CHABANGCHAM 32
32
Jacob Niu Esau Tu Adaora Kadenbo
1Jacob niu sichiu tadsubo ga mazadung khangsianiu patu npuiga adao-e. 2Paniu paliutu adaoboga paniu din-e, “Haise Tingwang gu rijiky-e.” Sibo bam situ paniu Mahanaim#32.2: Mahanaim: Hebrew ladga “rijiky kania” chiubo-e. chiujiu kukhaide.
3Jacob niu Edom kadihlam pachi Esau tu adaora leng chakhumpao maitu pamasuangga langkhai-e. 4Paniu paliutu haichiu dinra ladti khai-e: “Nacham phungbo navangpiu, Jacob, Iniu awangpiu Esau khuga tacham pisikhai-e, Iniu Laban khuga bammijiu tuhoi tangbo malanwang makjiu-e. 5Iniu matom-kabuidung, qonniamdung, milydung, kamidung khatdi kavangdung maruibam-e. Paohubo yo, Iniu nagu lungsiat daolura nakhuga tacham hai paowang kinbo-e.”
6Chakhumpao mai siniu malan wangjiu Jacob khuga dinsude, “Aliuniu nachi Esau tu adao-e, sichiujiu pah natu adaora kaden bamme. Paniu chamai kai madaitu puilujiu kin-e.” 7Siga Jacob se pingsude khatdi manang sude. Paniu pamaidungtu khatdi pagu milydung, kamidung, matom-kabuidungtu khatdi qontraodungtu thom nia thiujiu njanpad sude. 8Paniu maning-e, “Wagaje, Esau niu karaibo thom situ hameng chari thiudi, kanabo thom sira marilu bui-e.”
9Sichiujiu Jacob niu chara kahum sude, “Apao Abraham Rawang yo, khatdi apiu Isaac Rawang yo, akhuan nking khailo! Rapiu yo, nangniu atu aramlam khatdi asingnamai khulam malan wangra, sichiujiu nangniu aleng wahina wira kaden khaine chiujiu akhuga dinkhaibo-e. 10Nangniu navangpiu atu lungsa khaibo khatdi malum khaibo haise Ira wakhatdi buimakge. Iniu wadimakbo thun hai thinlujiu Jordan se kenlude, sichiujiu tuhoira Iniu haibo thom kania haitu puilujiu malanwang kin-e. 11Achi Esau khugasu atu gukhailo, chiujiu Iniu kheng-e, I ping-e, paniu wangjiu aliu mathiutu chari thiura, khatdi npui, n-nah pakhiangnatu kamshat mira I ping-e. 12#Chab 22.17.Nangniu atu kawi pikhaijiu, akai-akikleng pikhaijiu mainiu pariak singam lakbo, duipui mungga bambo nbuiniang kum pilung khai bine chiujiu ladriat khaibo situ maningtao khailo.”
13-15Siga nchunse manaikhai lubo sai, Jacob niu pagu khaoruidung gasu pachi Esau leng kalenra chiujiu: kamiliu kai nia khatdi pachi makai, milyliu kai nia khatdi pachi makai, pa-ndui tiubo qontrao papoi jaojiu samriu, matomchi kariu, matompui atai, qonniamliu makai khatdi pachi kariu kadapad khaide. 16Paniu chakhaodung saisuijiu pavangdungdi kadapad lujiu khaitam-tam khaide. Paniu paliu khuga din-e, “Amasuang tadrai sulo, sichiujiu chakhaodung jat saisuijiu pakak-kak saojiu tadlo. 17Paniu raithubo vangpiu khuga chamtan pikhaijiu din-e, “Nangniu achi Esau tu adaoboga khatdi paniu haichiu maniuboga, ‘Nawangpiuse saolo? Nang delam tadralo? Nasuangga bambo khaoruidung hai saogulo?’ 18Siga nangniu haichiu paokak rabo-e, ‘Paliu hai navangpiu Jacob gu-e. Paniu haise pawangpiu Esau leng kalen thiujiu pikhaibo-e. Jacob papumsiak sailam tadkinne.” 19Paniu niabo, sumbo khatdi khaoruidungtu phuikinmai hinatu nchamjiu chamtanse pikhaide: “Naliuniu Esau tu adaoboga haikum gapjiu dinrabo-e. 20Naliuniu dinrabo-e, ‘Yo, Jacob se aliu sainaga tadkinne.’” Jacob niu haichiu maning-e, “Haibo kalendung siniu patu I hiamlu sune, sichiujiu paniu atu kuak khai sune.” 21Paniu pagu kalendungse pamasuangga langkhai lujiu, sibo nai nchunse pagu mathenkyga bamkhai mide.
Peniel Ga Jacob Niu Manubo
22Sibonai nchunse Jacob niu sulujiu panao kania, pavangpui kania khatdi panahmai khang kariu-je-khatkiu situ puilujiu Jabbok Giuki kenmide. 23Paniu paliutu singgiu hugen lamse langkhai lubo sai, pagu kabambo hina tudi langkhai mide. 24#Hos 12.3,4.Chiudi sailam paronna bammide.
Siga mai khat wangjiu patu nsuan tingbenpad makthen manu sude. 25Maipiu siniu panai manubose ngamlak mide chiubo siluboga, paniu Jacob khen kakhiu khaide, siga pa-nkhuangra thuak mide. 26Maipiu siniu din-e, “Tingben pad kinne, atu phut khailo.”
Jacob niu paokakge, “Nangniu atu thoikhai makthen I natu phut khai lakge.”
27Maipiu siniu maniu-e, “Nazan saolo?”
Paniu paokakge, “Jacob.”
28 #
Chab 35.10. Maipiu siniu din-e, “Nazanse Jacob chiu kulanlak mide. Nangniu Charatu khatdi chamaitu nthiboga nangniu ngamlude; sijengniu nazan hai Israel#32.28: Israel: Haise Hebrew ladga “paniu Tingwang tu nthibo” maksai “Tingwang niu manubo” chiubo-e. kumi rabo-e.”
29 #
Lad 13.17,18. Jacob niu din-e, “Tuhoira nazan akhuga dinkhailo.”
Chiudi paniu paokakge, “Nangniu dekamra chamtan sini jiulo.” Sichiujiu paniu Jacob tu thoikhai bide.
30Jacob niu din-e, “Iniu Tingwang tu zudao-siak lude, chiudi I ringbam kha-e,” sijengniu sibo bam situ paniu Peniel#32.30: Peniel: Haise Hebrew ladga “Tingwang zu” chiubo-e. chiujiu kukhaide. 31Peniel gasu Jacob niu tadsubo tingga naimik padmide, khatdi pa-nkhuang thiubo jengniu tutheng-tutheng tadsude. 32Thainai tangbo Israel maidungniu pa-nkhuangraga bambo patiase tiumakge, palamra Jacob tu kakhiu khaibose sibo tia ga-e.
Currently Selected:
CHABANGCHAM 32: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
