euphrate Giuki kenlujiu Gilead luongriang lam tadsude.
Laban Niu Jacob Tu Hatadbo
22Jengsum sailamniu Jacob pakmide chiubo Laban khuga dinkhai bide. 23Siniu pamaidungtu puilujiu jeng chinnia hakhangjiu Gilead luongriang gasu paniu Jacob tu hatang lude. 24Sibonai nchun, pamang lamsu Tingwang niu Laban khuga wangjiu din-e, “Wakamdi nangniu Jacob tu kam kapin wimakge.” 25Jacob niu maluang gase pagu rijiky thiukhai lujiu bamme, siga Laban di pasingnamaitu maluang lujiu Gilead luongriang gase pagu rijiky thiukhai lujiu bamme.
26Laban niu Jacob khuga din-e, “Dekamjiu nangniu anahpuidungtu chari gasu sutlubo puidung kumjiu atu sonlujiu mahin puitad mijiulo? 27Dekamjiu nangniu akhuga dinmakjiu mahin paktad mijiulo? Nangniu akhuga dinsai Iniu chalui thiujiu nthiam-tara khuanniu chunwijiu natu kapaokhai lubui-e. 28Nangniu anahmai nai atahmaitu pijiu atu biang-hiu khai makge. Sise kapangbo ngamkam-e. 29Iniu natu kam masalura pumtan bamme, chiudi kalu-nchun amang lamsu napiu Rawang niu natu wakamdi kam kapin makra dinkhaibo donniu-e. 30Nakylam wangni nsang mibo jengniu-e chiubo I si-e, chiudi dekamjiu nangniu aky rameng agalu jiulo?”
31Jacob niu paokakge, “Nangniu nanahmaitu sutlu suma chiu maningbo jengniu I pingbo-e. 32Chiudi nangniu nagu charamengse mai khat khuga daosai, patu kamshat midi sui-e, haiga amaidung mathiu siniu lamchap thiubo-e, nagu hina phiulujiu khoilulo.” Rachel niu Laban ramengse agalude chiubora Jacob niu simakge.
33Laban niu Jacob gu mathenkyga phiusude, sichiujiu paniu Leah gu mathenky khatdi kavangpui kaniagu mathenky gadi phiude, chiudi paniu parameng situ daomakge. Sichiujiu paniu Rachel gu mathenkyga ngut sude. 34Rachel niu pagu charameng situ khoilujiu qontrao tongbo bam hangga khailujiu ntaoman mide. Laban niu mathenky lung pakhiangna phiusude chiudi daomakge. 35Rachel niu papiu khuga din-e, “Paohubo yo, atu nalung pomkhai tulo, palamra I chahiugu tazai tadbamjiu nasuangga chapkhang ngamlakjiu-e.” Laban niu phiusude, chiudi paniu pagu charameng situ daolu makge.
36Siga Jacob niu palung pomjiu din-e, “Iniu degu kamaobo kamkhai mijiulo? Nang degu kamkhaini jiulo? Nagu majise dekumkha bam jiulo? 37Tuhoira nangniu agu mania kabambo hina phiuboga nagu mania degu daolo? Namaidung nai amaidung masuangga khailujiu anai saoniu majilo chiubo pijiu chap khailo. 38Iniu nakhuga bambo hai tuhoira tingkum makai khang mide. Siga nagu mily maksai kami wakhatnadi kingpad makbo thiu makge, khatdi Iniu kamichi khat tudi tiulubo ha-e. 39Mily khattu nkan khaoruiniu kamshat misai, sise Iniu majon-e. Sise I amao makge chiujiu nakhuga khengbo ha-e. Nchun ma, n-nien ma, hamibose nangniu akhuga paman kheng-e. 40N-nien tingphuga khatdi nchun ka-agiboga magenthiujiu khengkhai kamigu-e. I jikiu khai makjiu tamibo-e. 41Iniu natu maluang bamkhai mibo tingkum makai lungga sichiu wangmibo-e. Tingkum kariu-je-madaikiu siniu nanahpui kania jengniu, tingkum charuk siniu nagu khaorui jengniu I naleng tatien thiukhai mibo-e. Sichiu bamdi nangniu aphijeng hai kalilon kariu khai mibo-e. 42Apiu Abraham nai Isaac Rawang siniu atu maluang khai maksai nangniu atu abenruang langkhai lubui-e. Chiudi Iniu kamkhai mibo, amagenthak hai Tingwang niu ngaobambo jengniu kalu nchundi pagu ladzanse paniu pikhaibo-e.”
Jacob Nai Laban Niu Ladriat Thiubo
43Laban niu Jacob tu paokakge, “Haibo puidungse anahdung-e, paliu nahdungdi agu-e, khatdi haibo khaoruidungdi agu-e. Pachangsiakjiu, nangniu ngaobambo pakhiangna hai agu-e. Chiudi Iniu anahpuidung tudi paliu nahdung tudi khai-nbam ngamlakbo jengniu, 44nakhuga ladriat thiura I kaden lude. Anainiu ladriat thiu khaibo haitu maningtaojiu bamra tubow khat khonsu khaikhe.”
45Sijengniu Jacob niu mangaimak raleng chiujiu tatukang khat ponlujiu somkhaide. 46Khatdi paniu pamaidungtu tubowse khonsura chamtan pikhaide. Sichiujiu paliuniu tubow munggase katiu-tiu aruang khaide. 47Laban niu haisitu Jegar Sahadutha#31.47: Jegar Sahadutha: Haise Aramaic mai ladle, parambaniu “maningtao khaibo tubow” chiubo-e. chiujiu kukhaide, khatdi Jacob niu Galeed#31.47: Galeed: Haise Hebrew mai ladle, parambaniu “maningtao khaibo tubow” chiubo-e. chiujiu kukhaide. 48Laban niu Jacob khuga din-e, “Haibo tubow hainiu ania khangniatu pijiu maningtao khaijiu bamrabo-e.” Sijengniu sibo bam situ Galeed chiujiu mathak khaide. 49Laban niu dinlan-e, “Ania ramnajiu bamliudi Rapiu niu ania riga phuikhaijiu bamlo.” Sijengniu sibo bam situ Mizpah#31.49: Mizpah: Haise Hebrew mai ladle, parambaniu “Akhekhai rabo maksai phuikhai rabo bam” chiubo-e. chiujiudi kukhaide. 50Laban niu dinlan-e, “Nangniu anah puidungtu na-nkhai sajiu bamdi, maksai nangniu katambo puidungtu nanao thiujiu bamdi, Iniu sibo lamga simak bamdi Tingwang niu aniatu phuijiu bamme chiubo maningtaolo. 51Haiga Iniu khonkhaibo tubow hai ania kakga bamme, haisiniu maningtaobo n-niutu thiurabo-e. 52Haibo tubow nai n-niutu hainiu pi maningtao khaijiu bamrabo-e. Iniu natu chari thiura wadaodi haibo tubow kenjiu hameng lakge, sichiujiu nangdi haibo n-niutu kenjiu atu chari thiura hamengbo suilakge. 53Abraham nai Nahor#31.53: Abraham...Nahor: Abraham hai Jacob pao-e khatdi Nahor hai Laban piu-e. Rawang niu ania kakga ladzan thiusulo.” Sichiujiu papiu Isaac niu kahumbo Rawang zan gasu Jacob niu pagu ladriat hai majaira tasiang siang khaide. 54Paniu maluang rigase charathiu khaijiu khaoring khat gikhai-e, khatdi pamaidungtu siga katiu maluang tiu khaide. Paliuniu tiulujiu, nchunse maluong rigase jikhaide. 55Pasaibo nai nsuan kalu buangsu lujiu Laban niu patahdung nai panahpuidungtu biang-hiu khaijiu ramna khaide, sichiujiu pakylam malanwang mide.
Currently Selected:
CHABANGCHAM 31: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
